一生何求

早在上星期，你已告訴我因為哥哥回港，所以你媽咪邀請我星期三上你家食晚飯，你媽咪會煮她最拿手的炸豬排，一聽到炸豬排已經垂涎三尺啦~~你說你下午三點半會去鰂魚涌開會，開完會便可回家，我不用在灣仔等你了，而由於御用過海司機停工，所以昨天放工我便好聰明地搭67x再轉乘118過海，但......我這個決定是大錯特錯了！

昨天的118超級多人，雖然我有位坐，但穿著厚褸的我與旁邊的大嬸乘客坐得很迫，動彈不得，但人多的關係車廂又很悶焗，再加上由信和開始一直紅隧過海也超塞車，下車的時候已經6:45了！不過你還安慰我哥哥還沒到，不用趕啊~~

上到你屋企，你一開門我已經話：今日著得咁好睇o既~~(咁我心諗可能因為凍啦~~)你話媽咪換緊衫，你要去厠所，我話我都好急呀，但你居然唔理我走咗入去，咁我唯有入你房放低個袋先啦~~

一開門......

嘩！好靚呀！我不斷重複講咗呢句說話10次都有呀，因為我見到~~

好靚呀!!!!!!!(我仲心諗：今年你送的生日禮物好誇張喎~~)

背後還有"為你鍾情"的音樂，然後你行入來笑晒口咁又捧住花，嘻嘻，我問你：你求婚呀？你話係呀！我話點解唔跪低o既？哈哈~~咁你咪跪低問我願唔願意嫁囉~~我問你係咪會一世都咁愛我對我好o架？你話係呀，會一世都咁愛我同對我好，然後你遞咗個Lego的模型公仔比我，如果我願意的話就將個公仔加落去個城堡的國皇隔離啦~~嘻嘻~~

個城堡整個外牆都係閃石，又有燈，原來個城堡仲可以打開o架，而入面仲有迪士尼啲公主音樂呀~~真係超級超級靚呀！！！

大家見唔見到個寶箱呀，隻求婚戒指收埋咗o係裏面呀

要做這一個城堡真的一點不易，要買料、要噴漆改顏色、要黏閃石、要駁電線......最緊要係要在我毫不知情的情況下趕工，辛苦你了！我想這是我人生中最寶貴的禮物呀~~謝謝你真的寵我如公主般~~

我真係無諗過你會咁突然求婚(我原先以為會過咗年或者出年生日啦)，雖然婚期已經定咗，但你說你想在一切還沒有進行之前讓我名正言順的籌備，後來再聽說你籌備求婚的過程，真的讓我好感動、好warm，這7年真的過得不易，很多往昔的片段都浮現o係腦海，由初初我的表白、等待、熱戀、冷戰、瀕臨分手直至今天，一路走來所有甜酸苦辣都嚐遍了，我卻從未有丁點的後悔，尤其到了這一刻，我更知道自己一直堅持去愛、唔放棄是再正確不過了！

將來無論遇到甚麼，我都會記住今天，記住你為我所付出的心思同愛！謝謝你呀~~

(後補)城堡製作特輯：http://wyyan.kytsai.hk/