又要靚又要好味~~

由於查理斯工作地點好近cake2，所以有次接佢放工o既時候我哋去咗睇睇啲結婚蛋糕~~

我哋揀o個個酒店menu應該唔送蛋糕，所以showcase趁機會問咗半島，佢話蛋糕可以從外面訂，但西餅就一唔得，同埋要先交啲資料比佢睇睇先~~因為佢要同整餅師傅交代，佢會話係因為師傅做唔到我哋要個款喎~~(哈哈，佢老屈師傅呀....其實我哋個cake可能好簡單o架o乍~~為咗佢好交代啲，我諗要整個難度高啲先得喇~~我曾經諗過如果o係半島訂，我要整o個啲最老土最傳統o個啲有個囍字o係上面o既蛋糕，師傅又肯唔肯整呢？)

其實上年都見過cake2做promotion，可以free兩位試食蛋糕，但因為o個時都未諗住結婚所以又唔係好好意思去混桔...而家有咗日子喇，去參觀o既時候見佢仲有呢個promotion喎，雖然唔知最後會訂蛋糕定order啲小食就算，都去食咗先啦~~約咗今個星期日晚去試食，先前睇有blogger試過，有6件唔同口味的蛋糕試食啊~~發達喇~~

心目中有以下的款式都覺得唔錯o架~~你哋又覺得邊啲靚呢？

1. 用花裝飾的蛋糕 (我諗緊o既係....啲鮮花咪要洗到好乾淨先可以用囉...)

2. 用城堡做裝飾的(你哋實話呢個襯晒我哋啦~~)

3. 我最愛的蝴蝶裝飾

4. 有啲其他裝飾的蛋糕

5. 用cake-stand放置的~~啲cake-stand都好靚呀~~

6. Cup-cakes (其實都好靚好多款....但無得切同埋係咪人人都鍾意食呢？)

2010半島showcase

望穿秋水(由舊年11月尾book咗等到而家~~)o既半島showcase終於o係剛過去o既星期日舉行咗喇，我同查理斯都分咗兩場同屋企人去~~好開心仲見到好靚o既blogger Crystal (安、草，我唔係話你哋唔靚，不過...我真係無留意你哋啊...我眼矇矇咁都唔知你哋就企o係我面前喇....哈哈~~如果仲有其他bloggers見到我，真係唔好意思呀...我認人都好差o架...我無叫你係因為你行得唔夠埋所以大近視o既我認唔到你啊~~哈哈...如果今年再有showcase約埋一齊去就好喇~~咁就唔駛認o黎認去lu~~)

入到半島，見到長樓梯寫住話M2有showcase，咁咪行上去囉，上咗半層，淨係見到好多名貴的珠寶店都見唔到有路行，又無指示，咁諗住落番去大堂搭lift啦，入到部lift又鎖住咗唔比按M2，o係大堂搵到個職員問喇，佢話可能開始咗fashion show所以鎖住咗部lift.....(其實到o個刻我都有啲唔耐煩喇，又無指示牌又無人問，搞到我哋行o黎行去......人哋一定以為我哋係自由行o黎混桔囉....)

最後，有個職員帶我哋搭lift到一樓再行上去....(嘻嘻，咁o係部lift入面踩到我o個個係黑豬安定係草先？)上到去，Cocoon show開始咗喇，但係好奇怪...所有人都堆咗o係門口睇，其實根本就睇唔到...啲衫係好靚，但如果有model咁o既身型，應該唔係著cocoon都好靚~~睇咗一兩個model我就已經有啲唔耐煩喇，我除咗睇到model個頭同膊頭，我完全睇唔到佢件衫啊....

半島先前又話唔駛reserve，咁佢都好應該話我哋知Cocoon呢場show係可以reserve ballroom入面o既座位o既，唔駛搞到我哋企o係度又睇唔到......結果我哋決定先去食lunch，食完先番o黎睇啦~~(去咗食蘭芳園，好好味呀~~)

番轉頭開始多人，所以覺得個場地好似好細咁...加上Solomon擺咗好多真花o係度呀，啲花好靚又特別，但因為一早都book咗梁品製作做deco.，所以無好細心咁睇呀~~

呢個係ballroom入面o既setting，個stage的佈置同我哋諗o既好相似，我哋想用銀柳~~個stage藍色唔靚...希望搵到塊白色毛毛地毯鋪o下~~

除咗紅色o個個真係好靚同好有氣勢之外，今年o既枱花好似遜色咗，但枱布又靚咗喎~~細心啲睇吖，淺金色同紫色o個個係靚好多o架，因為枱布上面仲加咗塊紗呀!!!!好特別好Grand~~不過可能佢出年又轉，所以暫時唔關我哋事...

我哋應該會o係呢條樓梯march-in，o係Foyer做註冊儀式~~初時半島都好firm話唔會o係我哋註冊完先set foyer啲枱，佢話咁樣"碌"啲枱出o黎好似酒樓好肉酸，但後尾問番負責我哋o既Connie，佢話如果比到一個鐘佢set-up就照樣可以o係foyer註冊，而我哋就諗住縮o係浮雕o個邊做啦，咁可以直接由樓梯行上o黎，又唔駛阻住佢set-up啦....

個mock-cake都好靚呀~~

仲參觀咗7/F的Garden suite，其實都好靚，加上價錢好吸引，差啲令到我哋落訂book埋呢度做証婚呀...不過後尾Foyer的問題解決咗，加上我怕熱...所以都係放棄咗呢度~~但如果我唔擺酒淨係註冊，呢度一定係我不二之選呀!!!!!

今次睇完場真係覺得「我o係半島結婚」呢個感覺好實在喇，企咗o係個stage望住個ballroom，原來真係每一個賓客都會望我望得好清楚o架...(最鍾意半島ballroom夠光，我呢個近視眼都可以清楚咁望到其他人~~)又o係M2同一樓上上落落咗好多次，好鍾意條樓梯，能夠挽住爸爸o既手o係樓梯行上o黎，我一定會好感動...會唔會未註冊已經喊呢？註完冊仲可以o係條樓梯度拋花球tim~~

希望大日子所有嘢都順順利利啦

繼續頹

之前講到2nd in咗兩份都無下聞，其實其中一份打咗比我，原先我都話唔適合我，turn down佢o既offer，但唔知係我耳仔軟吖，定係好耐都無比人咁賞識過喇，clarifly咗啲job duties之後，尋日仲簽咗約喇，但係，我一啲開心o既感覺都無......

從來都未試過有工請我，但我一啲啲啲啲開心o既感覺都無...減咗少少人工，但係車費平咗，拉上補下，都係差唔多......

可能我唔鍾意啲job duties，所以悶悶不樂......唔明白自己點解唔鍾意又要簽，真係好無聊...

唔知自己想點，只係知道每日都仲要keep住睇報紙、寄信，其實我真係好勤力咁寄求職信o架，不過我都明白當有咗幾年經驗、人工一路路升...其實去到樽頸位...但真係好討厭有啲學校o徒人時間車錢，好似尋日朝早去咗天水圍見interview，約我9:45am，我9:25am去到，足足咗2個鐘先有得in，個miss年紀真係好細，淨係好循例咁叫你用英文介紹一下自己，又話我人工偏高喎....都無咩問過我o既工作範圍...係我自己搵位"攝"入去講啲講啲咁....

人工偏高...我封求職信都寫咗o架啦，你比唔起錢就唔好o徒人時間啦！都唔知佢請幾多人，我坐足兩個鐘，成間房起碼有人20人係o黎面試o架，到11am都仲係in緊9:30am o個批...同一個時間都唔知約咗幾多個人...安排混亂...

不過都好得意o既，等等o下大家又傾o下偈...(我真係好多嘢講o架....成日interview都會撩人傾偈...)

天呀....快啲比個好啲o既offer我啦~~

而家做緊間學校，無良小器校長又發放咗消息，話office要cut兩個人，搞到啲同事都心慌慌同埋提唔起勁...氣氛仲差過之前...其實睇到佢哋咁我都好心酸，更加唔想開口講嘢，想o係個位度做自閉仔...我都明白自己好好彩，仲後生有氣有力走得郁，呢度有啲同事付出咗十幾廿年o既青春，好多電腦技能真係唔夠人爭...如果要佢哋重新搵工，真係難o架...

加上呢個咁o既卑鄙賤格校長話要同佢哋評分，睇個評分分數而決定out邊個，其實評分又係佢評，佢只要將啲零分比晒心中最想out走o既人，所有同事根本上連反擊的能力都無啦...

我只係希望留o係度最後的日子，多啲笑聲、少啲怨氣.....

 

好頹

呢個禮拜都係忙住見工，所以無咩心機寫blog......

多謝各位blogger的祝福、祈禱、念力、咒語，我見的2份工都有得2nd in，但2nd in之後就無下聞喇！好大o既因素係佢比唔番而家呢個人工我，就算我肯減一千蚊，佢都比唔到我......

原先都有啲想做其中一份o架，1st in時個女副校長好滿意，就算尋日2nd in見埋校長，我都覺得佢好滿意我，但係......我已經個心o係度打退堂鼓，覺得就算佢請我我都唔會做！

佢o係短短45mins的面試入面，問咗我好多好多嘢，主要係呢樣有無做過？o個樣又有無做過？最後得出的結論係，如果我真係成功入職呢個"書記"post，我要做：

要帶隊、課後補習、stock-take、 statistics、展板、監管工友清潔用品用量、 訂購清潔用品、校務處文書處理、醫療室管理、圖書館編目、新高中課程支援(包括製作教材、organise外出參觀包括book車、聯絡、收費用、出通告追通告...)

好明顯，呢個會係TA同Clerk的cross-over，我真係好唔想！

而個男副校長早o係1st in時已經講：如果真係用呢個人工請你，真係要諗o下比多啲咩你做喇！你又樣樣都識做！

我真係好討厭呢啲小人！你夠做到副校長啦，逗緊幾萬銀一個月，咁高人工係咪應該教材都自己做呀？點解仲要請TA幫你呢？同埋，用呢個價錢請我，係你哋學校賺晒，唔係我呀！唔好講到好似我著數晒，所以要用盡我咁啦~~真係有好多廢人教師一毛不拔，我出多咗人工又唔係o係佢份糧度扣，都唔明白點解要咁小心眼?!!!!!一聽到呢句說話，我個心即刻對o個間學校打咗折扣！

雖然佢而家都無再打比我話請我，不過都好啦，就算佢打o黎，我都會話有offer唔考慮佢喇~~希望人揀我o既同時，我都有能力揀番人啦~~

另一間係小學o黎o架，我申請的是TA位，但interview時，校長問我有無興趣做書記，因為佢哋都同時請緊人，我當然有興趣啦，2nd in時仲見咗校監同校董，佢哋都無咩特別問題喇，只係話呢個係perm.位，唔知政府比到幾多人工我，唔知可唔可以計番我之前做clerk的經驗，如果唔得，就無得攞番而家呢個point喇，要跌番去起薪點，咁我都話我唔接受跌咁多喇，佢話盡快check咗如果比到我就打比我啦~~不過又係等咗2日都無消息，我心諗都係無希望o架喇~~

雖然有機會in先有機會請我，但而家o既interview真係好harsh o架，首先要做test，一次係20分鐘要做一個excel連圖表、一個ppt.，另一次係15分鐘要做word 表格同打一份testimoninal，第二次o個個我做唔晒呀，不過後尾in時先知無人做得晒，我能夠做好o個份表格及一半的testimonial已經係最好o個個喇~~

所以o係呢段搵工之路上面真係每日o既心情都好似坐住過山車咁上上落落，有時in完會好有信心，覺得自己都仲未outdate，仲有競爭能力，但正正係因為工作能力好，我又唔甘心跌番落去攞個唔ok o既人工......每一日都徘徊o係期望同失望之間......加上查理斯呢排好忙，抽唔到時間陪住我，有時夜晚都只係可以講一陣電話就瞓覺喇，而我又因為隻手再次被不知名細菌侵襲，要食抗生素同抗敏感藥，食咗呢啲藥真係好眼瞓呀......又水腫，水腫又食去水丸，搞到我一個鐘頭去5次厠所，好似索咗k咁，成個人都好瘟瘟燉燉......但o係咁o既精神狀態之下，我而家呢份工卻踏入最最最忙o既階段，同事唔知做咩請咗好多日假，佢啲工怍shift晒去我度，我真係前所未有超級咁忙喎~~我唔係埋怨佢請病假，只係覺得之前我請病假校長就話啲嘢無人做/比咗其他人做，啲老師投訴，咁而家同事唔番又無人會投訴o架喎，梗係啦，我硬食晒啦，仲肯定比原先o個位同事做得好tim......真係好想大巴大巴咁扯呢個小人又小器的校長呀!!!!!!

其實都有諗過，如果呢個PK校長留低我，我又會唔會留低呢？開初都好肯定唔想留o架，但而家又有少少懶，唔想搵工，唔想日曬雨淋......(真係曬到呢....好彩有個縮骨朋友遮o下太陽......)但越來越覺得，留低除咗要考慮日益吃重的工作量，仲有就係一班同事o既真面目，自從好好人o既副校長走咗之後，個個都好似為咗自保而選擇埋堆、投暗棄明、擦鞋......我已經分唔清邊個人可以講真心說話，每講一句嘢都要諗過度過......好辛苦！我只係想要番我原本有o既活力同埋樂天......

唉~~發洩完一輪......要做嘢喇！

其中一個係我~~

呢度其中一個係我呀~~唔知最後結果會係點呢~~

主辦單位會就作品的浪漫(60%)、 創意 (20%) 及 與沖繩有關 (20%) 作評分準則。

是次比賽獎品豐富，當中包括:
大獎一名，可獲獎品總值HK$120,000!

其中包括:
沖繩縣香港事務所贊助5日4夜雙人機票連住宿
Anovia 贊助沖繩夢幻婚禮及婚紗
浪漫一生贊助沖繩婚紗攝影全套及其他豐富獎品

另設優異獎5名：
各得浪漫一生攝影禮卷、Anovia禮卷、沖繩特色工藝品、琉球泡盛酒等總值HK$5,000

*****************************************************************************

後記：

o岩o岩見到6強已經誕生咗，我輸咗喇~~嘻嘻，因為對手實在太強勁喇~~以下就係佢哋o既作品，有繪本、遊戲冊、求婚方法大募集、走過生死的愛情故事......雖然我哋個城堡真係靚，但可能同其他人的心思創意比起來還差少許(尤其係同沖繩係無關o架......)

如果有冠軍的消息我再話比各位知啦~~o黎緊佢會有第二屆比賽呀，大家密切留意o下啦，話唔定下一屆的幸運兒就係你哋喇~~

2010半島Showcase(預告篇)

等到頸都長又等極都無聲氣o既半島showcase終於有宣傳喇~~

今年無invitation、無rundown、無vendors list....淨係知有Cocoon婚紗show(呢個年年都有)，往年好似有個section係for已訂酒席o既新人，今年都無......sales覆咗話walk-in就得~~

等咗咁耐咁期待都係因為......落訂之前其實我真係無仔細咁睇過，連啲新娘房、reception同鋼琴的位置都唔係好記得喇......今次去仲有一項重要任務，因為諗住o係Foyer 証婚，媽咪會幫我整嘉賓椅的佈置，佢想睇o下用啲回文夾夾唔夾到張椅背喎(用o黎夾啲絲花落張椅側)，哈哈，媽咪都好期待呀~~

各位半島新娘，到時見到我記住大聲叫我呀~~(不過我唔係好認得你哋呀......最主要原因係我有近視眼但無戴眼鏡，我真係睇咩都要近近的先唔會矇查查呀~~)

香港半島酒店7月底舉行「2010 經典婚宴巡禮」

 

 

新婚禮服務：「Vows with a View」 (美景證誓盟) 及「The Peninsula Bride」 (半島新娘)。 屆時賓客可以參觀酒店內的三大維港婚禮場地： The Garden Suite(花園套房)、Felix 餐廳及The China Clipper。

當日中午12時及下午3時，還有兩場婚紗及晚裝時裝表演。另一「半島新娘」服務則讓準新人邊於豪華套房內品嚐下午茶，邊統籌婚禮並挑選婚禮服務供應商，期間更可到訪半島購物商場的名店。若於當日確認預訂酒席的準新人，更可獲得東京半島酒店三晚免費住宿作賀禮。

日期：2010年7月25日(星期日)

時間：上午十一時至下午六時

入場費：全免

T/ 852- 2315 3136

W/ www.hongkong.peninsula.com

 

Thermos真空煲大特價

剛過去的星期日去咗都會海逸食Tea Buffet，超讚！(有Haagen Dazs雪糕任食啊~~)

見到都會商場的Thermos做緊以下呢個優惠，所以要同大家分享一下~~

優惠只限7月18日(星期日)，全線Thermos有售，以原價三份一價錢買到呢個煲都真係好抵o架，大家唔好以為要去排隊搶購呀，只要打個電話去分店叫佢留比你到時去拎就得o架喇~~

呢個煲真係好有用o架，o岩晒我哋呢啲要打工又要煮飯o既靚太，因為只要將所有材料煲一陣然後"dum"晒入個煲，夜晚放工就有湯飲喇，仲可以炆雞翼、牛腩tim呀~~(當然啦，如果你係一位唔駛打工o既靚太，得閒睇火，就梗係明火煲o既老火湯更勝一籌啦)

講到咁好...但係我無買呀~~因為......新居有排都未入伙，而家買咗要搵位放呀

後補：

今日去見工途中見到黃埔吉之島有呢個煲O既現貨售賣呀，都係$538o乍，即買即刻拎走唔駛煩呀，同埋pompom紙番咗貨呀，有粉紅、黃同藍~~(不過都係得幾pack咁大把~~)

500 Days to Goooooooooo

距離我們的大日子，還有

500 Days~~

哈哈哈，呢篇blog超hea呀~因為今日真係忙到頭頂出煙呀~~

今晚同查理斯用呢個藉口去食餐好味嘢，回來再同你哋分享啦

各位20111120的姊妹，加油啊!!!!!

職場上的Coach

上兩個星期工作量大增，又斷斷續續咁病，所以都無咩心機update個blog......

之前提過好好人o個個副校長已經遞咗辭職信，6月中佢last day o個日，送咗啲禮物比Office的同事，我收到以下呢款~~

一睇隻顏色，我就知道佢係特別為每個人揀o既，因為我有隻錶係呢隻色o既，o個時佢成日都話我好襯呢啲sharp color，而有啲同佢合作咗好多年o既同事仲收到呢個牌子o既手袋tim......唔係因為佢好多錢，而係佢真係對下屬好好o架，成日都會攞五百蚊請同事食嘢(雖然次次都係我去買)，通常都會請食生果、雪糕咁，佢又試過因為要出去聽seminar，就問定同事o個度附近有咩好食，佢聽完之後買番o黎比我哋食~~最好味o既當然係九龍城o既清真牛肉餅啦~~

遇上學校開放日，同事需要假日番o黎on duty，佢又會請食lunch，叫我哋叫啲pizza、炒粉麵飯番o黎一齊食，之前放工我要趕住出九龍番part-time，佢都會車我出去，真係又食又拎o架~~

但係......以後我哋都無呢啲厚待lu~~

雖然佢走咗，但依然有啲牛鬼蛇神o係度講是講非，我都唔明，人都走咗啦，仲有咩好講呢？呢啲人又無辦事能力又鍾意認叻，真係好討厭呀！

完成咗上個星期o既畢業禮之後，我今日真係"的"起心肝搵工喇，希望快啲有得面試然後成功走人，唔駛再o係呢個地方同啲妖魔鬼怪共事啦~~