真小人偽君子

今天，是我工作的學校一年一度的水運會。

好好彩，今年我唔駛去游泳池暴曬，正所謂偷得浮生半日閒，今朝梗係買埋早餐番學校食完先開工啦~~(其實我朝朝都食早餐，只不過平時o係自己個位食，今朝上咗去Staff room的大檯食)

雖然買埋早餐，但都係準時9點簽到，好彩無遲到~~(自從上次比佢話完之後我真係一次都無遲過到喎~~)

上咗去教員室之後，同事Baby話校長番緊o黎(有咩理由唔留低睇學生比賽？開幕完就走番o黎.....晏啲又再去會場，又唔近，佢又無私家車.....大家睇埋落去就知點解喇~~)，因為都估校長會上來巡視，所以我哋匿埋o係擺電腦物資個房仔食，我諗食咗20分鐘啦，就一齊番去自己位做嘢喇~~另一個同事仲話我哋知校長真係上過去望咗兩眼呀~~我哋仲心諗：哈哈，估到你啦~~

往年o係水運會之後，所有老師就可以放半日假(其實都無半日啦，1:30pm先完，平時4:30pm都放工啦)，今日，所有老師完咗之後都要2:30pm番學校開會，因為好似今日揭曉7位超額教師的名單，可想而知班老師o既怨氣有幾咁大.....

一開會，校長居然話：今朝想返來睇下啲TA有冇遲到，見到都無人遲，但好奇怪，佢哋又唔o係個位，最後又一齊出現......(當時我唔在場，有老師講番比我哋知)

佢咁講，我只會覺得：

1. 佢好小家、賤格、低裝，咁做都係想話比啲老師知我哋偷懶

2. 佢放棄鼓勵 / 欣賞學生游水， 就係為咗番來睇我哋有無遲到，究竟教育的對象係邊個呢？

3. 好彩我唔係工作緊o乍，原來佢睇到我唔係坐o係個位度就懷疑我哋蛇王，如果我真係做緊嘢，咪好蝕？

4. 平時OT佢又睇唔到？

5. 校長，一校之長.....器量如此，如何做到教學相長？

我要努力搵工，脫苦海呀!!!!!!

**********************************************************************

尋日放工之後同兩位好同事去咗食飯，傾咗好多嘢，亦大約知道咗係邊7個老師被裁.....

當中有啲人係抵死，但大部份都係盡心盡力盡責而又有好多年教學經驗的好老師！不過好明顯，佢哋係唔識擦鞋的老師！

佢哋有禮貌、準時交文件、唔卸膊，最重要o既係佢哋對學生好好。舊年有個被裁的老師，有一次我o係巴士站見到佢，佢話佢要去柴灣o個邊間IVE上堂，咁我話你搭呢架車唔係過海o架喎(我哋o係屯門工作，要去柴灣，佢要搭過海車轉地鐵)，但佢話：啲學生o係黃金(深水步)買咗啲嘢又唔o岩用，買錯晒，我幫佢哋攞出去換啦，佢哋好少出"城"，咩都唔識，見都係順路就幫o下佢哋啦~~

雖然佢好似踩緊班學生係鄉下仔，咩都唔識，但我卻睇到佢係真係對學生好好，佢本身番咗朝8放5，仲要老遠由屯門去柴灣，上完堂又番屯門(佢住屯門)，差唔多係由島的一端去另一端，中途佢唔介意比多啲車錢、舟車勞動去幫學生換番o岩佢哋用o既嘢......校長睇唔到佢o既辛勞、付出，只係睇到──校內各項評分項目佢攞分數好低......見到有學生吸煙又唔罰佢哋，所以，佢要out!!!!!

我從來都唔覺得罰可以改變學生的諗法，改變到o既只係一時三刻o既做法，反而循循善誘、言行身教對於一個細路o既成長真係好重要！我覺得如果一個畢咗業o既學生講番母校o既時候只係識講：「o個個老師好變態...點點點罰我」、「我o個次做咗咩之o麻，佢記咗我小過」、「啲老師無個好人」......呢啲係學校o既悲哀！

對於一個學生來說，一個好o既老師可能比一個好o既家庭成員的影響佢更多，一日番學番8個鐘，見老師o既時間仲長過見屋企人，係咪真係o下o下要罰到個學生唔番學連教好佢o既機會都無先安樂？

現任校長成日話舊校長搞到呢度有包容文化，包容唔等於包庇，包容係美德，有咩唔好呢？至少舊校長未退休o既時候呢度氣氛唔係咁吖！睇到教咗幾廿年o既老師被打壓，資歷淺o既步步高陞，都真係幾心酸o架......

有件事真係想同大家分享一下：

有位新的訓導主任一朝得志、語無倫次，未升之前我同幾位同事都覺得佢ok o架，後生仔但做嘢幾交帶幾好吖，點知升咗之後真係以為自己一人之下，o個啲臭檔嘢真係勁呀！

話說前兩個月我上咗外星打工(去圖書館頂替同事的工作一星期)，呢位新主任上到o黎話想借書：

新仔：呢度有無啲英文故事書o架？

外星人(圖書館負責老師)：有！o係晒呢排書架度，你睇o下吖！

新仔：mc win呀，你o係度幫手呀？咁你係咪可以幫我搵書呀？

外星人：佢唔熟o架，你想搵咩吖？我幫你！

新仔：(睇咗一陣)嗯....有無啲呢.....淺啲o既故事書呀？即係o個啲三隻小豬呀、適合瞓覺之前講o個啲呀？

外星人：有！(帶佢去另一邊書架)呢啲就係喇！(注意：外星人講嘢完全係斬釘截鐵肯定feel，所以要用感歎號~~)

新仔：(用隻手掃一掃排書，然後攞咗一本書出o黎揭兩揭....)....即係呢.....我借呢啲書係想番去比我個仔瞓覺之前同佢講故仔o既，但係你呢啲書呢(再用隻手好似好嫌棄咁揚o下)...真係好污糟呀，你知啦，我比個仔睇o架o麻，你咁樣，佢揭o既時候吸咗啲塵就唔係幾好啦！有無啲乾淨啲o架？

(聽到呢度，我個心真係爆粗，你個仔咁矜貴呀，你諗都唔好諗借啲書比佢睇啦，連去買新書都唔好呀，因為新書由印刷到釘裝再運去書局放o係書架等你買之前，已經有n咁多個人掂過呀，都係污糟o架.....最好o既方法係，新仔你買本畫簿，一路講故仔一路畫，講三隻小豬咯，咪即刻畫三隻豬囉，再唔係攞定你一家三口幅相，貼落本畫簿度咪三隻豬西囉!!!!!仲有呀，個仔大個咗唔好買報紙比佢睇呀，報紙咁多油墨....仲有呀，銀紙都唔好用喇，乞兒都掂過o架!!!!!)

(呢個圖書館o既書係我見過最乾淨o架，因為負責圖書館o既工友每日都要抹書，抹o既意思係成排書架o既書攞落o黎逐本用塊布抹乾淨)

外星人：啲書係咁o架喇，o係晒呢度，一係你睇o下有無o岩啦，如果有，你攞出o黎我叫工友再抹乾淨你先借啦....(睇o黎外星人今次都遇到強敵，所以語氣無咁倔喇，無得用感歎號....但係外星人的涵養功夫一流，咁都唔黑佢面!!!!!)

結果：新仔睇多一陣就咩都無借走咗喇~~

呢個新仔最近又有多單笑料喇~~

話說有日佢同另一位老師見學生家長，個家長抱咗個幾個月大o既bb o黎，佢居然抱咗人哋個bb周圍行，猛咁"aun ko ko"咁撩個bb，由於佢呢個舉動實在係太太太奇怪喇，所有office o既同事又唔鍾意佢喎，所以全部人都dup低頭做嘢無理過佢，唔知係咪佢無癮覺得我哋落佢面，佢竟然！係竟然！抱住bb入咗校長室叫校長同佢一齊"aun ko ko"喎，結果係兩個男人o係校長房玩bb囉~~擦鞋精，駛唔駛扮有愛心扮到去校長房呀？你自己屋企都有個b啦，睇o下你又幾時攞番o黎比校長"aun ko ko"~~

(不過，校長一定一定一定要，洗手洗手洗手！)