去外星打工

明天開始，這將會是艱辛的一星期，因為地球人被編配去外星打工呀!!!!

話說位於圖書館的同事要去日本進修花藝，所以校長編咗我去頂替佢o既工作一個禮拜 (唉.....咁邊個頂替我的工作呢？我開始後悔上次得罪咗校長.....) 聽到呢個消息，我的同事都替我可憐，之所以話係去外星打工，係因為負責圖書館的老師，切切實實係一個外星人 (可能連人都唔o岩，應該係外星生物)！

佢真係

1. 完完全全唔識同人溝通

2. 活o係自己o既世界 (圖書館重地有過百條規矩.....)

3. 固執 (永遠唔會聽人意見，唔理人哋點回應，佢只會重複佢要的說話幾次，搞到好似你聽唔明佢講咩咁.....我學過呢啲叫communication break down)

4. 簡單複雜化 (借完書後要蓋上還書日期.....幹嗎一個圖書館要有5個還書日期的印章呢......你唔好以為佢係4個後備，係一人用一個，我唔可以用你的、你不能用佢的.....佢話咁蓋錯咗都可以追查番邊個人蓋錯咗，話番佢知等佢下次唔好做錯喎.....但.....每個印章的還書日期都係佢自己調較的!!!!!)

5. 做事急躁 、唔聽人講 (永遠都係急步行、衝鋒陷陣咁款，佢同人講嘢好似開機關槍咁一輪咀講，但人哋回應佢未講到半句佢又再講截停人哋)'

6. 無禮貌 (佢算係小女子見過比較有學識但最無禮貌o既一個人....我最初上班之時，佢衝埋o黎打開咗我書檯個櫃桶，然後話：無郵票o既？然後"啪"一聲大力推埋個櫃桶走咗去，連sorry都無聲.....又開放日喝令我熄咗中央音樂)

7. 說話硬繃繃 (連講句"唔該"都好似有人攞支槍指住佢咁唔情願)

......

小女子才疏學淺，沒有適合的形容詞了，只可以話，以上講的，只係可以形容到三分一......

所以今個星期我休想可以閒下來寫blog了.....雖然要寫的很多，因為今個weekend我同查理斯去咗元朗行咗幾間婚紗舖有啲comments、敗家咗一次、媽咪買咗嫁妝比我......

大家等我呀!!!!(希望我唔會變埋外星人啦....)