總有失手的雀──佈置篇

由於o黎緊所寫o既vendor review純粹個人用後感，所以雀唔怕開名，就算啲公司睇完覺得唔忿氣覺得係抵毁咗佢，都無法子，因為雀只係將自己o既感受如實寫番出o黎，而感受o麻，好主觀的！

等於有人覺得chok王係實至名歸，但亦有人覺得連佢o係阿皆老街最受歡迎都接受唔到咁，所以，如果你唔o岩睇，唔該過主！

諗咗好耐，究竟Decoration呢部份應該屬於 "很會選擇" 定 "總有失手"，但寫得vendor review都係希望一眾仲o係Blog海search意見o既B2B有所警惕，唔好丟錢落海，所以既然我唔會推介人哋用呢間嘢，都應該係屬於雀o既失手篇吧？



開初Join咗梁品製作為我哋做Decoration，雀仲以為自己執到寶，妄想呢間公司係蓮花，出於污泥而不染，不向錢看又有heart，後來上網睇多幾個comments，就知道雀只不過係攬住舊屎仲自以為香，好幾位用過呢間公司o既Blog友都話"好勞氣"，而我亦都曾經比呢間嘢激到眼坦！

不過，零希望 = 零失望，最後佢哋仲比到少少驚喜我哋~~

先講o下我哋個package先吖，唔駛四千蚊o既價錢，我哋有──

4條磨砂燈柱 + 2條花柱(呢兩樣係唔要backdrop換番o黎o架)
Reception、油畫架、photo album table o既佈置(簡簡單單放啲燭台同鳥籠)
32個大大細細o既假花球
2盞射燈
簡單名牌印製連cut
所有嘢係包晒我兩場(Felix + M2) o既佈置o架，大家係咪覺得好抵呢？

不過令我氣頂o既係有位疑似太子爺o既職員，同佢傾嘢時好似魂遊外太空咁，仲話由Felix搬啲嘢落去M2要收$2000搬運費!!! (佢只係將啲嘢搬入Lift然後按M2就會直達Ballroom，咁都話要收$2000......)

最後一次傾嘢係同疑似太子女傾，呢個就好好多喇，起碼佢個靈魂仲o係地球，而其實對於佢o黎講，我哋唔要backdrop即係零set up，只係需要幫我將32個假花波波放到通地都係就完成鳥，唔知係咪因為佢都覺得太易做，所以我哋要啲咩基本上佢都答應o架~~

不過，咁簡單o既set up佢都係有出錯，查理斯事前已經將個Floor plan比咗佢......(pro到呢......仲以為係特首出席咩活動o既G4特工路線圖)



但佢都係將啲磨砂燈柱就咁放o係地就走咗，好彩發現得早即刻call番佢番o黎搬番上去~~

磨砂燈柱比想像中都靚啲o架喇，有啲暗花紋咁，Felix個場地好光猛好簡單，加埋個城堡放o係中間，我哋覺得已經係好屬於我哋o既個人化wedding decoration了~~

下面o個兩支就係所謂o既花柱，削咗啲但都ok啦，因為就算佢比大碌啲柱，我都唔知放邊好了......

由於我哋唔想花費太多o係佈置度，所以又開始DIY咗好多嘢~~

Felix的人頭椅引起一眾反對之聲，最終我哋去到東門搵人車椅套，RMB$10@，度身訂造，其實都唔算貴了，全場一千蚊有找，再加埋o係笋崗買o既假繡球花，我哋覺得好襯呀~~

仲有一個細細o既Candy corner放埋啲speech bubbles，有賓客話整得太靚唔敢攞o黎食呀!!!!



我哋仲將佢原本擺reception的裝飾品搬晒去前面張長雲石枱，因為reception有我哋o既DIY都夠照啦，至於証婚枱o既枱花就係半島送o既~~


唔知係佢哋職員溝通出咗問題定係佢堅係見到部Lift覺得原來唔駛行樓梯搬啲嘢落去好方便，佢個職員單拖清晒所有嘢落到M2，完全唔駛兄弟代勞，呢個無疑係加分o既項目~~

落到M2佢一個女仔又好快Set up好，原先好似唔包我哋枱布o架最後都幫我落咗粉紅色枱布，very nice~~

其實都真係幾簡單o既佈置，只係將一堆假花波波四散o係地~~

個名牌design係我哋比佢o既，佢只係負責幫我哋印同cut~~

夜晚個Candy corner仲簡單，拆咗日頭排椅啲假花做裝飾，我啲姊妹仲勁到用針吉番個欄門花球上去，好一個中西合壁





半島場地本身已經夠Grand，所以佈置少少都好靚，再加埋我哋啲DIYs，這就成了我夢想中的婚禮場地~~

唔知呢間公司係咪因為我哋呢啲太簡單，佢啲要員同日都去咗做另一啲大project，所以完全無拗數 / 黑面 / 忟爆o既情況出現，同埋事後我諗，唔知佢係咪知我會寫Blog，所以都盡量做好啲，等我唔好寫得太衰，另一個原因，雀好市儈咁諗，呢間公司從來未做過半島呢個場地，如果佢今次做得好(實情係加埋我哋自製o既seating plan同logo先咁match咁靚)，話唔定可以吸引番啲半島BG2B呢(佢賺晒)~~

總括o黎講，如果你有 無限精力 + 冒險精神 + 大量金錢 ，我絕對贊成你搵佢哋為你o既婚禮增添難忘回憶o架！