壽星仔恨到喇

啲明星歌星一攞獎就好鍾意上台發表愛的宣言，我諗我好難有呢個機會攞啲咩獎喇，所以唯有將o個啲感謝o既說話o係度講一次啦~~

查理斯：

今日係你生日呀(呢句好似有啲多餘.....你又未懞到唔記得自己生日.....)，祝你開心健康(減肥成功呢啲嘢舊年都祝過o架喇，應該係我唔夠衷心所以你唔成功呀，所以今年都係唔祝喇，哈哈~~)、升職加薪(呢啲嘢就唔同呢，你睇o下你舊年幾快更上一層樓~~梗係啦，我做唔做得成闊太都靠晒你喇~~)

但係，今年我無時間亦都無精神完成原本想送你o既禮物，只能夠比個外殼你睇o下，希望有日可以完成實物送比你啦~~ (聰明o既bloggers應該知道呢個係乜東東~~)

查理斯，呢兩個禮拜我為咗屋企o既嘢頻撲，你都一樣跟住我馬不停蹄咁呢度去o個度去，有你o係身邊o既感覺就好似落雨o既時候有把傘、刮風o既日子有件羽絨咁，憂慮同埋擔心都可以減半，有時我仲會忟憎會發脾氣，但係你都毫無怨言，反而會摸o下我個頭問我做咩"忟憎豬"呀？我知因為你好好好愛我，先可以做到無論咩時刻我需要你你總會o係我身邊，因為愛我又愛埋晒我啲茶煲家人，所以呢，趁住今日你牛一，送你一份無形o既禮物啦~~

就係──

接新娘環節取消所有玩新郎哥同兄弟環節~~ (你恨到啦，我終於都blog咗出o黎收唔番o架喇....你唔駛驚自己要變身Wonder Charles唱跳nobody啦~~)

敗家女變慳家妹

今次買o既嘢真係好抵o架~~又格過晒價，所以我變身慳家妹同大家分享一下至得~~

1. 永隆禮金盒，好似$35-40

話說有次去永隆混桔時睇中咗佢，初時我以為好貴，查理斯亦覺得唔係咁靚，但係我唔知點解對佢愛不釋手呀!!!!(其實對於將要放入去o既錢，我更係愛到唔想離手~~) 紅色絨面襯金字好grand呢~~

而家呢個樣係未砌好的，砌起再post啦~~

2. Hennessy XO 1000ml @ 機場禁區免稅店

呢個1000ml要機場禁區先有(因為免稅係每個人免1000ml，所以機場版本會出到剛剛好呢個容量)，根據探子查理斯回報，平時超市賣700ml係$13xx，新年期間超市最平係$11xx，而家多1000ml只售$1370，所以真係好抵o架~~

(其實仲未同半島傾開瓶費點計，但又停唔到手係咁買酒......咩事呢我哋?!!!)

(大家咪以為免稅就係平呀，呢兩日o係羅湖免稅店睇過，同樣牌子同樣係1L，要$1680呀!!!!)

3. 姊妹毛毛外套，$50@百利

呢件毛毛外套真係抵到無朋友，雖然我一直都係想買薄身啲o個款實毛的，亦已經o係淘寶睇中咗，大約係RMB$35-45，但有次逛百利見有類似實物，咪伸手摸o下囉，唔摸由自可，一摸嚇c我~~

佢隻袖塊裏布好好好吉手o架，直程好似用咗吉吉魔術貼邊咁，如果我真係淘咗番來就弊傢伙喇~~

於是開始唔放心淘寶，每次行街都會留意o下呢啲毛毛外套(唔想買毛毛披肩，因為有姊妹用過話跌來跌去唔係好方便)，卒之比我遇到呢間嘢，佢門口貨架寫住$60 for 1，$100 for 2，除咗呢個款仲有其他款呀~~

但係初時佢搵晒出o黎都唔夠，所以我哋只係買咗4件，但老闆娘好好呀，我哋走咗佢再搵又搵到，於是佢追出o黎話搵到仲有8件，於是我買多1件，而家有5件夠晒姊妹用喇~~

地點：(由於我哋好興奮又趕住走o既關係，無留意佢舖名，只係大約記得)

搭扶手電梯上兩層：沿住梁品製作向樓梯方向直行(尾尾有間小食檔o個邊)，到巷尾1/3位置的左邊，有間舖放咗個架o係門口，掛住都係毛毛披肩的，店內有啲姊妹裙同晚裝賣，但由於老闆娘話唔會再番貨，大家有買趁手喇~~

(如果搵唔到都唔好尋仇呀，因為印象真係好.....依稀....)

誰更重要

豬割紙皮公主名句：男朋友可以無，工人唔可以無！

剛過去o既一個星期，我正係處於查理斯去咗洋蔥頭國 + 無工人o既真空日子，所以呢個星期，我不斷思考呢句說話o既準碓性同埋真實性~~

話說印尼姐姐嫁女，所以佢放一個月大假歸家幫個女辦嫁粧，呢一個月我預咗要捱，卻想不到比想像中還要辛苦很多很多......

麻麻(Grandma)唔小心扭傷咗啲肌肉，猛嗌痛，結果明愛收咗佢入院，咁都好，叫做有人睇住佢照顧佢又唔駛佢o係屋企行o黎行去再整親，但係住咗兩日明愛，又話要轉佢去聖母醫院，要知道我老家o係長沙灣，去明愛就可以成日佢漏咗啲咩都番去攞，但而家搬咗去竹園，真係好鬼遠，又要來來回回幫佢攞藥又攞叉電器，呢幾日攰到我一上巴士就瞓著咗喇........

最最最麻煩o既係我不單止要應付體力上的舟車勞頓，仲有心理上承受住莫大o既壓力，怕說錯話、發咗脾氣令一眾屋企人給我帶來更多o既麻煩，電話一響就有一種想一頭坎埋牆o既感覺....好難受......

在我心裏不斷祈求呢個星期快啲過去、工人快將回歸的日子──o黎緊呢個星期日會係我o既重光紀念日！

但係我好好彩，有個十足十工人咁o既男友隌住我走走糴糴，比工人做得更好o既係佢仲會噓寒問暖、無怨無尤，o係呢幾日我都唔知嚎哭咗幾多次o既情況下，佢依然好有耐性咁攬住我安慰我，我心入真係好感動好感恩有個咁好(真係要講好到近乎美)o既查理斯一直陪住我處理呢啲動輒得咎o既瑣事~~

好喇，我有結論喇~~

工人唔可以無，男朋友更加唔可以無呀!!!

港婦

每日上網睇報紙、Facebook都唔難發現有好多好似好有道理o既衞道之士發表一大堆抗議呢樣反對o個樣o既言論，有時一睇個heading都會覺得──"好似講得好o岩喎...."，但諗多幾秒，我就會覺得係歪理。

無論幾多歲都好，佢哋都只係識聲大夾惡、惡人先告狀，尋日我就遇到當中的表表姐~~

話說尋日搭102過海，o係太古城上車，上層已經無孖位喇，所以我同查理斯就坐尾二o個排o既路口位，中間隔住條走廊。雖然架車咁多人，但可能時間係兩點幾，啲人飯氣攻心"中"眼瞓，所以成個上層都好靜，而Roadshow亦都得個畫面無聲。

但係坐o係最後排有人用手機睇魚躍在花見又唔用earphone，盧婉恩把聲真係有啲嘈，不過除咗係嘈啲之外都可接受o既.....

然後，我聽到啪、啪啪、啪 o既聲，唔駛轉頭都估到後面有人剪緊指甲啦!!!!

如果佢係生倒刺、反甲所以急不及待咁剪咗佢，我真係唔介意，但係呢啲啪啪聲此起彼落，我真係好驚佢啲指甲碎飛晒入我啲頭髮度!!!

所以，我用手掃咗自己個膊頭一下作狀撥走啲剪甲碎兼斜望咗佢一眼 (其實更加係想佢知道咁樣係會彈晒落我度而停手)，原來呢個犯婦人幫緊佢個小六定中一牛龜咁大件o既仔剪指甲，但係呢個港婦(!!!!如果有更惡毒o既稱呼，歡迎留言，我願意更正) 居然唔停手仲語氣極差咁話：

「嫌嘈就唔好搭巴士去搭私家車啦!!!!」(可怒也吖!!!我唔鬧你你居然踩我一腳!!!!)

因為我好唔鍾意用潑婦呢個形象面對廣大觀眾，所以我都係用我一向淡淡然o既語氣澄清：我唔係話你嘈，而係你o係度剪指甲彈晒過o黎囉~~

港婦搶白：咁我都唔想彈到你o架喎!!!! (係呀，佢"唔想"係大晒o架!!! 所以呢，政府應該改例，唔想殺人又錯手隊冧咗你全家，係不應判有罪的)

我：咁你o係度剪指甲都唔應該啦!!!

港婦：剪指甲有咩問題呀？

我：如果你覺得o係度剪指甲無問題o既話，咁o係度剪頭髮都ok啦？(指甲碎係少啲但都係垃圾吖，如果你覺得咁少唔駛專登掃啦，麻煩阿大人你借你屋企張床過我o係上面批批腳皮啦~~被磨成粉末的腳皮最終都會隨風而散，仲細粒過啲指甲碎呀~~)

港婦：(厚顏無恥) 係呀，你鍾意都可以o架！(原來鍾意就可以做o架喇？Great idea~~咁我鍾意o係呢個又靜又充滿冷氣o既車廂指腳甲、批腳皮、剃格拉底毛腳毛唇毛修眉仲有刷牙，唔知你意下又如何呢？呀，我個鼻都係時候清理o下o架喇，如果我撩完鼻屎再唔覺意咁彈去你度你都唔好mind喎~~人哋無心o架o麻.....)

查理斯：咁你o係度剪指甲係好唔衞生吖o麻，如果你覺得無問題咪叫個仔番學校問o下啲老師同學，有無人覺得係應該o係巴士剪指甲o架囉，咁樣教壞晒個仔.....

港婦：我點教仔係我o既事啦~~ (假設你打算送你個仔去太空讀書、火星定居、水星終老，咁真係我哋呢啲地球人多事咗....)

查理斯：係，個仔係你o既，第日佢o係度"or屎"都無問題o架喇 (大家覺得誇張咗？no la，事情的本質是一樣的，只是程度有深淺，都係解決個人認為必須立刻解決的生理需要啊~~)

港婦：你咁都講得出即係你做得到啦，講埋啲屎屎尿尿就真係教壞晒喇.... (屎尿屁都會教壞人？咁啲醫生護士一日都唔知教壞咗幾多世人喇~~)

查理斯：咁個仔係你o既，你鍾意點教就點教啦~~

港婦：係呀，希望你第日都有個仔啦~~ (哈哈哈哈哈，生仔呢啲嘢係我哋自己o既選擇上天o既祝福，唔駛你呢個犯婦人操心呀~~你咁好心希望我有個仔，我都祝你五代同堂、長命百歲，第日先有時間空間自 作 自 受 睇住個仔點樣成為 社 會 奇 芭 o麻~~)

港婦：咁樣o既一pair人都有o既..... (係呀，你一家人最好搵關生移民去外太空啦，黑洞專吸啲太空垃圾o架，啲地球人係好似我哋咁o架喇..........)

我：算啦，唔好同佢嘈喇......

(其實我心裏惡毒地想：

我先唔要幫你教仔呀！

我亦唔想你o係你阿仔面前越講越無稽荒誕，因為咁樣會直接影響咗你個仔對你o既評價，一陣佢真係覺得我哋講得o岩唔照你教導咁做咪弊囉~~

最好你個仔聽教聽話，呢世將你呢個阿媽奉若神明，咁佢第日出o黎做嘢必定緊遵你呢個聖尊o既教導，奉行在公眾場所解決個人衞生/生理需要，到時佢啲同事朋友老細全部歧視佢咯，佢咪會知今日不辯而勝o既係我唔係佢呢個無腦無品無常識o既阿媽囉~~)

呢個港婦落車時仲要回頭"啤"咗我哋一眼，我先見到同行o既還有佢老公(好嘢!!!夠內歛，個老婆撐到咁行都唔幫口，定係佢都覺得呢種行為係唔應該o既呢？)

遺憾o既係漏咗鼓勵佢個仔寫番篇文歌頌佢偉大o既母親，難得阿媽理不直都氣壯，真係值得o係早會上台朗讀比全校師生分享啦~~

題目可以叫做：記巴士上的母親

那天，腦袋正常、手腳健全的我又忘了剪指甲，把我照顧得無微不至活像港孩(廢柴)的媽媽帶了指甲鉗上街呢，真好！

途中有對狗男女o麻說我們不應該這樣做啊~~但.....這程車我們都付足了車資o麻，我應該有權在我們佔著的空間裏把指甲幹掉的~~

那女的說話時語氣都淡淡然的，大概是知道他們理虧在先吧，而且因著媽媽強捍又有勇氣的一面，我們都獲勝了~~

常言道：母親是偉大的！今天我碓確實實深切體會到了，謝謝你啊~~

命中注定的一一二零

大家結婚o既日子係點定出o黎o既呢？

(你唔好問番我轉頭呀，如果你仲問點解，我都係唔會答你o架~~)

呢個日子對我哋咁特別，但其實對於其他人可能都係平凡o既一日，因為寫blog而認識咗幾對九唔搭八唔知因咩都揀咗呢日結婚o既couples，又發覺有啲嘢係.....整定o既~~~

同呢班準新郎新娘出咗o黎幾次o乍o麻，大家每次分別都開始有o個種難捨難離、欲斷難斷咁o既感覺喇(唔知有無人上咗車之後因為唔捨得而喊到干腸寸斷呢？.....應該係我諗多咗.....)，又通常第二朝大家都忍唔住開聲問："下次約幾時同去邊度好呢？"

心底裏真的好開心好感恩好榮幸好驕傲(!!)認識到呢班可能係因為擇日、日期有趣易記、遷就場地而揀咗同我哋同一日進入人生另一階段o既一班......傻鬼~~

而呢班傻鬼入面又有個與別不同o既超級傻鬼，因為佢古怪有趣o既表情同blog文令我哋好想認識佢真人，所以第一次見面o既時候亦都搵埋佢，估唔到我哋幾個第一次見面o既B2B就已經一拍即合、相逢恨晚~~

由結婚場地、律師、pre-wedding再講到......冰封36小時!!!! (哈哈哈哈哈......諗起都覺得好好笑呀!!!!! 連恐佈片都講埋，真係離題萬丈遠呀~~)

(okok，我知，你哋實會話因為我講起先會扯到咁遠啦~~仲記唔記得我哋set咗"片中第一個人係點死o架？"o黎做暗號呢？)

由第二次聚會開始，加入埋男子組合，雖然係咁，絕無冷場，大家又係盡興而歸~~

由o個日開始，我成日都同查理斯講，我哋呢班人真係好有緣呢(佢亦都好認同，由初初驚網上識o既人劏我個肚到而家佢都出埋o黎唔怕比人劏肚)，全部人都郎才女貌(哈哈，大家應該勁認同呢一點)、開朗爽直、願意分享唔計較、無不良嗜好(!!呢個係我估o架o乍，如果有可以留言話我知我delete番呢句吖)(大家係咪突然覺得自己啲優點多到應該獲獎呢)

雖然大家原本o既年齡、成長背景、朋友圈子甚至生活模式都唔一樣，但就因為我們都揀選了這個日子，成了紅線將我們牽在一起......

我們真心的替對方找到Mr. Right而高興，

替未找到適合vendors的你着急，

為有小毛病o既你擔心，

"鄧"食死貓o既你唔抵，

細心聆聽你分享o係婚前輔導o既得著，

慷慨的要分享自己努力搜尋o既姊妹裙資訊，

仲為未有婚禮主題o既你發揮無限創意──山楂樹之戀!!!! (你放心啦，就算我o係度穿咗橋，我都寫包單無人敢抄呀!!!!)

雖然你妳你妳都唔可能出席我人生最重要的一刻(嘻嘻，有個大傻瓜應承咗o黎飲o架喎)，但只要想起，在那一天，有一班人，穿著不同的禮服，手挽著自己最愛的一個，許下相同的承諾，呢啲點點滴滴、幻想中的畫面都足夠豐富我o既婚禮，令我帶著窩心的感覺講"我願意"呢~~

我相信，縱然我們的友誼始於婚禮，但不會在一一二零後結束的，我們要成為一生o既好友啊~~

本末倒置

唔知大家寫blog係為咗咩o既呢？

對我o黎講，只係想記錄低自己同查理斯o係籌備婚禮上的一點一滴，將來老咗都仲可以回味(如果到時yahoo仲未執笠的話.....)

越寫越多，越多又越多人回應，越多回應又越要趕住回覆，睇住個blogger list的人數接近三百(!!!)(我唔知咩係多咩係少，亦唔係想比較，只是我由小學到現在認識的朋友都未必有300人啊~~)，好多時都會由第一頁逐個click入去睇o下人哋有咩近況，因為大家寫寫o下都變咗朋友咁喇，雖然未見過面，但透過一啲o既分享同埋互相支持，大家都好似變得好熟絡，有時行街睇到啲咩我都會話：

呀，呢樣嘢阿邊個買咗呀 /

咦，呢件咪阿邊個租咗囉，真係好靚喎 /

wowooo....呢樣嘢阿邊個搵咗好耐o架喇，等我今晚番去留言話佢知先~~

漸漸，我的婚禮唔單止係我一個人籌備，而籌籌o下仲籌埋人哋o個個咁，說真的，有時都幾攰.......亦由可以好緊貼大家o既近況去到有心無力的階段......

又再漸漸地，個個唔知係咪因為近視遠視老花定係.....心底深處其實鍾意女仔，開始好多人留言話"想見o下你呀~~~"

初初真係抱住一個好鬼高興又期待又興奮好似去會情郎咁o既心態去見面，承蒙各位錯愛，居然覺得小女子講嘢好搞笑好多趣事分享，然後一傳十十傳幾十，mc win突然變得好受歡迎......而但係呢，其實我個人無我寫啲嘢咁funny o架~~

初時睇住個留言數目同埋瀏覽數目與日俱增，都會覺得自己勁呀，寫埋啲無聊嘢都咁多人睇，又逗得人哋咁開心，比人讚多兩讚，有時仲荒謬到發出書夢，如果有編輯睇中我寫啲嘢就發達喇~~

不過漸漸地，寫blog的目的不再單一同單純，好想多啲人睇多啲人留言多啲人讚，不過當啲留言多到係我覆緊上一個又有下一個o既時候真係摩打手咁都覆唔切，開始好攰......但又唔想hea覆人哋.....

而當網上世界發展去到現實當中，由最初好簡單o既easy come easy go關係變成要互相遷就考慮埋你感受o既時候，我覺得累同埋煩，貼切啲講句，我覺得無呢個必要。

係咪突然間覺得我好無情呢？定還是你從來都無真正認識過我？

簡單複雜化後，我只想回到最初，我從沒想過要成為一個wedding icon，所以由今日開始，謝絕一切邀約活動，大家覺得我寫啲嘢好睇o既話，多啲o黎睇就可以喇~~希望這裏的文字可以讓你在緊迫o既wedding schedule中找到點點喘息o既空間啦~~

移貓接雀

話說金絲雀一直都好希望可以有對用自己個嘜頭整o既結婚公仔，奈何wii又唔出埋wedding版，我哋o既畫畫指數又係零，真係唔知可以點樣換走而家套便服......

無計可施之下，我哋決定去.......偷！(為咗套飲衫，變咗賊公賊婆呀陰功......)

Everybody~~

Hello Kitty x mc win Crossover

哈哈哈哈哈~~
大家唔駛驚慌喎~~
查理斯一向都係偷嘢能手啦~~(但係個頭紗同啲花花我有份貢獻o架~~~)

所以大家唔駛問我點解佢哋唔拖手喇.....係因為唔識畫番隻手比佢哋呀!!!!

大家咪讚中式o個套畫得好細緻o既？o個套唔同，o個套係我哋真金白銀買(佢啲產品)番o黎o架，所以係靚啲o架喇~~

查理斯突然大徹大悟，進步神速，幾日間除咗幫我換咗幾套Kitty o既靚衫，仲整好咗利是封的初稿，好啦，比個勁佢啦~~

話時話吖，我真係覺得我著呢兩套衫好睇過Hello Kitty o架~~~哈哈哈哈哈

Win Swan

最近很Hit的一套戲，我又要來演一個角色~~

Win Swan

哈哈哈哈哈~~wakakakakaka~~~

囍氣洋樣(投票篇)

投票時間：

白色禮服定黑色禮服好呢？

我都有今日

係你呀，唔駛兩頭擰呀，我知你妳您你都有份呀!!!!

你哋梗係唔抵得我平時份工好得閒，所以聯合起來用念力對付我.........(你哋狠心啊....)

如果唔係，點解呢兩日我忙到無Blog友呀!!!!!

今日有超過10個學生來醫療室姑娘姑娘的叫嚷哦.......

不是一個月一次肚痛就是懷疑自己發燒頭暈界損手，

又姨媽巾又暖水袋又探熱器白花油棉花消毒藥水的搞得我都快瘋了，

午飯時間口含雞翼在享受only you o既時候都被學生爆門話要辦早退!!!!

(早退那個o麻，還有10分鐘就放午飯了，怎麼你不趁機走就算呢？仲填表o黎把鬼咩!!!!!)

胃痛那個o麻，剛吃完午飯一陣o乍喎，你因咩事咁快肚餓胃痛呢？原來佢lunch食咗啲好辣好辣o既嘢啊~~

(即刻想加一條校規──學生於午飯時間不得進食酸辣食品，違規者罰食白飯一個月)

雖然唔知你哋因咩事要用念力叫晒啲學生o黎我度，

但係呢，求o下你點都唔好話比校長知──

我而家又漸漸得閒番喇~~

原本想寫3月to-do list o架，但都係算把啦，我有我寫，人哋查理斯有佢自己o既進度表啊~~寫咗兩個月啦，都係零進度，我怕再係咁落去，臨結婚前一個月個表會水蛇春咁長呀!!!!!

(查理斯，我告訴你，你老闆說你很能幹啊~~~怎麼我完全見不到你能幹o既樣子呢？可唔可以o係呢幾個月內讓小女子見識見識啊？)

其實有好多嘢都要o係今個月入面confirm / 執行，約略講o下啦：

3月中去歐陸1st fitting + 傾造租款式，咁即係要搵定一堆ref.最好畫啲啲圖比佢知道我想做啲咩啦~~  (如果你對我呢個造租package有興趣，我願意打折出讓比有需要人士，我實在著唔到咁多件呀~~~)

3月底4月頭分別去法國同3v影相，即係又要搵定啲ref.髮型粧容道具等等資料啦，但係......

天呀！以上所有嘢都要o係辦工時間內辦個妥當啊~~

可唔可以在上班o既時間預留一半讓我做點自己事o麻~~~

明晚去法國揀影pre-wedding的衫，可以選2套婚紗1套男禮，暫時上網hold咗呢啲，比大家睇o下啦~~

如果你哋都係工作極度忙碌o既jm，你哋就行行好，用念力叫啲學生番課室乖乖聽書，咁我先會有心情時間空間努力寫blog令大家開心啊~~~