無心戀戰

今早收到同事的來電，查詢製作成績表的進度，雖然只係好小事，但係令到我心情即刻差晒......

我知同事都只係代老師打來，應該係o個位老師太心急想整好啲成績表，所以要o個位同事幫我做，但其實......啲老師都未交齊資料，點整呀？我比班主任的deadline係12/6，因為要計算學生的遲到次數，而學生的最後上課日子係12/6，其實都逼住啲班主任好趕咁數比我，咁連埋佢比學生的評語及操行先一次過比我，另外都要等第二位同事比埋啲獎懲紀錄我先可以merge，其實啲template都做好晒，真係等埋呢堆資料先merge得，同埋畢業禮係29/6，有無趕到而家要即刻印出o黎對資料呀？

唉.....呢啲老師淨係識"駛"人做嘢，自己無planning唔代表人人都會好似你咁o架，我係病請咗假，唔代表我會唔理你死活唔識分輕重唔做呢堆成績表睇住你死睇住你鑊，我唔係啲咁o既人......不過我都承認自己開始唔會將工作o既嘢咁上心，開始想hea埋餘下o既日子等contract完就算，總之唔好累到同事就算喇~~

原因係大約o係兩星期前，收到老爺(好好人o既副校長，我以前成日都咁叫佢)的google msg.，佢問我有著落未(即係搵到工未)，咁我覆咗封e-mail比佢，翌日一開e-mail，見佢話自己已經答允別的學校做副校長，由6月中開始會o係呢度消失喇，我一睇，真係眼濕濕好想喊......

o係呢度工作咗3年，其實o係度做咗無幾耐佢就好賞識我，好放心比好多機會我做唔同o既嘢，我諗係人夾人啦，好多時我做o既嘢只係盡咗本份，佢都會o係人前讚我，有時遇到啲咩難頂o既崗位佢都會幫輕o下我，上次比校長照肺佢都比咗好好o既意見同埋開解番我......佢曾經同我講過要相信佢係忠o既，但有段時間，我都有輕輕咁懷疑過我有無信錯佢呢？好開心，到最後佢都忠到尾，無打爛我所相信的！

做過幾間學校，好o既老師唔多，而好得o黎又有辦事能力唔係低能o既，就只係得佢一個！睇咗近幾次的教員會議紀錄，我當然明白佢離開o既原因啦，被人逼迫、被人喪鬧、被人誣蔑，我係佢我都心淡我都會走！好複雜的感受，一個真心為學校為學生好的大好人，堅持不下去了，我覺得好心酸，尤其係我曾經成日都聽到佢講佢會堅持做好、佢o既教育理念，想必佢有呢個決定都經過好大的掙扎！另一方面，都好替佢高興，證明有麝自然香，叻o既人又點需要困o係呢個鬼地方吖？

得到呢個消息，令我低落咗幾日，亦激起我要離開的決心！只係仲要同呢班各懷鬼胎的所謂人之患相對多幾個月，希望唔會令我近墨者黑啦~~