給查理斯的信(三)

查理斯老公：

原來有好多個月無寫過信比你喇，唔係今日周圍左Click右Click都唔記得咗Blog入面有呢個分類~~

仲有唔夠一個月就係結婚一週年喇，估唔到呢一年o既時間好似倒水咁快，仲快過籌備結婚o個啲時間呢！

呢一個月，老婆雀真係唔係好開心呀！



由決定賣樓到買番樓再賣又想再買(大家唔駛懷疑我哋係職業炒家，但因為呢啲o既買買賣賣，雀真係對睇樓有一定硏究，好幾次o係地產舖都比人叫我入行，而我真係有過咁o既諗法o架！) 買買賣賣之間，我哋真係傷咗唔少感情，o黎到最後一刻，大家叫做有共識喇，但雀卻有一啲揮之不去o既難過......

一出世我就係屋企最細o個個，屋企人、同屋住o既婆婆嬸嬸叔叔，全部都係好縱我、好錫我，直程係偏心我就晒我o既，唔公平o既事從來無發生過o係我身上！

直至有一次大約十一二歲，唔知因咩事遇到唔禮貌定不被尊重o既對待，我仲記得當晚食飯時我對住爸爸講咗好耐，又話要投訴又話o個個人邊度邊度唔o岩咁樣，我仲記得爸爸話，你大個啲就知，出o黎做嘢唔係人人都就你o架，當時我仲心諗，總之道理o係我呢邊我就絕對唔會罷休！估唔到時至今日，真的長大成人了，我呢種好聽啲就叫愛恨分明講明白啲就係執著o既性格，仲係一啲都無變。

其實平時o既我係唔容易有呢一面o架，新相識o既朋友都話我無孻女o既性格，但係今次呢一役，我呢啲身為屋企最細o既特性就走晒出o黎，我真係唔識點樣去面對呀，而矛盾o既係，我已經成為咗你家中o既一份子，有啲嘢如果我任性咗，辛苦o既會係你......

可恨o既係我一時三刻真係做唔番之前咁，有啲關係破壞咗就破壞咗，你話係無心又好咩都好啦，呢啲都勾起咗我咁多年o黎大家相處o既日子裏我都委屈過許多次了，今次我真係大方唔起體諒唔到，已經唔係單純只係嬲呢種感覺，如果只係嬲，我相信我反而啖氣一過就無事，而係o個種覺得人善被人欺、唔公平、不被尊重o既感覺我暫時無方法將佢抹走......爆喊咗好多次，唔止o係你面前，有時一個人o係屋企諗諗吓又會無啦啦就喊，就算而家打打吓呢封信諗番起，我啲眼淚都唔知點解係咁流，走番入房攬住你喊咗一陣，但你瞓到gur gur聲，根本就唔知我o係你背後係咁喊......

每當有少少嘢觸動到，我個心都好酸好酸，或者你唔相信，但有幾日我唔開心o既程度係覺得再咁落去我會抑鬱o架，你就當我比屋企人縱壞咗，唔識得點面對啦！我只係希望呢段時間你成日都話你最愛係我、最錫係我，咁就縱多我一次半次啦，好唔好？

下個月就係結婚一週年了，呢張自家製o既Thank you card，我最喜歡的還是那句 "On this day, we promise forever"

願我們能在磨擦同埋磨合間更了解對方，更愛！

金絲雀老婆

寫於瞓唔著o既晚上