十週年

繼續用啲陳年舊嘢o黎呃吓收視先~~

去年11月20日就係我哋結婚一週年 + 本小姐生日 + 拍拖十週年的大日子，當然要大肆慶祝一番啦！(呵呵呵呵呵，過多兩個月就兩週年了，真係快過打針~~)


當時我哋同朋友一齊去咗5日4夜沖繩之旅，番o黎過兩日又o黎一個兩口子3日2夜新加坡之旅，雀唔係擅長寫遊記o既人，大概大家也不會對我從早食到晚o既嘢有興趣，所以跳過遊記直接分享吓舊年我哋預備咗啲咩比對方啦！

雀一直都好想要一個miu miu，唔好問我點解蜜月歐遊時唔買(我為咗呢個蠢行後悔到而家)，有天臨近生日行過Sogo的miu miu打算入去混混桔，試咗幾個唔係嫌款唔啱就係顏色不對(其實最主要係嫌$$$$$$$$)，點知Sales勁醒咁o係倉入面攞咗呢個無display o既紫色出o黎，連查理斯都大讚，結果咪帶咗佢番屋企囉，呵呵~~

呢份只係其中一份生日/拍拖10週年/紙婚禮物，第二樣又係無心插柳之下買咗o既~~

本身係想攞結婚時奶奶送o既石去鑲過另一款吊墜，沿住彌敦道逐間去拜訪六叔，睇咗過千款，最後揀咗心形框o黎襯中間粒圓石，都ok吖~~

心形耳環係我想要好耐o架喇，鑲吊墜時望吓望吓就睇中咗，所以就順理成章做咗我o既生日/拍拖10週年/紙婚禮物喇！

滿以為敗咗兩樣咁貴o既就唔會再收到咩禮物了，查理斯又貫徹佢一向DIY o既作風，靜雞雞整咗以下呢樣嘢喎，哈哈，真係估佢唔到，因為結咗婚同住一屋真係好難搵到時間空間整嘢比對方又唔比人發現o架喎，我就話可以趁佢日頭番咗工整o者，為咗唔比我搵到蛛絲馬跡，佢原來吼我未起身，朝早番工之前匿埋o係厠所(!!!)DIY，呢樣我真係服到五體投地喇，一齊o黎欣賞吓佢又一項o既傑作啦！


有搖控又會變色o既相架......(唔好問雀整唔整到，我連諗都無諗過要整......)

大家讚嘆完未？好喇，最緊要o既梗係留到最後先分享啦~~

查理斯咁有我心我又點會零準備吖，早o係週年紀念前兩三個月就開始整，嘻嘻，大功告成！快來讚雀！

因為係一齊o既第十年，唔想求求其其hea咗佢，於是搵番晒十年以o黎o既相片(仲艱辛過整結婚的成長片段呀)，製作咗一本屬於我哋o既愛情路文庫本，剛好趕得及週年前收到~~

最後一樣，係十年以來一直好想送但一直的唔起心肝織o既溫暖牌，隨住查理斯年紀越大就越怕凍，呢條更像披肩的頸巾真係啱晒佢喇，Yeah！十週年大快樂~~