欠我的傢俬店

好嬲好嬲好嬲好嬲.......一萬團火呀!!!!!

話說Grandma終於上樓了！(這又是另一個艱辛的故事，有空再分享一下)

於是7月份連日來忙裝修忙買傢俬等送貨，整個過程都尚算順利，還遇上了頂級讚的裝修公司(這個稍後一定會詳細分享)，來到尾站，竟然遇上宇宙最爛的傢俬店！



Grandma一直有佢自己o既Dream bed，廿幾年o黎因為種種因素佢都只係瞓緊2尺半o既床，所以搬新屋佢最緊張o既係佢終於可以揀過張新床，行動不便o既佢為咗呢張床，都走遍咗長沙灣o既大街小巷，終於我哋落實幫襯一家門面好大、裝修光鮮、陳列新穎o既傢俬舖，我真笨，忘了黑店都賺最多的錢用來包裝門面，結果，一肚氣！

我哋幫襯訂造一張上下格床，七月頭落單，女巫話八月中貨到就打比我，由於佢一直都笑咪咪的最佳服務員的模樣，我哋仲落搭幫襯多兩張床褥，整個過程o既服務都好得讓我以為自己錯進了連蝦佛o既貴賓部，不過後來我當然知道這是黑店騙人落搭o既技倆，可憐我入世甚深都中招.....

(胡扯這麼久，終於都入正題喇......)

七月頭落單，佢話要八月中先起貨，貨到會再打電話比我約時間送貨，結果，七月尾某天早晨十一點，雀好夢還正濃，女巫塵小姐打o黎話而家送床o黎，由於間屋都未清潔好，我真係好鬼慌張，我同佢講話而家未有人o係度，要晏多少少安排咗人過去開門先得，塵小姐話"我咪就係睇你幾時得囉，你唔駛咁緊張o架！"，當時我個心已經o係度abcabcabc佢！

約咗下午兩點送床o黎，佢話床褥要遲多一日先有，ok，無問題，照收住先啦~~

估唔到佢啲師傅o黎裝好床之後居然問我Grandma攞利是!!!

師傅話安咗床要利利是是，真係厚顏無恥又賤格，阿婆啲錢都要吼住，從來未聽過咁樣裝好張床要比利是，咁老人家一聽到呢啲求心安o既嘢，都係咁二封番兩封利是比佢哋，後來我忍唔住教育番Grandma，你而家又唔係待嫁姑娘要安床，利咩是o者，一向伶牙利齒o既Grandma聽到就覺得自己笨咗無寸到o個兩條貪錢佬！

翌日一早，我就叫定屋企人要留守新居等床褥，一直到晚上七點鐘，o個間死人嘢都無打比我喎，我咪打去問佢囉，初時我都好聲好氣，點知個職員話：我比運輸個電話你自己打去check啦！

我真係火起，爆佢：你都忽o架，梗係你打去啦，有咩理由叫我打呀？我出埋你份糧好唔好？

佢先話咁佢問咗運輸再覆番我。

結果，又係我打番去催佢，佢先話今日都係得一張床褥送到過o黎，而o個時已經係夜晚八點喇，我叫佢即刻同我送過去，咪阻住我工人姐姐食飯，佢推三推四又話啲人出晒去送貨呀呢樣o個樣，結果我話如果佢半個鐘內送唔到過o黎我就唔要，o黎退錢算喇，最後佢咪又係十五分鐘後就送到過去，討厭！唔鬧唔做！

再接住o個日係星期日，所以餘下最後一張床褥要星期一先送o黎，又話送之前會打比我先送上去，那天我忙住執屋煮飯，夜晚七點我打去問佢究竟幾點先送o黎？因為要搵工人姐姐過去收貨，打去問話八點幾九點送，食完晚飯差唔多九點先醒起點解佢仲無比我o架呢？

結果九點我打去話佢仲無送嚟，佢話幫我打比運輸，到9:10pm我再打咗十幾次去佢都唔聽喇，打埋手提留埋言都唔聽，其實我都預咗你今晚送唔到嚟，你都聽個電話敷衍吓我吖，聽朝除非你唔做生意㗎啫，如果唔係你都係要面對我㗎，點解要撩起我把火呢？塵小姐落單時比咗佢張咭片我，上面有埋佢手提電話，但我打極佢都唔聽，我留言佢又唔覆，呢啲算係咩態度呢？

到星期二一早，未夠十點我就起身再打去，初時又係響爆電話都無人聽，一直都十點零幾分個電話開始唔通喇，即係有人番咗工啦，我話搵塵小姐，佢話未番叫我晏啲再打去就想收線，我即係喝住佢話佢仲欠我一張床褥未送o黎，尾數又收咗，貨又無，我話如果佢十一點都無答覆比我幾時送呢，我就打去消委會投訴 + 生果日爆料，話佢哋呃阿婆錢，一日拖一日，而中間因為無床瞓而影響到的生活同精神損失，我保留向小額錢債審裁追討o既權利！(呢句真係萬試萬靈，當然啦，我唔知係咪可以追討，只係對付呢啲一味靠惡同靠嚇o既黑店，我要扮pro)

難得打工阿姐毫不畏懼退縮，仲話我hold住佢條線佢打唔到去check運輸單喎，good！請到啲咁o既員工真係証明黑店培訓人才係有一手！

到咗死線十一點，都係要我打番去，今次係個男人聽喇，我問佢幾時先送o黎，佢話佢而家即刻送喎，仲串我話怕我緊張過頭所以即刻送，我火起想鬧佢，佢仲寸咀叫我唔駛解釋，係佢欠咗我喎!!!!(事隔咁耐記錄番出o黎都仲係好想大巴大巴扯爆佢個賤咀呀!!!!!)

呢間位於長沙灣青山道近東京街的尾羔傢俬服務咁好，大家記住叫齊親戚朋友比個面，做傢俬千祈唔好煩佢哋呀！