滑鐵盧

越接近大日子，陸陸續續就會有啲現實細節嘢o黎打搞我哋，自問我家父母思想新潮開通，未來老爺奶奶更加係零傳統概念，所以一直籌辦婚禮好多嘢都由我哋話事，但o係過大禮一環上卻因家有一老而令我哋遭遇滑鐵盧，細節唔講喇，只求大家用你哋o既碎碎念幫幫我星期六過大禮順利平安過渡！

來到倒數四個月o既今天，雀經歷前所未有o既唔開心，但今日想記低o既唔係當中o既經過，而係呢份唔開心背後o既祝福！

今早在Facebook寫了一句：

「can't help falling in...sadness......」



引來很多朋友的留言問候，又sms又whatsapp的，每次睇到都好感動，忍唔住又流眼淚......

當中有啲識咗十幾年o既好朋友，我覺得自己真係好好彩，無論係以前o既同學，又或者而家o既同事，圍繞我身邊的都是好人，每次唔開心，個個都可以令我好放心將自己o個一刻遇到o既問題傾訴，而佢哋o既支持往往可以陪住我行過每一次o既難關~~

到咗因為結婚而認識到一班blog友，好多連面都未見過、真名又唔知(試過係G2B定係B2B都搞錯晒......)，但你哋o既問候同留言就更warm了!!!

可能好多人會覺得花幾廿秒留個言o者，你唔駛咁感動呀?!!就係因為你哋唔留言其實我都唔會察覺o架，大家只係網上o既友好，交換情報咪得囉，唔一定要交心o既，雀o既感受卻能夠佔你哋時間去問候，我覺得無論你留低o既係幾多隻字都好，對雀o黎講都真係有雪中送炭咁溫暖o架~~

其中一個blog友佢已為人妻喇，private msg.我為我打氣，完全無諗過之餘亦勾起咗一啲回憶，舊年呢個時候佢又係忙到甩碌喇，好多嘢都好煩又好大壓力，當時大家都係留言中呻o下又支持o下對方，然後佢就順利渡過咗佢o既大日子喇~~

今日輪到佢為我打氣，呢個留言比我好大o既提醒同埋動力，每對新人o係最後階段都會遇到形形式式o既問題，但最後一定會順利圓滿咁解決有個開心甜蜜o既回憶~~

我都好想為正處於水深火熱當中o既新人打打氣，辦法總比困難多，婚禮只是一小部份，婚姻才重要，只要兩個真心相愛o既人共同面對，任何困難都總有出路的，雖然呢一刻雀o既情緒亦然低落(明天的病假紙可以填「情緒低落，讓我宅一天」嗎？)，但那份你們帶給我的幸福感正與低落感抗衡，幸福感抗戰勝利的一天雀會再來給大家歡樂的blog啊~~

最後，雀要好好多謝查理斯(每次countdown總有事要謝他，算他走運)，忙碌的工作冗長的會議過後老遠的由港島東跑(正確點說是....打的)來新界北望望雀，好喜歡他永遠眉頭都唔皺一下然後話：傻囡，總有解決辦法的，萬大事有我啊，我好愛你o架你知道o麻？

雖然其實問題的核心唔係雀懷疑佢唔愛我，所以佢話佢愛我係無解決到件事o架，不過呢個男人o係過去籌備o既二十個月當中表現出不怕麻煩肯承擔o既行動，令雀想高呼一萬次：金絲雀萬歲~~

點解？因為係雀8年來無論點都堅持唔放手唔放棄，今日先可以有個好老公啊~~再一次呼歡：金絲雀好嘢~~