敗家敗到廣州去

上星期查理斯要去廣州公幹，住香格里拉呀~~我梗係要把握機會去廣州敗家啦~~

星期五一放工，拿拿林搭巴士番上水過關，去到羅湖，只係知道火車站出咗直行就可以搭和諧號(但實情我係唔知靠左直行定靠右行定係o係中間直行)，行到一半唔對路(我諗行咗百幾米喇)，因為o個時已經6pm，我想搭6:10pm的班次，問咗個酒店counter的女人(我咁唔客氣係因為佢都好鬼晦氣)，佢o係個口嚨椗度發音話我知我行o岩路~~唯有繼續向前跑啦~~(最衰仲要我近視眼，完全睇唔鬼到啲指示呀!!!!)

卒之搵到個售票處喇，買咗頭等票RMB100，結果都係要搭6:18pm的班次，兩班次唔同o既係呢班會停樟木頭、東莞、石龍等地，會多10分鐘~~第一次搭和諧號的感覺非常好~~燈光柔和、坐椅寬闊舒適又靜

7:25pm可以下車了，但我搵唔到香格里拉的shuttle bus，唯有搭的士啦，司機居然要講好價先比我上車，盛惠RMB50，少一蚊都唔肯呀!!!!!

去到香格里拉，果然又新又大又靚，查理斯仲要做嘢未番得o黎，我又勁肚餓喎，唯有坐o係lobby食住薯片先啦~~(個大堂經理巡咗幾次呀，好彩間酒店位處偏遠，咪一陣佢以為我係o黎等老細的應召女郎呀~~btw,應該無o個啲人會o係大堂食Pringles~~)

我就係坐o係呢度食Pringles~~間房個view都好正o架，望落去係濠江同泳池~~

等到查理斯番o黎之後，我哋搭咗shuttle bus出番去廣州東站食嘢，我仲話搭的士時見到間大漁，最衰唔知o個度係咩街啦，點知原來車站隔離個商場就有大漁喇~~真係好似餓鬼投胎咁咩都叫，狂風掃落葉咁食食食，但係食完就知衰喇......因為已經走咗最後一班shuttle，所以要搭的士番酒店，截咗40mins的士先有個好心司機載我哋，仲要成條路都係截的士o既人呀~~奉勸大家一句，廣州啲的士佬應該係萬元戶，佢哋完全唔志在你搭佢車，佢情願吉車來吉車去，或者係咁二攪低個車窗問o下你去邊，但通常去邊都唔載你o架~~crazy!!!!!原先啲人話中國經濟起飛我都唔信o架，而家我直程零質疑呀!!!!!

番到酒店真係超舒適，個花灑的水壓大到好似o係瀑布下面沖涼咁呀，正到痺~~

瞓到七點半，同查理斯落去食個Breakfast Buffet，佢o個份有公司出錢，我o個份有佢出錢，(連加一)RMB150，好抵又好味又多嘢食~~

食完我就番去眠一眠，查理斯就梗係要去做嘢啦(呢啲咪辛苦命囉~~)，我一個人瞓o係 6呎 x 7呎的大床上面真係好難唔碌o黎碌去兼唱番幾句「金絲雀~~金絲雀~~~」

一瞓瞓到11:30am，開咗個電視，就聽到敲門聲~~查理斯is back~~

食埋個杯麵做lunch，就正式展開我哋的敗家之旅喇，第一站係的士去萬菱廣場~~

多謝各位好jm的介紹，呢度有好多嘢睇又有好多嘢賣呀~~(我最欣賞呢個商場o既地方係六樓的女厠見証咗祖國的文明，雖然係踎厠，但好好好乾淨呀!!!!!)

買咗呢啲嘢~~

估啦估啦~~估o下幾錢啦~~

登登登登~~~RMB180.....for 3，分別係$60, $80同$40~~用來放o係半島啲枱仔做deco.就再適合不過了~~仲有好多其他款o架，有啲仲可以換成鏡面變咗一塊靚到好似公主用的鏡咁~~Sogo買呢啲嘢閒閒哋都要二百蚊個啦~~而家係3個呀，抵到我想入貨番香港賣~~(後來發現淘寶都有售，RMB$55-$90)

其實仲睇中咗好多嘢呀，不過查理斯唔比人哋買......話屋企無位放喎 (佢間睡房好逼但係都放咗：一張雙人床、兩座位梳化、書枱、衣櫃、幾個膠箱、大城堡膠盒、兩張電腦椅、人哋比o既絲花兩大箱、一盤鐵樹(!)、一架健身單車(!!)、兩個人哋賣衫用o既掛衣架(!!!)，然後我哋仲可以o係地下一字馬而雙手360度掃都唔會掃到任何嘢o架喎!!!!)，唉.....既然逼到咁.....我都無謂迫佢啦，除咗相架，仲可以買啲咩吖.....咪一陣逼到佢要食零食減壓咪有藉口減唔到肥囉.....

由於有得睇無得買...所以去咗下站好百年~~(萬菱有間賣掛畫鐘同絲花好好好好靚~~下次吖，我一定帶你哋落香港o架!!等我!!!)

打算截的士，簡直係痴心妄想呀!!!!!有唔同國籍(!!!)o既人同我哋爭呀，唉....算....去搭地鐵.....要知道o個日天公造美、降雨淋大地，一個地鐵站的距離都好鬼煩，成地都係污水同埋頭頂有幾多遮.....行行重行行，見到個商場有絲花賣，咪走入去問o下有無我最想買o既茶玫囉，有呀!!!!!廿幾蚊得幾朵o乍.....點買得落手呀？仲貴過花園街伯伯呀!!!!!入咗個商場貢兩貢.....我哋居然誤打誤撞下去到鞋城(批發鞋)，但都無咩心機睇喇，再行前啲就搭到地鐵喇~~

到咗好百年，簡直心花怒放呀~~

係金都的加大版呀!!!!!o係o個度買咗耳環，第一間見係一套連頸鍊的，要RMB170，但條頸鍊太短了我唔喜歡，但佢又唔肯淨賣一對耳環喎.....點知o係第二間見到有，個sales開頭都唔肯單賣一耳環比我o架，但後來佢醒起有客人買走咗條鍊無買耳環，所以而家可以賣比我喇~~RMB50 only~~好閃o架(張相我無加effect o架，普通白光管底下影都咁閃呀~~)就算Big day用唔著，影婚紗相戴o下都好吖~~超鍾意呀!!!!!

都睇咗幾套敬茶茶具，我看中的都是高身的茶壼，有8隻杯的，要RMB85，其餘的都只是RMB58，不過最後又怕自己遲啲睇中第二套，所以無買到~~(實情係查理斯又驚重又驚打爛.....最驚係而家買咗番去又擺o係佢間房吖o麻.....)

行行行.....都見到好多好靚o既婚紗呀~~有件晚裝真係好鬼靚o架~~記住咗佢個款，等第日造租時整件差唔多o既先.....)

然後又買咗布包衫架，有jm買到一個，但我搵唔到散賣，而家RMB30有5個~~桃紅滕波波RMB 0.5一個~~我買咗10個~~

沿途仲見到香港賣到貴一貴的毛毛披肩，o個度白色短褸款只係RMB40，不過未諗好姊妹裙點整，所以又無買住~~

好喇，最後，我哋睇咗訂造姊妹裙的價錢，都只係RMB$110-150，可以度咗姊妹size上去做就得，如果只係買大中細碼o個啲，$100有交易喇~~開頭以為好百年好貴，原來已經好平喇~~

好喇，行到5pm，都無食過嘢，係時候走喇，點知已經趕唔切6:10pm開的廣九鐵路，唯有o係火車站隔離個商場食埋嘢又行咗一陣吉之島先走啦~~

原定8:15pm開的班次，一只係聽到站長廣播話「晚點」，到開得車時已經8:55pm了，等到我想殺咗查理斯呀~~和諧號之所以叫和諧號，咪係因為搭佢先會令人哋關係和諧啲囉~~我講過！我以後一定一定搭和諧號上落~~敗家之旅到此結束~~

(下篇咪又係敗家篇囉....敗家敗到北角去~~)