取消資格

仲有2個星期就過大禮喇，即係好快可以做炸彈人，咁早預備派帖係因為之後查理斯公私兩忙，又要收樓裝修，所以o係能力範圍內能夠先KO的我們都會先做~~

近來都開始煩緊賓客名單，其實呢個list 差唔多o係一決定結婚已經開咗個excel整緊，中間不斷咁加加減減，有時delete咗啲人，之後又會加番，加番之後，無幾耐又再delete過，由於中午証婚同晚上飲宴受場地所限，我真係唔可以豪氣地請一百幾十無謂人，不過咁樣反而好，令我仔細諗諗我想要一個甚麼樣的婚禮~~



由於半島真係有佢o既吸引力(我一度懷疑佢o既吸引力同我相比，佢會贏 到 開 巷.....)，從一開始話比人聽我係半島新娘，某啲人即刻會變bling bling眼，然後緊接住o個句一定係：到時記住請我呀，我未去過半島o架 !!! (咁我明白真係好多人無事無幹唔會去半島行個圈，但唔該唔好將我o既邀請咭當成進入半島o既 踏 腳 石吖......)

其實我好想講，只要你有空，半島大門隨時有bellboy為你打開，到時你可以擁抱佢啲英式人像同埋親吻佢o既地磚啊~~

(當你看到大堂排隊等High-tea o既長龍佔咗8成都係自由人，你應該唔會再將呢間酒店神化了~~)

原本都覺得人哋開到聲都要請啦，但越近大日子，我越想出席o既賓客係會將恭賀我哋放o係第一位，又或者o個啲人o係我哋o既成長路上佔著重要一角，而唔係o個啲有日我睇番同啲賓客o既合照，我會指住相中人但抓爆頭都唔知佢叫咩名.....

既然我餘生有9成機會都唔會再同呢啲人見面 / 聯絡，咁今日我邀請佢o黎影張相食件cake佢又會有幾真心"鄧"我開心呢？

好多人都話年紀越大做人應該更圓滑，我諗我就係剛相反的一個，就係因為每一天都是生命的倒數，我實在唔願意再花時間o係啲無交個心出o黎o既人身上，我唔會再慌失失怕得失任何人，因為，我的人生是我的，我只想花時間在值得的人和事上~~~

真係唔想將我哋咁重要o既一日當成一項公演節目，只要至親好友陪著我一同去經歷呢一刻就好了~~

決定了再大刀闊斧咁開番個excel delete delete 再 delete~~

(當然啦，有啲人還是不能說delete就delete，例如老細.....除非你想下個月出糧之前佢將你.....DELETE~~)