牆都要著Vera Wang

說真的，Vera Wang的婚紗很吸引，但o係貧窮線邊緣上上落落o既雀無錢亦無好身材去敗一套~~

為咗慶祝耶穌復活+金絲雀重光紀念日，我同查理斯上咗深圳一日遊，o係B&Q見到呢樣嘢──

Vera Wang Wallpaper !!!

飛上枝頭都要著鞋

我對婚鞋o既要求都唔算高，只係一直都唔著慣高跟鞋o既我有啲擔心結婚o個日會趴街(我唔想成為笑笑小電影o既主角)，但係因為查理斯都有番咁上下高，我又想著番高少少等影相出o黎個高度唔好差太多，所以platform鞋係我首選~~

初時想訂造鞋o架，因為我想要Lace + 蝴蝶結的組合，不過後來睇一睇啲價錢再諗o下大婚日後我都未必會著，所以又埋首搵一對現成o既就算~~

我忍!!!

家人，從來都係世界上最親近但又可以帶給自己最多麻煩o既一個角色，整個三月及四月我都無好日子過，為著家中各項麻煩事東奔西走去預備這籌備那，更災難o既係呢個角色吃力不討好，做得好係應份o既，做唔好就捱一頓罵，今晚哭過以後，明天還是要帶著哭腫了豬頭般o既臉去工作，我不斷同自己講，比起電視裏哭到臉蛋比豬頭更腫o既日本人，我沒有不幸，我還可以為這群麻煩的家人張羅著，那些日本人卻連要張羅的對象都沒了，我還是走著狗運的。

老細，從來都係坐住個腦番工、o係你已經夠煩o既時候再狠狠地補多腳o既賤人。在我這些不得不請假去辦事的日子，老細插我：雖然你係可以申請放啲大假，但係你o係上班時間請大假去辦屋企啲私事，咁樣唔好囉，我哋等人用o架！

咁請問邊個係會請大假去辦公事o既呢？

本來已經o係谷底o既心情，比佢再踩踩踩之後，我好想辭職，但諗深一層，還有幾個月就完約了，佢都一定唔會同我續約o架喇，既然係咁，我忍你!!!! (可能佢都o係佢自己間房入面咆哮緊呢句說話，以後人揀我我揀人可以變成人忍我我忍人~~)

我情願佢頂我唔順炒我，我先再搵工啦，而家o既我係唔會同錢鬥氣o架!!!!!(我真係覺得自己呢個諗法好大體好成熟呢~~~o黎緊我要苦練超級無敵厚面皮，佢講咩我都唔會理佢直至佢放棄我~~)

Blogger，從來都只係因為搞結婚先認識o既網上同路人，卻會在每一次遇著疑問時落力的解答，遇上你想買又搵極都搵唔到o既嘢時會話你知，又會細心留意近日我無出post/無覆留言係一定有事，仲會好體貼咁留言安慰同支持，其實你哋o既留言真係成為我近日其中一種動力(原諒我真係無時間無氣力無心機又唔想hea覆大家)，知道世界上連素未謀面o既人都關心同支持自己o既感覺好正~~

manchi說的：你並不孤單！

這一句給了我很大的安慰，也讓我在今朝chok住條氣所以想罷工的早上立刻更新自己的近況，各位B2B，希望我真正的重光紀念日快快出現，到時一定會覆番大家o既留言o架~~

說話泡泡塊

我哋都會學其他B2B咁整一啲speech bubbles比啲賓客攞住o黎影相，

大致上啲句子都諗好咗，

不過會等大日子之後先同各位分享呢一part喇~~

(一來要留個驚喜比會到賀的朋友仔，二來有啲自己覺得都好特別吖，唔想咁快比人用咗~~)

比住其中一個到時一定會整o既大家睇o下先啦~~

我估呢個speech bubble應該都無咩B2B可以照用喇o掛？哈哈~~~

(灰色的地方想界走佢，到時等啲賓客放塊面埋去影相~~)

 

謝雀隆恩

前幾篇都講過我唔會要Wonder Charles唱跳Nobody，呢個除咗係我送比佢o既禮物之外，我亦真心唔想玩寸個party~~(It's my Birthday Party too~~)

要由好幾年前講起，我有位同事係奶奶級人馬娶深抱，佢話當早拍晚播時見到個仔比人迫著毛毛胸圍底褲(原諒奶奶同事覺得比堅尼堅係等同胸圍底褲)、拿起個痰罐飲埋o個啲唔知咩怪獸口水o既時候，佢個心好痛，亦都覺得個仔好肉酸好無面，現場有個仔啲老闆同事朋友，佢直頭覺得個仔以後會比人笑一世，o個一刻，開始動搖咗我接新娘要玩玩佢o既諗法~~

我可以想像得到如果我奶奶見到個仔o係影片入面變咗個諧星，佢塊面應該會黑過歷蘇，o個十幾分鐘o既歡樂大概會為我換來入咗門休想有好日子過o既深宮妹仔生活，所以我好快決定棄暗投明，就算玩都係玩o下o個啲戴個勁cutie大眼鏡同啲兄弟玩o下跳飛機算喇~~

又再後來，見到Blog友幸說：婚姻之事不可兒戲，何必讓人難堪？

呢幾句說話給了我很大的啟發啊~~

由一開始話搞結婚，查理斯已經將呢個"接新娘要玩遊戲"視之為惡夢o既開始，每隔一段時間就會講：唔玩遊戲得唔得呀？

我完全感受到對佢o黎講金絲盛宴o既壓力只有遊戲呢一part~~

咁既然成日口口聲聲話呢個人係我至愛，佢又對我全心全意同埋勞任怨o既，我無理由咁衰仲要玩佢o架(如果唔係，我估我要淘支避雷針先敢出街喇.....)

加上o個日本雀大壽 + 大婚，我就係咁二放條生路佢行，叫佢自己搵啲嘢o黎做攝咗o個啲時間，慕求要令到我又感動又開心、早拍晚播又有啲嘢睇咁啦~~

查理斯，我對你咁好，你仲唔快啲謝雀隆恩？

飛到出嫁日

呢個Rundown其實寫咗有好一段日子o架喇，趁今日長週無嘢做打低佢先~~ (方便有時o係街都可以上網當memo咁睇番吖o麻~~哈哈)

由於行禮時間係1pm，所以當初構思o既時候都係由1pm倒數番轉頭，咁樣好似易預時間啲~~

 

06:00 起床

06:00 - 06:30 梳洗、執番啲眼耳口鼻

06:30 - 06:45 MUAs到

06:30 - 07:00 嘆半島早餐

07:00 - 08:30 我&姊妹化粧

08:00 攝錄到

08:30 - 09:00 我&姊妹拍照時間

 

09:00 - 09:30 接新娘

09:30 - 10:00 斟茶拍照

10:00 - 10:40 往男家

10:40 - 11:15 男家斟茶拍照 

11:15 - 11:45 男家返半島

11:45 - 12:35 半島套房拍照換衫轉粧

 

12:00 - 12:40 兄弟姊妹幫手佈置@Felix

12:30 律師到

12:30 - 12:50 律師Briefing

12:40 - 13:00 招待來賓

 

13:00 - 13:20 証婚儀式

13:20 - 13:35 致謝

13:35 - 14:00 拍照

14:00 - 15:30 食嘢影相

 

15:30 - 15:45 到達M2

15:45 - 16:15 如果唔夠飽，搵人去買啲嘢食~~Hea~~

16:15 - 16:45 換衫轉粧迎賓、兄弟姊妹幫手佈置Foyer、reception

16:45 - 17:20 拍照

17:20 - 19:30 斟茶影相

 

19:30 - 20:00 換衫轉粧

20:00 - 20:05 賓客入席

20:05 - 20:15 司儀&成長片段

20:15 March-in

20:15 - 20:30 講廢話

20:30 上乳豬

20:50 睇早拍晚播

21:05 - 21:30 換衫轉粧

21:45 - 22:05 敬酒

22:05 - 22:20 狂食同埋補影相 (大拿拿成萬両一圍呀，我一定要每樣餸都食啲o架!!!!)

22:20 - 22:40 致謝時間

22:45 - 23:00 換衫轉粧

23:00 - 23:15 送客

23:15 - 23:35 補影相

23:35 - 24:00 執拾、找尾數→變番平民~~