換個好心情

呢排心情都唔係好好，唔知點解突然間會好囉囉孿，好低落，一喊開就喊唔停，壓力都有幾方面o架~~

去咗兩間婚紗舖睇衫，第一間係尖沙咀的四季水晶，其實吸引我的是佢哋o既首飾同皇冠，好靚好閃，但買走要$1500呀！由於係第一間正式睇的婚紗，都比咗$100試咗兩件衫，一件係婚紗，一件係晚裝！雖然係第一次著婚紗，但完全無叮一聲的感覺，亦唔浪漫同夢幻，可能我真係唔太喜歡要用鋼紗的裙(不過後尾諗番我比咗錢，但其實佢無同我著鋼紗，咁叫唔叫試衫呢)，不過佢啲婚紗的釘工同用料真係好靚，啲衫好新淨，如果鍾意清得o黎又閃閃哋的大拖尾，大可以考慮一下，因為都真係幾grand o架~~

至於晚裝，佢介紹咗一條深紫色的百褶長裙，初時我都好抗拒百褶，覺得著咗個人會肥上加肥，但佢極力推介，試咗上身，又真係幾得意喎，原來百褶係唔會著肥人o架!!!!!可能係因為塊布料好重好有垂墜感，反而令到下身slim咗，不過，我唔鍾意o個隻紫色，好老呀.....

呢間服務都幾好，唔算太hardsell，試完都好順利咁離開，仲話遲啲番咗啲大件同埋新款的衫再call我來試，都算係咁啦！

另一間係太子的感恩無盡，由於佢的網頁話有啲大件的婚紗晚裝所以先會上去睇，上到去先睇相簿mark低衫號，然後店員會攞實物比我睇，再一件一件幫我拼上身~~由於我上去o個日仲有另外2批人試姊妹裙同新娘晚裝，所以中間我哋有好多時間o係佢間店周圍睇，吸引我的係佢有個handmade粉紅珍珠皇冠好靚呀！但係要join佢的mua先可以用喇.....講番啲衫啦，唔算好特別，但都叫做有好多唔同類型的款式拼o下，約咗今個星期五free trial 2件，其實都問咗佢造租的價錢，一件A-line 小拖尾婚紗要加$2500，紅色晚裝要加$1500，如果買走就每件大約再多$1000，加錢的意思係你要join package再另外加錢，假設package 5件係$4000，除番開租每件$800，咁如果婚紗要造租就要扣一件再加$2500，即係造租的cost都要$3300(但其實買走都係$3500+)，個店員仲話好抵，但其實造租就唔應該計落package啦~~

另外，之前都講過，因為o係半島擺酒，好多舖頭一聽都即刻海鮮價，真係好唔鍾意咁樣！感覺上，呢間都係咁，不斷提住話o係半島結婚要著得靚啲Grand啲，連查理斯都感覺佢係覺得我哋擺半島=有錢人→而想我哋加錢造租......不過無法子啦，鬼叫自己肥咩......但始終提唔起勁減肥......

見到有啲bloggers真係好努力 + 有恆心減肥，我都幾"忟"自己咁懶，差唔多每次同朋友講起我出年結婚，講講o下一定會問，咁你會唔會減肥呀？咁你想我答你咩呢？

如果我話唔會，你會唔會啞咗呢？

但通常答會之後，又會被追問有咩計劃呀？

而家我開減肥班嗎？要將我的減肥大計上市嗎？點解要有詳盡計劃仲要向你哋交代呢？好似唔減肥就唔可以嫁咁.....我無歧視你瘦，你都唔好針對我肥吖！

睇到有啲新娘好豁達，肥就肥啦，佢娶o既又唔係我的磅數同脂肪比例，只係想開開心心做個快快樂樂的新娘，真好羨慕o架！就算我做到咁豁達，我家同查家老媽子都唔會容許我咁樣囉.......

邊個話結婚係兩個人o既事？！

仲有我啲濕疹，反反覆覆，都唔知想點！戒口真係有用咩？問題係，我家媽子唔會煮牛肉、海鮮o架喎，而我出街食飯都唔多食呢兩樣嘢，牛肉都會有，但海鮮......真係好少！我覺得我的濕疹係因為唔夠瞓、病食咗西藥、天氣問題先會發，尤其係後者，咁我真係無法子o架喎！唉.......朋友，你哋真係會比我更擔心o係我大婚之日我的濕疹發作嗎？如果唔會，就唔好comment啦......

當然啦，有啲同事、朋友真係從關心的角度出發，佢哋會比啲實質的建議我點減肥同幫我戒口，對於呢啲朋友我真係心存感激o架！

另一方面，呢排o係學校差唔多係零工作，日日都係坐o係度上網睇blog、online searching、taobao，有時真係覺得自己幾冗員o架，但我又唔想主動問人攞嘢做免得拿屎上身喎！加上諗到過埋呢個學期佢都唔會同我續約o架啦，即刻就無晒動力做好啲，因為無論係讚定彈，都唔需要上心！

但，難過o既係，學校o既氣氛，有90%的同事都係衰人、小人、怪人，特別係有啲人唯恐天下不亂，做少少嘢就大大聲呻，今朝一番到o黎，我袋都未放低，A面同事又呻，好煩呀！忙係你自己攞o黎o架，人哋o既讚賞已經係你最大的酬勞啦，你都係想要呢啲嘢o者，如果你仲唔滿足，我駛唔駛為你鼓掌呀？好大程度你都係想人哋知道你多嘢做，搞到好似番工得你一個做嘢咁，既然你咁忙，就唔好再拍膊頭接晒啲嘢番o黎啦唔該！

一聽到A面小姐呢啲負面說話，令到我好沮喪，你話啲人搞風搞雨，你自己都係啦，五十步笑百步！唔該唔好再打我哋毒針啦!!!!!!!