)
2009年12月18日 星期五
2009年12月16日 星期三
Happy December
12月雜記
******************************************************************************
12月20日要去工展會當值，天文台預告當日係10-14度，今次實凍死喇~~不過好彩有查理斯陪我，如果大家星期日會去工展會掃貨，最好買啲熱嘢o黎比我補o下啦~~我哋個攤位係3A 45
12月23日又去工展會，今次係帶鴨仔家長團去掃貨，希望到時老爺個朋友2號唔好咁多聲氣煩住我......
為咗籌備婚禮，每日繼續online searching，希望唔好搵咗啲黑店黑人到時黑我面
12月中咗一次毒針，但我無黑面喎，因為Santa Claus is coming to town~~
12月24日會同朋友仔開大食會，31號會同查理斯&未來6299去迪迪尼~~yeah!!!!!
各位，12月有好多開心的理由o架，睇o下~~
You better watch out
You better not cry
Better not pout
I'm telling you why
Santa Claus is coming to town
2009年12月15日 星期二
Join 3V @ Expo
星期六下午我同查理斯去咗婚紗展，原本都係諗住行o下或者睇o下香港各大緍紗公司影Pre-wedding要幾錢，咁第一間就係問羅浮宮啦，我哋話比o個個Sales男知我哋有酒樓送的coupon，咁可以再加幾多錢upgrade？點知Sales男一聽coupon已經唔願sell，話我哋平時去門市join都得，點知佢再問我係邊間酒樓o既coupon喎，嘻嘻，我話：都係問o下o者，就快快拉住查理斯走喇，咪一陣比佢發現我混吉咪大鑊？！
因為我哋而家係無任何婚紗公司送的攝影coupon，之但係又見ESD有啲新人會出售佢哋的coupon都係幾百蚊，我哋心諗如果淨係幾百蚊咩錢都唔加，有一輯正正經經、standard的婚紗相都幾好吖~~好彩得到同事葉太的建議，叫我扮有coupon去婚紗展先問價，睇o下左加$右加$底下有coupon同無coupon有咩分別先，如果唔係太衝動買咗張coupon都唔知做咩喇~~因為原來coupon只係包hard copy無soft copy，問過價要$178一張，我又點會咁傻豬比啲咁o既錢呢~~
然後我哋又扮到好有興趣咁去到Spring Wedding Counter混吉，佢賣點係淺水灣獨家攝影，個Sales好落力咁逐項解釋，中途我已經係咁打岔希望問到啲我想知o既嘢就算，點知極盡責o既佢答完我問題之後，居然會話"頭先我哋講到第5點，而家到第6點喇......"，佢張宣傳單上有好多唔係賣點都寫到好似好優惠咁.....例如Expo join會送你"全新粉撲、假眼睫毛"，呢啲都算係優惠？
自己買都係幾廿蚊o者~~
後來查理斯去咗厠所，我拎住啲嘢好重呀，求其坐低咗聽咗一間叫M-wedding的公司介紹，佢哋都係影Pre-wedding o架，係一間好有Heart的公司，雖然最後我同Charles出咗去又入番去睇呢間公司的SamplePhoto，但都懸崖勒馬無放低銀兩，因為價錢實在係貴，雖然呢啲錢都係值得的，因為買o既唔單單係婚紗相，而係創意同意念，但慳番呢輯相的錢已經可以搵阿Jan影多輯Pre-wedding喇，所以冷靜下來都係算啦~~如果你真係好想有屬於自己的Love Story Book，呢間公司真係可以幫到你~~
最後最後，我哋join咗深圳的3V影Pre-wedding，係東部華僑城 + 新影樓的室內(佢特別標榜空中花園都可以影)，由於係會展價同特別優惠，再加上我哋狂屈Sales Ivy送呢樣轉o個樣，都ok唔算好貴啦，而家total應該有118張相，除番開每張相要$55，其實已經比7月會展時貴咗一二百蚊，個sales話由於佢哋剛開咗新影樓，2010年一定會加價喇~~
網上關於3V的評價都係好壞參半，不過差的comments通常都係關於排版，亦有人話攝影師的水準越來越參差，但我哋都叫佢o係單據mark咗唔滿意可以重影，所以都唔太擔心o既~~
不過呢，貪心的我睇咗好多Bloggers的相，都好靚呀，而家仲好想影埋櫻花景呀~~
個plan 2年內有效，所以最快都會2011年年頭先去影喇，我哋都要加油減減肥先喇~~
2009年12月11日 星期五
要假口於人？已經唔係第一次，點解次次都要老爺開聲叫我做？其實我從來都無推辭過吖，你咁做，會令到老爺覺得我好唔願意行出去睇住班馬騮囉......
令人感動的照片
好多新人都會好煩惱大日子應該搵邊個負責攝錄呢個大任務，而我呢，好幸運，找到最好的~~(好大口氣....至少我係咁認為)
真係好偶然o係yahoo見到人哋啲snapshot，影得好好，好的意思係......令我好感動！
有些攝影師的snapshot好恐佈，專吼人哋"擘"大個口、閤埋眼的時候影，真係好另類；仲有呀，有啲standard shot為咗要影晒全部人，用廣角鏡，令到站最外圍的賓客變成肥矮卡通人物般好趣怪，我都好唔鍾意......
單看相片就可以感受到新人的故事，這一點，阿Jan做得到了！
有一對新人，新郎哥住的是唐樓，自小o係唐樓長大的我從來都唔覺得板間房走廊可以這樣美，但在Jan的鏡頭下，一切都變得不同了！
另外，Michael拍的Video，無論剪接、所用的音樂都容易讓人投入，其中有一對新人的video，每次看都讓我眼濕濕
Simple but Elegent and Warm──就係佢哋影的相片表露到的風格喇~~
下星期三約了他們見面了，希望到時他們會帶多一點我未睇過的相片繼續感動我啦~~
http://www.elite-productions.hk/
2009年12月8日 星期二
一個頭十個大
不知是否因為天氣陰晴不定，以致我都唔得寛容.......(唔係因為濕疹呀！已經好番8899了，食咗類固醇，成身的皮膚變得前所未有的緊緻同滑滑呀，我直程覺得連啲頭髮都油順咗呀~~不過呢，類固醇其實等同毒藥，少食都無益......又睇o下可以keep到幾多日啦~~)
在網上看到很多於2011年尾結婚的新人，都開始熱心的為自己的大日子籌備，當然啦，我們都開始了，還要是切切實實的給了一半訂金，所以不是感覺不實在，而是不知從何入手？！
剛才用excel做了個guest list，整o下整o下，唔得了喇
，淨係女家的親戚朋友都有10圍呀，起碼要cut 1/3呀！慢慢用紅色highlight咗啲唔係"好"熟又或者好耐無聯絡的朋友(唉，好怕因為咁樣而得失咗朋友......)，由於有啲朋友仔結咗婚，我哋亦會同佢o既另一半熟絡咗，原本諗住請人哋一家人o架，而家都唯有諗o下先喇......
然後又諗o下預o下派餅咭的人數，由於請得的同事朋友數目真係好少，但都諗住派張餅咭請人食餅，但諗諗o下會唔會人哋以為咁樣要回番禮比我o架？我真係淨係想請人食餅o乍喎......點好呢？
睇睇o下，有啲舊同事同學，我知我請佢佢一定會o黎飲，但係......無咁多位呀......咁係咪要註冊同埋婚宴分番開呢？咁我可以請啲人o黎觀禮然後o係Foyer食少少嘢影o下相......但另一問題係，咁定幾點註冊先o岩呢？唉......一個頭十個大......
人人都話越早準備越好，我有咁多時間，睇怕真係要"攝"高枕頭慢慢諗了~~(結咗婚的朋友仔，比啲意見我吖....)
2009年12月3日 星期四
跑得快過劉翔?
唉......又發濕疹喇......
真係好慘呀!!!!!
今朝去到小巴站已經心知不妙，小巴排隊人龍開始u-turn喇，即刻打番學校同姨姨講我要9點先番到去了！排隊的時候已經覺得周身痕，條頸開始出啲粒粒，又紅又痕，痕又忍唔住"R"，越"R"就越痕，痕又出多啲粒粒，排咗半個鐘終於上到車喇，坐車頭司機位後面，一坐低開車已經後悔喇，原來兩隻手都有喇.....好似風疹咁一撻撻......司機，可以拋我出車等我落車找大夫嗎？無奈架車已經上咗公路，唯有祈求落車的時候無事啦......結果架車越近屯門，我就越痕，"R"到隔離個女仔都怕咗我喇......好想同佢講，我唔係出水痘，係濕疹，唔會傳染o架......
一落咗車，打番去請假，過番對面等小巴番上水......搵大夫......
9點半番到上水，搵咗個新的女西醫睇病，因為佢有皮膚科醫生資歷，上次問過佢淨係星期四上午先o係上水診症，所以今次去搵佢喇......去到，化"行"粧但黑面的姑娘話醫生10:30先番，登記都懶得幫我做，我唯有去食個早餐先啦，咁一睇完可以即刻食藥喇~~
食完早餐上番屋企放低飯盒，番去診所都10:40了，黑面姑娘話醫生"就"到......
哦，唔緊要啦，原來佢呢度有電視睇o架，有線電影台呀，剛開始播流氓醫生，good呀，梁朝偉好靚仔呀~~
(都話靚仔能醫百病o架啦，如果頭先小巴有電視播o下啲劉華、城城MTV，我應該唔會起勢咁"R"......)
登記緊醫生已經番到，好快入咗去睇，佢話好嚴重呀，佢話啲一粒二粒係因為濕疹開始發炎就會咁，佢話塊面都有呀，佢會開一個禮拜的類固醇比我外敷內服......呢個時候開始我已經諗無聊嘢喇，類固醇喎，到時番工駛唔駛驗尿呢？終極我會唔會跑得快過劉翔呢？(不過劉翔係跨過啲欄，我應該要推冧晒啲欄先得....)
醫生比咗2日假我，話食咗啲藥好眼瞓o架，咁抖o下啦......
2009年12月1日 星期二
Confirm booking @ Peninsula
o係澳門番到香港，即刻過去半島，因為約咗Connie (Asst. Catering Manager)傾Proposal~~
去到半島大堂，嘩，好多人呀，成個lobby都係人，好多人o係度high tea呀，都未算勁呀，出現人龍呀，星期一的下午，有咁多人唔駛做可以有錢o係半島排隊等high tea呀，勁呀!!!!!
見到半島大堂已經做好聖誕的佈置，可惜我又無影相，真係好靚呀，銀白色的設計，好襯半島本身的裝修，好warm、好白色聖誕feel呀~~後來問咗Connie，佢話都係佈置咗一個禮拜，佢話今年都比往年早咗佈置，因為周圍的商場同埋整個聖誕氣氛都勁咗，所以酒店都早咗配合，我真係好好好好.......希望2011年佢再早啲做佈置呀，咁我結婚時就好有氣氛，同埋我覺得啲賓客o黎到都會好開心o架~~各位朋友，請努力營造聖誕氣氛，以便半島會一年早過一年做佈置呀~~
基本上份proposal都無咩可以傾，因為仲有好長時間，菜單同酒水plan唔會咁快confirm，佈置每年都會改，我哋淨係問咗啲普通嘢同埋叫佢waive咗projector的費用，$1,800呀~~其實佢話通常都唔收o既~~o黎緊4月會有show case，到時可以去睇o下佈置、set場等等，佢會send invitation比我哋o架喇~~
尋日咁o岩有人夜晚擺酒，三點已開始set場，佢哋擺咗3圍出Foyer，都ok喎，今次實際見到個set-up，個心都安樂啲，就算我哋請多少少朋友都可以有位，同埋Foyer都望到個stage，仲有兩部大電視for睇片，呢對新人無搵公司做佈置喇，一切都簡簡單單，但都好足夠了~~(同我想像中一樣，只要加少少花柱就ok喇~~yeah~~又慳一筆~~)
由於都無咩特別要再問，所以落咗一半訂金同埋簽咗contract喇，無得改期o架喇~~意味住我哋的婚事切實落實了!!!!!(2011年11月20日呀各位老友記，除咗人情之外，記得帶份生日禮物比我呀~~生日卡都得o架)(貪心鬼.......
)
出咗半島，我見到查理斯真係好開心呀，問佢點解咁開心，佢話係因為可以同我結婚喇~~哈哈~~我都好好好開心呀~~接下來要做的，是慳錢同減肥!!!!!!
訂閱：
文章 (Atom)