漏報之婚禮小手作

搬咗過o黎就好似換咗新屎坑咁，令人身心舒暢~~

好想搵啲嘢o黎寫，但又明白各位忙住搬，應該都唔係幾想睇到雀寫幾千字純粹發up瘋，所以就寫番啲陳年舊嘢，婚禮埋尾時o既DIY，咁就有多啲相睇吓無咁枯燥o麻(我真醒^^)

第一樣唔少得嘅梗係說話泡泡啦~~

與其比錢人整，不如自己動手試試，結論係自己畫好攞出去印係好平，但自己番嚟界就真係搵自己笨，由於多數都唔係直線所以好難界得好，但為咗慳番幾個大洋都無法子啦，影相又唔覺嘅，係攞住影相嗰個人就超覺囉，呵呵…

第二樣就係座位表，查理斯好醒咁o係淘寶淘咗呢兩個木雕花番o黎裝飾呢塊seating plan，由設計到加工都係我哋一手一腳包辦，雀真係夠膽講一句唔輸蝕得過出面搵vendor整o個啲，而又由於唔駛限時限刻交比人印，我哋可以等到最後一刻睇吓賓客名單有無改動先o係屋企用printer print出o黎貼上去，係咪very good先？

 

第三樣係自家製囍糖，比花女o係march-in時派比賓客o既，用label紙印好，界開貼落啲萬樂朱度就得，其實仲整咗"的o答糖"o架，但搵唔番張相，遲啲搵番再post啦^^

 

第四樣o既係整到婚前一晚o係酒店都仲整緊o既枱號牌仔，樣係一籌備結婚就買o架喇，係查理斯o既idea，佢真係好勁，諗到用籌碼o黎做呢樣嘢，不過過程都唔易o架，又要鑽孔穿絲帶，又要搵適合的數字貼紙，不過出o黎o既效果真係好好，仲可以當鎖匙牌作為一個留念呢~~

 

最後一樣唔駛多講啦，就係查理斯自家製的接新娘用開門大利是封，睇到呢度，雀都不禁打個"服"字比佢喇！