金絲雀2011大事回顧

放假不知時日過~~ 以前日日番工得閒無嘢做就寫Blog，而家日日瞓到王朝百晏無事忙，幾隻字都嘔唔出，懶過條蟲......

尋晚驚見電視又播緊2011香港大事回顧，等我偷步(偷咩步吖，2011得番兩日o乍)寫咗呢個先~~ (我要再一次重申，我寫咗篇好長o既台灣蜜糖月o架，yahoo整唔見咗，而家都仲未搵得番比我.....陰功....或者我都係適合做番條蟲.....)

綜合番2010寫o既回顧做個對比先~~

(2010) 1. 因為寫Blog記低籌備婚禮點滴，承蒙各位厚愛稱呼民女為金絲雀，我好喜歡呢個稱呼啊~~即刻想用金絲盛宴作為我哋婚禮的主題呀~~
(2011) 1. 婚禮已圓滿結束，好多DIY都配哈咗Theme color ： Pink + Gold，當然唔少得雀啦~~
Yahoo改版，一度半放棄個blog，但bloggers無放棄雀，見到你哋o既留言祝福，成為我動筆o既動力~~
因為結婚寫Blog而認識的20111120 BG2B成為了朋友，當然唔少得另一群型靚索半島靚太，多得你哋，雀先可以捱過婚前婚後o既難關，期待我哋keep住並肩走上Mother-to-be o既路繼續分享分擔

(2010) 2. 九月轉咗另一份工，對我o黎講都只係由一個位於屯門背牆o既位搬咗去另一個位於元朗背窗o既位，上班的時間有9 成都在盡情上網淘寶煲blogMSN睇MyTV!!! 真係想講一句：雀復何求~~(2011) 2. 十月中開始做咗量地雀，原本好得閒o既工作去到最後呢兩個月忙到飛唔起又成日失眠，原以為係結婚的壓力，但一決定辭職唔駛做，即刻做番個睡寶寶，瞓到流晒口水
我知自己已經好好彩，可以停工專心搞結婚嘢，雖然我哋係籌備咗差唔多兩年，但仲有好多嘢都要去到最後階段先決定得，如果o個段日子仲要番工我估我會忟爆~~
婚後生活係無事忙，仲未加入番勞動人口o既行列，查理斯又成日話唔好搵啦，我養你啦 (你唔好下巴輕輕呀!!!)，又話如果我有咗都唔捨得我要做嘢 (呢個一定要寫低，到時10個月我就un un腳睇你要煮飯洗地洗衫洗厠所~~) 搞到我都係偶然先上網睇o下有無工o岩，我o既目標係過埋農曆年就做番嘢啦，如果真係咁好彩到時有咗就慳番咯~~
(2010) 3. 與同事關係充滿變數o既一年(2011) 3. 成功擺脫過去o既人同事，認識到幾位簡單真誠o既同事，真好~~
人哋話人越老會越圓滑，但我剛剛相反，人大咗，更加唔想浪費時間去同一啲唔o岩傾o既人make friends / keep relationship，越大越任性，這就是(被查理斯寵壞的)雀~~
(2010) 4. 比衰人校長照肺多次，讓我發現自己好"long黎"o既一面!!!(2011) 4. 天網恢恢，疏而不漏 ── 衰人校長o係11月頭上班時段突然比人叫佢執嘢即走，證明咗佢隻手唔可以遮天，但係一間學校已經比佢搞到人人o既黑暗面都浮晒上面，究竟留任o既呢班牛鬼蛇神係咪仲可以專心教育呢？我有保留......
至於"long黎" o既一面，估唔到結婚o個日都要以呢一面示人，詳情待blog~~
(2010) 5. 認識咗一班好好好好o既B2B，尤其係同我一樣o係半島擺酒o既新娘子
(2011) 5. 我永遠都會記得我哋一齊賤咀o既好時光，多謝你哋真心o既分享同埋幫忙，到結婚o個日都係多得你哋掃住背叫我唔好爆我先忍到無爆錯人，無咗你哋o既鼓勵同激勵我點會大獲全勝呢？一齊跳開心舞又一齊呻一齊喪買，之後我哋一齊榮升靚太繼續賤咀，婚宴上一齊喊一齊笑，因為你哋，唔單止豐富咗我大日子的回憶，更多謝敵人太太比機會我參加一個感動到爆o既婚宴，我誠心祝願大家都身體健康，第日我哋啲仔仔女女可以龍蛇混集玩埋一餐~~

(2010) 6








. 
陸續收到B2B的邀請出席觀禮，又開始收到各位靚太變身M2B的好消息
(2011) 6. 輪到幾位靚太出席我o既婚禮，好多謝好感動你哋蒞臨同雀影張相食件餅，仲有你哋o既禮物同自製心意咭令雀愛不釋手，一定會逐一blog番，等我!!!!
好開心第一個分享到少女k有咗呢個消息，諗番起o個啲"打爆你個頭"o既時刻我都仲係忍唔住笑，無幾耐莊巨伯就出世喇，期待佢快高長大快啲識得打爆人個頭~~哈哈~~
(2010) 7. 濕疹狀況持續好轉中
(2011) 7. 感謝主我o既濕疹好番9成，大日子都無翻發，連MUA都嘖嘖稱奇話我啲皮膚同第一次見佢時好咗好好好好多~~~希望濕疹毒素真係遠離我，等第日笨啦啦同菜菜子都唔好吸收我呢啲毒素呀~~ (2010) 8. 金價狂升，到今日已經係$14250!!!! 年頭都仲係$10900 o乍~~
(2011) 8. 金價狂升，一度上到$18900，而家又跌番少少喇，原先以為金價咁貴唔會有親戚送金器，但最後金器o既數目出乎意料之外o既多，嘻嘻，我呢啲手上有貨的梗係望佢繼續狂升啦，wakakakaka~~~ 

(2010) 9. 籌備婚禮過程陸續得獎同抽到獎，屢次開口中令我勁後悔點解唔講話：酒席免費!!
(2011) 9. 睇到呢句，我真係打咗個突，原來我一早已經咁有智慧，呢個願望都算係半實現了，不過過程唔係咁簡單，等我組織一下先分享啦~~
如果我真係開口就可以中，我希望快啲有笨啦啦，等我唔駛再日日望位朋友啲仔仔女女o既相流晒口水~~ (我承認這是比較變態o既行為......)
(2010) 10. 由開初決定結婚到而家剩番唔夠一年時間，由最初想時間快啲過到而家希望慢慢來而家開始煲緊另一個大project──裝修!!!
(2011) 10. 一直到結婚前幾日都仲係好想時間快啲過，可能因為太忙亂了，甚至期望過skip咗結婚o個日即刻到honeymoon，大日子o個日啲時間真係過得好快，可幸我仍然好享受當天每一個時刻~~
原定o既新居仍然放租中(有無人要搵樓住呀?o岩o岩收番番o黎又放緊租喇)，而家住咗o係6299樓上幾層，呢個似近還遠似無還有o既距離真係好好，亦令我哋慳咗一筆裝修費~~
新居好大但樓齡比較舊，要清潔都花咗一番工夫，就算而家每次吸塵拖地抹傢俬洗厠所，至少都要用兩個鐘，仲要做到出晒汗o架，不過做咗人妻就係咁o架啦~~做到好辛苦時我都會諗唔駛租樓住有自己屋企仲有咩好怨呢？加油!!!!
(2010) 11. 2010年12月24日平安夜，我可以去睇劉華演唱會啊~~~呵呵呵呵呵~~~$480飛啦~~~真係忍唔住想對劉華唱番句：台下我說吃粥吃飯還是嫁了做闊太，仍是愛你一世未轉軚~~
(2011) 11. 呵呵呵呵呵，呢個真係應該排頭先o岩!!!! (我再強調，我已經寫咗o個幾千字比yahoo吞咗又唔比番我!!!!)
大家仲記得嗎？繼上年平安夜我睇咗劉華演唱會，2011年1月1日我又睇多場，應該係愛感動天，所以o係我去完台灣Honeymoon回港之際，比我同劉華同一班機，仲比我同佢握到手呀!!!!! 呢個真係發夢都估唔到呀~~~ (幾廿歲人喇......仲發呢啲夢咩......) o個o下o既開心程度比起中任何獎都仲要開心同興奮呀 (如果你o係2011/11/27晚搭CX番港見到有固傻人o係個位度扭身扭勢o個個就係雀喇，上咗機我仲開咗劉華演唱會重溫一次，一路聽一路忍唔住隨住音樂係咁扭啦.....)
(拍低咗片o架，不過都比yahoo吞埋，如果佢真係放番比我我再post啦....) 


(2010) 回望2010，好似"her"一聲咁就過咗，不過仍然為這一年感恩，不同的經歷讓我更覺得我擁有的很多，我有愛我o既查理斯同埋屋企人，就連未來6299都好錫我，呢啲係我o既福氣~~我會好好珍惜~~
2011年應該會係我人生中最值得記取o既一年，好希望下年回顧o既時候仍然覺得2011年會係我人生最想重複過o既一年，今日起我立志要做隻快快樂樂充滿正能量出嫁o既金絲雀啦~~

(2011) 回望2011，又好似唔算過得好快，這一年o既挑戰與試煉特別多，應該專注籌備結婚o既一年依然有好多沙沙石石o既阻攔，可幸，查理斯o既好唔會因為環境天氣而有任何改變，終於能夠嫁比佢，呢個係我最大o既幸福，我相信每一年o既回顧只要有佢o係當中，每一年我都會充滿感恩同埋福氣~~
上年立志要做隻充滿正能量o既金絲雀，婚前o既雀都每隔一陣子就滿載負能量，一度埋怨點解要擺酒？(難為了查理斯要有一千倍o既正能量去化解呢啲怨氣~~)
而家大日子過咗喇，當日係有少少唔順利同埋唔如意，但我真係無擺o係心，見到當日咁多人專誠o黎賀自己，o個份愛真係圓圓滿滿咁塞滿咗我成個人，整個婚禮最讓我回味o既唔係有幾多人讚賞啲DIYs，而係每一個人o既心意我真係收到晒仲轉化成為我日後o既動力tim~~
2 0 1 1 ── 呢一年落實咗最低工資(但唔完善)、派咗$6000(呢啲及時雨一早攞埋又洗鬼晒啦)、n單有錢人爭產案(真係好睇過啲劇集)......

最重要係雀嫁咗喇!!!

雖然唔會記o係任何一份報章上面，但係o係我人生大事o既記事本中，呢個一定會係我一生人中o既頭條！

唔知2012會係點，好多傳聞話會係世界終結o既一年，我唔怕亦都唔擔心，因為無論將來o既日子係點，我都有一個唔算好高大(如果寫肥大唔知佢會唔會想殺咗我呢)但係總會擋o係我前面o既好老公，期望下年回顧o既時候可以加入埋笨啦啦/菜菜子啦~~

祝福各位

明天會更好，明年一定好！