我打勝仗呀

上上星期五校長捉我照完肺之後，我都乖乖的無再遲到請假，但到咗上星期二臨放工前10分鐘，我見佢鬼鬼祟崇咁自己走去攞學校信紙，我都覺得好奇怪o架喇，整乜唔叫人攞比佢呢？過咗5分鐘，同事攞咗個公文袋比我，話：校長叫你番去睇o下先，睇完簽完再copy一份比番佢！我即刻拆開睇o下啦，原來係一封書面警告信，內容列明咗我遲到咗幾多日、請咗幾多日病假大假，然後佢列咗5點講明我點樣引起不便，而o個堆內容主要 都係 老師自己o既假設、假想同埋感受，最後校長話要我從速改善，否則可按合約條款同我終止合約云云~~打咗比老爺，佢建議我唔好簽，應該打去勞工處問問意見，想清楚翌日先再搵校長傾，佢話如有需要可以搵埋佢入去校長室。

同查理斯商量咗一晚，又問咗勞工處意見，翌日一早我搵齊晒所有資料，一副戰鬥格咁入去校長室同佢死過~~

一開始，

我：校長，阻你少少時間想同你傾番張警告信。

校長：好呀！

我：校長，我會錄音o架！

(佢面色即時一沉呀，但都無奈回應：嗯！)

然後，我話除咗遲到我係會承認之外，全部警告於我是不公平的，所以我唔會簽！亦會逐一同佢講番我的諗法。

首先，有一半的員工都會遲到，佢個秘書由我入o黎打工開始，無一日準時番工，咁佢又有無警告信呢？如果無，我覺得佢咁樣係選擇性執法，對我好唔公平！(查理斯教我講的：選擇性執法！勁！)

其次，病假大假是我的福利，我的病假亦未超支，大假亦然，點解可以出警告信warn我要我改善呢？勞工處話如果僱主因為咁樣而考慮將我解僱，我可以向平機會投訴；另外，pt.1-5係老師的個人感受 / 假想，佢無向我求証就將佢啲假設放諸我身上(假設包括：我病假時應該要休息會唔聽電話 / 我病假後要清理積壓的工作，所以未敢再按排新工作給我 / 擔心我身體未能承擔更多工作)，令我間接阻礙工作進度，然後再同校長投訴我工作表現有問題，由第一日佢覺得我有問題唔出聲自己suffer晒啲工作，到佢終於頂唔住所以投訴，呢段期間佢從來都無向我直屬上司或我本人反映過，點解佢處事咁唔成熟？佢咁做唔係為件事好 / 唔係為學校好！同埋所有嘢係佢假設 / 係佢個人感受，感受咁抽象咁唔實際，我唔會簽名認同呢封信，因為咁做等於我認同佢的感受，而呢啲感受我覺得係佢強加諸我身上(即係老屈！)我甚至同校長講，我夠膽講一句，我無工作係積壓的，所有的工作進度已寫於紀錄表上，我上午接到的工作多半於同一日放工前比番老師，咁都叫積壓？究竟係 邊個 老師投訴？我要求同佢面談，唔係對質，我只係想知佢有咩工作比我做而我係再三拖延咗呢？

再加埋，我反問佢，星期五先同我講完，我話會改善，只係再過3個工作天佢就B & W比封警告信我，作為一個管理層，究竟係佢處事手法好有問題定係佢覺得我呢幾日唔遲到 / 唔請假都做唔到佢要求而要進一步warn我呢？同埋main point係，佢無話過星期五的面談屬於verbal warning，如果已經覺得事態嚴重，點解佢唔一併比埋警告信我呢？

講到後來，佢唔知驚咩，居然話：其實呢，我作為校長都好為難o架，我都覺得要比呢封警告信你係好殘忍，同埋我自己都好掙扎o架，覺得你做嘢又快又都幫得手，咁樣warn你我都唔忍心呀，所以呢，你見啦，封信我都唔親自比你(意思應該係佢比唔出手)，搵同事交比你，然後我諗我都係離開office一陣啦，因為我都唔忍心見你收呢封信呀！(呢個假精...)

然後我又賤人上身，我話：校長呀，我都明白o架，其實你真係一個好好o既校長，你又肯聽人意見、又肯比意見我，你真係好好o架！我都明白你難做呀！(講o既時候仲要微微身向前代表誠懇同肉緊....今屆影后都非我莫屬喇o掛.....)

可能由於我態度強硬 / 論點重覆又重覆，佢無耐性 / 我錄咗佢音，佢驚死......45分鐘之後佢無再解釋喇，只係應承我會改過封警告信，「警告」、「情況嚴重」等字眼及老師感受pt.1-5等通通會刪去，後來佢改過封信仲攞埋我個位，比我睇o下個draft先，佢先再印落信紙~~(好似我係老細要批閱佢啲文件咁~~)我都估到佢會收番封警告信，淨係比番封新的信我，所以我一早影印咗放o係手袋，然後將正本放櫃桶，到佢行埋o黎問我攞番時，我先好唔在意又好爽快咁o係櫃桶攞出o黎比番佢，哈，我早有後著啦~~

雖然最後佢都無供個老師出o黎，但佢都比咗好大的tips我，但，我唔會再猜度了，一來知道又點吖，二來，佢的tips可能都係誤導我o既o者~~

今次總算贏得漂漂亮亮，多謝軍師查理斯同老爺，經此一役， 全部 老師我都信唔過！我都要積極搵工喇，8月合約完結佢一定唔會同我續約啦~~不過真係好開心，佢輸晒啦~~哈哈！！

自家製花球2

好友妹妹7月結婚，為了送上祝福，之前整咗一個花球比佢伴娘用，但查理斯同我媽咪都覺得細咗啲，由於花材有限(嘻嘻，都係我屋企的剩餘物資.....)所以拆咗好友之前影相用的花球，重新製作2個花球比佢伴娘同花女用，希望用得著啦~~

伴娘的~

 

花女的~

 

 

靚靚褂鞋

昨天放工又出咗旺角，首先去咗金都(基本上每兩星期至少都會行一次)，今次主要想睇o下Cosco的Samantha的化粧同埋全日package幾錢，嘩！都真係幾貴o架~~今次留意佢係因為佢啲頭set得幾型，同埋好多人讚佢very nice，所以又去睇o下啦~~但係......Trial要$500，要即時join package先有得退，太貴了，如果試埋嫁妝的momo我唔喜歡的話，就要仔細考慮一下係咪要試Vivian了！再咁試落去，啲試粧貴都幾襟計~~

食完譚仔我哋向住波鞋街方向行o下，諗住又去睇o下有無心水褂波鞋啦，原先都係鎖定買金色皮的Converse......點知見到佢，我同查理斯都決定咗係佢了!!!!

呢對鞋應該真係for結婚的人買o架，仲有金黃色~~當然啦，我哋仲會後期加工tim~~

行過隔離，查理斯仲有驚人的好提議，我哋又買多樣嘢~~呢個idea要暫時保密，整好咗先比大家睇啦

我哋都覺得我哋實在太快prepare咗太多嘢了，好似趕住今年結婚咁......

梁品製作

好啦，我要收拾心情，寫番啲正經嘢先~~

星期六同Grandma飲完下午茶，就同查理斯去咗深水埗行咗好耐，睇咗 + 買咗好多婚禮用的小物品，主要都係手花襟花的材料，希望我哋的idea做咗咗出o黎大家都喜歡啦~~

約咗朋友未夠鐘，我哋又去咗尖沙咀百利行o下，今次去的時間比較晏，好多舖頭都開咗門，從來都無見過咁熱鬧呀~~睇睇o下我哋仲book咗梁品製作做場地佈置tim~~

話說我哋見到有間新開的佈置公司，所以咪入去問o下價囉，今次佢問我哋，我哋都無講明係邊間酒店，只係話比佢知我哋唔要backdrop，咁個package可唔可以將backdrop轉第二樣嘢？店員Haze好爽快話轉三對燈柱 / 花柱比我哋，基本上款式都任揀，而photo zone的佈置我哋都會轉做証婚枱，package的價錢都唔算貴，其實我哋都已經心動o架喇，不過都係話諗一諗先啦。點知行咗出門口兩步，我哋已經一齊覺得都呢間公司都算老實，起碼唔會夾硬迫你講出婚宴地點先報價，而佢包o既佈置都合乎我哋的要求，於是唔夠五分鐘，我哋又番轉頭喇~~

再同Haze confirm咗要啲咩包啲咩，佢o係張單度寫清楚，到寫venue一part，我哋先寫係半島，咁我哋問佢有無做過呢個場o既佈置，佢話「暫時未有，但你哋放心啦，我哋都會盡力做到最好o架！」聽完，真係覺得呢個店員好好，佢表現出比客人睇佢哋係一間有heart的公司，最後因為查理斯好勁咁講出人哋1月o係九展有擺booth同埋用咗咩色的佈置，Haze知道我哋都有留意佢哋，所以又Free埋Expo送的泡泡機(actually我哋都唔知半島比唔比用…)，Haze話佢哋啲staff會去半島先睇場，然後會再同我哋傾個design / 主題 / 用色，然後就會出個電腦圖比我哋睇，就係咁，我哋又落咗一半訂金喇~~

番到屋企，search一下梁品製作的comments，雖然得好少，但都係讚o既，同埋佢哋原來都接好多商場show，好似之前旺角新世紀的巨型柯柏文都係佢哋負責的(Michelle提議將柯柏文搬去半島……我哋會好好考慮一下o架)，睇完之後就更加覺得放心同開心喇~~

梁品製作：http://www.leung-creations.com/

可有可無

自從星期五比校長照完肺之後，一直都悶悶不樂……

除咗第一次打工比校長當水魚唔開心過之外，呢幾年都練成金鋼不壞之身了！今次校長插我遲到、病假多，我承認，但係佢講到我無貢獻、對老師o黎講可有可無，仲話我成日hold住佢哋比我的工作，我真係絕對唔會認同蒹且極度不滿！我每日番工簽到都好誠實咁將實際的時間寫落去，但原來誠實換來的後果係比人插，校長秘書日日都遲到o架啦，點解佢又唔話佢呢？我病假多，我都唔想，今年啲濕疹發得頻密過舊年好多，一發，唔好話番工吖，就算落床洗個面我都好唔想呀！好彩每一次唔番工我都會睇醫生攞醫生紙，咁有啲同事逢星期幾例請半晝無醫生紙，佢又唔出聲？講到好似我搵學校著數咁，呢度又唔係私人公司，我睇醫生的費用又無得實報實銷，我究竟有無咁想請假想到要自己比二百蚊出o黎睇醫生呢？佢仲話我事假都多，大佬呀，啲事假係我自己o架，6日事假邊度多呢？有啲同事有21日大假，佢哋真係可以每個長假期都唔番工o架喎，佢哋平日都試過攞事假，我淨係有2日o係上課日攞事假，咁又多？

當然啦，呢啲咁實在的數據擺出o黎，我無得/無諗過要狡辯，我咪話我會反省同埋留意番個情況囉，點知佢好似得勢不饒人咁，係咁數我，佢講到我的存在係阻住個地球轉，又套我講嘢，問啲老師通常叫我做咩？係咪淨係打字？咁搵資料呢？我真係想反問，你以為呢度係Band 1學校呀？啲學生淨係熟讀啲筆記都好好啦，仲要額外搵資料做咩呢？啲學生無心向學就無心o架啦，你就算用ppt.用到3D都好啦，佢哋都唔會有興趣o架，根本上個老師一開聲佢就想瞓啦，所以幾多元化的教學材料都係bullshit！佢講到如果打字打筆記老師自己都可以做番，係，你有手指就打到字o架啦，咁如果你覺得啲老師1分鐘打10個中文字都可以自己打番晒啲嘢o既，你炒咗我囉！作為一個校長，佢諗我可以幫到手的地方真係太高層次喇，唔幫老師打筆記的話，我諗投訴會更多囉~~

講到中段我真係覺得無中生有 + 老屈 + 作大，我忍唔住一輪咀反駁，佢真係少少欺善怕惡，我唔出聲佢就越講越大，我一開口佢就轉口風講第二樣，又話會唔會係因為啲老師唔知我工作岡位已轉，又話會唔會係我的座位o係校務處有關，令啲老師唔知可以搵我幫手……我都忍唔住話，啲老師要搵人幫手，佢自己然識去邊度搵啲咩人，未講o既係，你當啲老師咁善良？如果佢係要搵人幫手，天腳底佢都識摷你出o黎呀，呢度唔會有人可以白攞人工o架！最後，佢問我係咪都唔算多嘢做，我話坦白講吖，唔可以話啲老師用唔著我，係未用得盡我囉，仲有好多嘢可以搵我做，咁佢又問我仲有啲咩可以幫手喎？我點知o者，我唔會知道實情啲老師有咩要幫手o架喎，佢又問幾次，我都忍唔住話其實幫啲咩手係應該佢哋管理層去決定，我只係負責執行！對話到此結束，佢話再調動一下啲工作安排喎~~調飽佢囉~~

我唔開心唔係因為擔心無咗份工，我總覺得「此處不留人，自有留人處」，但失望o既係唔知邊個插到我體無完膚，而可疑人物亦係我以為信得過o既人，經一事長一智，我會學懂保護自己！亦好慶幸仲有Baby同事聽我傾訴同安慰我，仲有查理斯無限量的實際上的持，我要睇開啲~~

可有可無──就係我聽完校長一番說話之後的感覺，指o既唔單單係佢覺得我的存在，亦係我覺得呢份工對我o黎講的感覺！

食餅餅

我哋又完成咗其中一項倒水大業喇~~嘻嘻~~

特別鳴謝同事Baby同佢朋友的幫忙，以員工價買到呢一堆餅咭~~

 

公仔嘜頭

查理斯整o既~~哈哈，好好笑呀~~

未來99成日讚我隻手肥嘟嘟好得意(得意的程度係佢第一次發現的時候，好似見到啲肥bb隻手咁係咁笑)，呢個公仔隻手同我都真係幾似o架~~佢仲加咗個心心金牌比我tim~~

尋找MUA的煩惱

MUA - Make-up Artist

對於新娘子來說，好的化粧師絕對係化醜為姸的關鍵~~(當然啦，我覺得自己都唔係醜o既，不過如果因為無好好選擇而比佢搞醜咗，就"該煨"咯~~)睇咗有啲新娘子的經驗，同個mua搞到不歡而散，最慘係o個日的心情都備受影響；有啲mua試粧時就係yes woman，到big day o個日都唔知係咪親戚到，完全變咗另一個人，呢啲都係作為新娘子最擔心的~~

加上因為"Big Day無Take Two"，所以近日都好努力online searching，睇o下人哋啲試粧相又睇o下comments，越睇......我發覺越大鑊呀.....

原本我已經約咗Sylvia下星期四晚試粧，揀佢試的原因係 1.試粧費$300(就算confirm揀佢都無得退，所以唔駛急住落訂)，2. 有個有濕疹的新娘都搵佢試過粧，我見佢都好細心為新娘選擇化粧品， 3. 佢成日都同阿Jan拍檔影pre-wedding，我見啲新娘子o係佢化粧同阿Jan的鏡頭下個樣都好好，咁我既然搵咗阿Jan影相，咁如果揀埋Sylvia都有質素的保証吖，至少，佢唔會化到唔似我吖~~

再加上之前Expo join咗$300高清試粧，咁其實已經有2個唔同的化粧效果可以選擇了，但貪心 + 貪靚o既我又online searching，今次慘了，突然再多咗3個選擇呀......有啲個粧化得好sharp好fresh，有啲hairdo又好吸引(我好鍾意簡單的髮型 + 誇張的頭飾)，但係再咁睇落去，$300又$300，真係唔得o架喎~~

其實仲有一個MUA我都好喜歡o架，就係好出名的Vivian，佢係May Chong的拍檔，好喜歡佢哋啲粧容同hairdo，給人的感覺一點都不土，但係價錢都唔平，所以我會最後先搵佢試粧，希望到最後一試ok就可以扣番o個$500試粧費啦~~揀Vivian的原因，係因為佢住北角，而我應該會揀炮台山出門，所以可以近啲囉，等大家都瞓足啲，o個日做起嘢o黎都開心啲吖~~

自家製花球

相對濕度又暴跌，我啲皮膚又發作啦~~雙手同個身都生咗好多一粒粒，睇咗醫生話係風疹喎

得閒無事o係屋企，用屋企o既剩餘物資做咗以下呢個伴娘花球比豬脷萍妹妹，好似太多花種，但材料有限，整住先啦~~希望佢鍾意同埋用得著啦~~

第1份金器

(今日真係博炒呀~~呢篇已經係我今早打o既第3篇網誌了~~)

星期四晚，我哋去咗周大福，原本都係諗住混吉o架o乍，最後有收穫呀~~多謝查理斯，這是我的第一份金器，大家睇睇我今年的情人節禮物啦~~(2011年仲有一次情人節呀~~發達咯~~)

是日金價為$116xx......(拜託，別再升了.....)

原先試o既唔係呢款，o個款就時髦啲，呢款係我上星期o係沙田等查理斯的時候o係櫥窗見過o架，但後尾食完飯入去問，佢話剛剛賣咗lu，之後睇咗幾間周大福都無喇，呢對都係Sales o係別的舖借番o黎比我試，一試就愛上了~~

好似好專業的攝記查理斯

影咗好耐都影唔到戴住2隻o既樣(塊面闊得滯遮住咗)，咁影住一邊先啦~~

飯聚 x 2

星期五晚去咗銅鑼灣同1823同事仔食飯，好開心今次好齊人~~一邊食一邊咩都講，真係笑餐飽，仲聽到啲秘密，第一個感覺係好Dirty，dirty的思想、dirty的關係，更令我覺得我delete咗佢係o岩o既~~期待下個月來我家的大食會(大食o既係你哋，我小食就可以了~~)

雖然之前你哋已經知到我結婚的消息，好開心你哋"鄧"我開心，我諗最開心o既都係查理斯啦，咁多人讚佢個城堡~~其實每對情侶都有唔同的相處方式，到你哋求婚 / 被求婚的一刻，我相信你哋都會好感動好難忘，最緊要都係另一半係你的至愛o者，其他都係次要~~所以，唔駛羨慕我o架，我都好期待聽到你哋(愛麗詩，仲有湯馬士)的求婚故事o架~~加油啦~~

星期六晚同咗好耐無見的PolyU同學仔食飯，好開心好開心，敏如媽媽的兩個仔仔太太太可愛了，大o既好靚仔又sweet，細仔超級得意呀~~一抱佢上手我真係唔捨得放呀，點解可以咁重又咁得意o架，仲好乖呀~~Mandy，你真係好幸福呀~~對住佢兩個，真係諗起都開心到笑呀~~

 

好開心查理斯同我一樣超級喜歡小朋友，結咗婚之後我要生3個~~嘻嘻~~

Well-preparation

2010年1月10日，謝謝Blog友Anna的介紹，我有免費飛去九展的婚展，所以o係Megabox食完tea之後就同查理斯好游閒咁散步過去~~(順便消化同消耗一下)

去到九展，原來因為我哋係換飛入場，所以無人哋有o既紙袋，唔知入面有咩優惠呢？一入到去，第一個停留的攤位係Grandforest，我哋睇o既係佢啲場地佈置，咁佢哋都做好多單半島的佈置，都算係我哋想要o既嘢啦，但就唔會有太多的驚喜，同埋佢個套餐包backdrop，但我哋唔需要，結果唔要backdrop的價錢仲貴過要，所以都要諗o下先~~同埋，佢間店o係金都，我要search一下佢啲comments先~~

離開咗呢個攤位，我哋仲睇咗兩個場地佈置的介紹，原先以為Grandforest係知道我哋擺半島所以開天殺價，但我哋後尾睇o個兩間仲離譜好多，我哋只係要幾枝羅馬花柱 / 水晶花柱 / 水晶燈 + reception + 証婚枱的佈置，佢哋開價要9k - 11k，真係發神經 佢哋一o黎就會問你o係邊度擺酒，咁後來都話酒店啦，佢哋會問咁你book咗未o架？邊區呀？邊間呀？真係唔答佢都唔會報到價囉......就係咁樣，場地佈置的事暫告一段落，番去再做o下online searching先~~

之後去咗睇戒指，睇o既款都係同PN的差唔多，但價錢就平好多喇~~最後，我們選了玫瑰金的款色，我的是有碎鑽的，而查理斯的就沒有，原有鑽石的位置會改做銀色，嘻嘻，我知道查理斯喜歡另一款多啲，但我又戴而家呢款好啲喎，結果~~佢梗係"就"我啦~~我哋第一次睇o既時候無落單，叫佢寫咗價錢比我哋，如果o岩先反轉頭搵佢，反轉頭的時候我又發揮我的師奶講價本色，哈，比佢最初開的價錢少咗$1200蚊呀，啲碎鑽仲多咗tim~~應該農曆年前後有得攞喇~~

咁早就買結婚戒指真係早咗好多，但係我發覺市面玫瑰金的戒指比較少，PN會多啲，但o個隻玫瑰金的顏色又唔夠紅喎，似黃金多啲；J's的玫瑰金夠紅，但價錢唔抵，無石的款式都要差唔多六千蚊；而家呢對戒指有石、包刻字、可以隨自己喜好改款，最重要的是$4500有找~~至於佢比人哋平的原因，係因為佢係廠o黎o架，佢哋係做批發生意的~~

查理斯猛問我會唔會遲啲見到第二啲款又鍾意o架？我話：會o架可能，不過都係幾千蚊o者，如果好鍾意咪再買囉~~哈哈，激死佢啦~~

最後一站去到嫁粧，佢sell的是高清化粧，雖然阿Jan講咗高清攝錄都唔一定要高清化粧，但我見佢只要$300試粧，全日Package都只係7k有找，不過佢哋話2月的Expo會加價到9k了，所以而家落訂可hold住舊價，咁$300試2頭2粧都ok啦，如果confirm仲有得扣番tim~~化粧師momo仲好好傾，好nice~~期待2月中的試粧吖~~

今次Expo聽得最多的是：你好幸福呀，你老公咁好咁有耐性陪你睇化粧，又咁"就"你 / 你哋好好呀，咁開心 / 你哋好早預備呀，咁早係好o架，有啲新人下個月結婚，而家先搵化粧呀~~

嘻嘻，我知喇，我有個好好的未來老公吖o麻~~佢咁好，我會鎖佢o係夾萬o架喇~~哈哈！仲第一次比人稱呼做蔡太tim~~

2010會更好

呢個聖誕 + 新年的假期，我只係番咗1日半工o乍，唔係我偷懶呀，而係又病喇......

12月24日晚去咗Lee-lee教會睇戲 + 聽道，然後開大食會，交換咗禮物又收咗好多禮物，番到屋企沖完涼瞓得都5點咯......平平安安的平安夜~~

12月25日同查理斯2人世界去咗尖沙咀睇燈飾，都無咩特喇，燈飾唔特別靚、人又唔特別多~~

12月26日，一早起身去灣仔參加Gloria的婚禮，今次牧師的訓勉好好，適逢o個日係拆禮物日，牧師用咗"G.I.F.T"作題，G for Grace、I for Intersection、F for Forgiveness、T for Tenderness，好好的一篇講道，很有意思！不知何解，今次Gloria的婚禮讓我很感動，雖然都係一般的教堂程序，但就是讓我鼻酸酸的，腦海諗番起以前o係Poly大家點樣一齊捱通宵、一齊去玩、某次晚宴後佢點樣安慰哭著的我......感覺上佢係一個好爽快、好識得照顧人的姊妹，見到佢搵到好歸宿，真係好開心！

去完教堂之後去咗探鴨b，見識咗新奇的旋轉掃風方法，抱住鴨b見到佢瞓咗的樣，唔單止鴨b好舒服，我都好滿足！仲發現咗呢個世界真係好細，姊妹的老公原來都識好多人呀~~嘻嘻~~

夜晚又番去銅鑼灣利舞台的麒麟閣飲Gloria餐喜酒，呢間酒樓的服務同食物都no good呀，食翅要點黑醋、飯麵又唔熱，唉，結果翌日一起身我已經喪嘔，其實成晚瞓覺都好唔舒服o架喇，6點幾忍唔住起身嘔咗一次，嘔番食過啲嘢，以為嘔完舒服晒啦，8點幾起身又嘔2次，諗住落街睇醫生，一落到去又嘔，救命呀~~我又唔係陀仔，搞咩呀？嘔到黃膽水都嘔咗喇，睇完醫生，食咗藥，又嘔，連啲藥都嘔番出o黎，超級慘情呀，我已經確定係飲宴啲嘢食唔乾淨喇......最後，嘔咗5次、瀉咗2次、食咗3日西藥、2日中藥，先至康復o乍......不過從好處諗，就係因病得瘦，而且胃口仲細咗好多......我要Keep住食少啲嘢喇，開始覺得食咁多嘢好辛苦~~yeah!!!!

12月27-29日瞓瞓瞓......

12月30日復工~~

12月31日又去咗我至愛的迪迪尼~~今年的城堡亮燈好靚呀~~發現迪迪尼有個類似查理斯整的城堡......賣......30萬呀!!!!但....真係o架，查理斯個城堡仲靚好多呀!!!!!

新一年，祝大家開心甜蜜~~