杜蟲大行動

尋日我o係屋企展開杜蟲大行動呀！

話說呢兩個星期我對手掌同腳掌生咗好多一粒二粒，我會形容為：痕到跳舞！有時R穿咗會脫皮流水，好似啲水泡咁，嚴重時會流膿，有時覺得痕望o下可能生咗一兩粒，但5分鐘內可以蔓延到一手一腳都係，忍咗幾日頂唔順走咗去睇皮膚怪醫，佢話係蟎蟲上身呀！(我覺得仲衰過鬼上身呀~~)

我話我係愛整潔的小朋友，o係媽咪的嚴密監督底下，一星期一定換一次床單被袋，好乾淨o架喎佢話因為我同濕疹係多年好友，蟎蟲同濕疹又係親戚，所以今次蟎蟲纏上咗我呀！

佢比咗下面呢支嘢我，叫我沖涼之後由頸開始搽晒全身，用一次就得，但要留o係個身8-14小時，所以呢，尋日我就o係屋企進行杜蟲 / 滅蟎大行動，但係.....結果係.....殲滅行動尚未成功，睇怕過2日要再去醫生喇~~

為咗大日子要做個靚靚新娘，近來真係有啲壓力，又要減肥又要整好啲皮膚，就算結婚o個日仲係肥妹鬼，啲皮膚都唔可以一撻撻咁肉酸，所以呢個星期開始咗食洋蔥素 + 綠茶素，o係萬寧買的，雖然顧小培的出品比較出名，但好貴同啲人話好難食(因為係粉狀，我而家食o既係膠囊)，睇o下keep住食兩樽有無改善啦，我o係網上面都見有人話食咗半年好好多，我要努力喇~~

嘻嘻，我又請咗病假，自從比校長狂插完之後，我諗通咗，佢出年都唔會同我續約o架啦，我做咩要咁在意佢o既諗法呢？同埋近日就算我番工都零嘢做，啲老師都無嘢比我做，我又無理由咁多事主動去問佢哋幫手o架，做得好──佢領功，做得唔好──比人篤背脊，不如好好休息，好好休養，9月重新上路啦~~橫掂我今年仲有好多日病假可以攞啊~~