第2份金器

近來日日都有留意金價，但通常都係$11xxx，尋日一見到$10860，我同查理斯問准咗未來99，放工就去咗買金喇~~

其實之前已經o係銅鑼灣的阿二周生生睇中咗一對龍鳳鈪同埋心心牌頸鍊，上次仲入去同個sales傾過想訂造，因為市面的龍鳳鈪都好細對，佢舖頭有的是直徑1.5吋的，但佢建議我如果會有多一對/幾對鈪(我都想呀.....)就要做大啲(1.6-1.65吋)，免得到時箍住我隻肥手呀!!!!但之前金價好貴所以無即買呀，同埋之前同未來99講我係鍾意周大叔一對新款的，而家呢對手工貴好多o架，所以又要問過佢先(後尾先發現原來未來99一直都係鍾情呢啲款想買比我)

等等等等再等等，見尋日金價係近排新低，放工即刻過海同查理斯去番上次間金舖諗住買啦，上次招呼我哋o既sales放咗假，今次呢個好似未瞓醒，又要等佢o係另一間舖攞對鈪過來，咁試咗就問佢係咪可以訂大啲，點知上次話可以的店舖經理今次居然話：工場收咗工，唔知做唔做到，一係你留低電話，我明天覆你啦！咁我問，你明天覆即係就算做到都要計番明天金價？佢話係喎！

請問我今晚可以打IDD去華爾街搵邊位問o下明天的金價呢？大佬呀，明天我比個特首你做吖！？

就係咁，我哋唯有起身走啦，但係要去另一間分行就要過海去旺角喇，我哋又怕明天金價又升番，所以立刻搭巴士過海啦~~

今次，我哋叫佢比多一對普通的龍鳳鈪我帶埋落去，帶咗2對其實都仲有位可以帶咗1對幼身少少o既，我諗我唔會有3對鈪咁多喇，所以即刻扑搥買1.5吋的就算了！又到我師奶仔上身講價o既時候喇，手工都係由$1180一隻講到$800，尾數o個$42講咗好耐佢先話咁$30啦，我話唔得呀，我哋搭車過海都唔只啦，如果唔係佢分店咁o既服務我哋都唔駛走來走去，咁都幫襯佢，証明我哋係有心的顧客啦！你做生意都係靠口碑啦........個經理見我咁勞嘈先肯減埋$30 o乍......算佢識做，否則我真係會唔買走人!!

由於未來99堅持一定要買一對龍鳳鈪 + 一條頸鍊，我哋揀咗心心牌，但佢舖頭的心心牌太貴重了(真係又貴又重)，所以訂造番個細啲o既，今次個經理只係揭o下資料就已經答到我哋可以訂造，唔駛好似CWB o個間咁左搵右搵都搞唔掂.....

就係呢對龍鳳鈪喇，經我同查理斯混桔混遍港九新界，阿二周生生的手工係靚好多o架，如果第二啲金舖要買呢對鈪就要2.5兩以上先有立體龍鳳，仲要係唔會咁凸o架喎~~多謝未來6299咁錫我，送咁貴重o既金器比我

o黎個近鏡先~~啲龍鳳真係好立體o架~~