GoldGoCrazy

今日係值得紀念o既一日，因為，金價已經升到$12240喇~~

早前因為自己一時口快快，同"女麻女麻"講咗擺酒o既事，搞到大家心裏也不快.....

自從o個日之後，都有整個月無聯絡，心想著等事情再丟淡些才找她吧！結果o係我從巴士碌落o黎o既第二日，我打比佢，佢聽到呢個消息就咩嬲怒都唔記得晒喇，淨係連續幾日每隔幾個鐘就打o黎問好番啲未？雖然肉體係好痛，但係心入面真係好開心同埋好warm，覺得自己終於變番受家人寵愛的小公主喇~~

星期五仲同佢出咗去食飯慶祝母親節呀~~

席間，查理斯未到，爸爸問我：你哋結婚，你想要咩做結婚禮物呀？買對龍鳳鐲比你好唔好呀？你要新潮款定係傳統o個啲呀？

我話咩都唔駛買比我喇(其實我個心好想講：我淨係想你哋開開心心咁出席我的婚禮.....其他物質上的，我唔需要喇....)

爸爸再問：咁查理斯呢？送咩比佢呀？佢鍾意啲咩o架？

我諗咗兩秒，然後毫不怕羞咁話：佢鍾意我囉！

我爸同家姐個樣即刻而我工人就笑到塊面紅晒~~佢哋都頂我唔順呀~~

後來查理斯o黎到，爸爸又問佢：你哋結婚，你鍾意咩呀？我送比你吖！

查理斯立刻答：鍾意阿妹囉~~~ (我屋企人叫我阿妹(音：mui)o架)

一聽到呢句，我真係開心到拍晒手掌呀~~

我爸就話：唔怪得你頭先係咁send sms啦，你肯定通水啦~~

嘻嘻，梗係無通水啦，我哋心有靈犀呀~~

爸爸，你唔駛質疑亦唔駛擔心喇，呢個查理斯會對我好好、照顧得我好好的，放心好了！

食咗呢餐飯，真係放下心頭大石，雖然無再講起酒席的問題，但係我知道家中各人都對我的婚事表現雀躍，不斷的討論著要穿戴甚麼、訂造甚麼，同埋，要快啲買金器比我.....雖然我話而家啲金價係咁升，太貴了，不如等o下先啦，但係爸爸話長遠o黎講，金都係保值的，無咩話分貴同唔貴o既~~

我真係知道孻女孻心肝，所以人人都好錫我，連家姐都諗緊會唔會有嘢可以買比我......其實真係唔需要喇，我只係想睇到你哋好開心咁笑住送我出嫁，這就是我最寶貴的回憶及禮物了！

飯局翌日，鑑於我怕

1. 金價太貴，佢哋太衝動

2. 買咗我唔o岩戴 (第二條頸鍊要加長好多先可以唔遮住第一條喇...加上我隻肥手，我怕到時戴唔到對鐲呀....)

所以我打比"女麻女麻"再三強調而家金好貴叫佢哋唔好衝動，點知佢話爸爸自己去咗睇喇......

"女麻女麻"仲話佢結婚o個時啲金價係百幾蚊一兩o乍~~(如果阿"女麻"仲有keep住啲金，真係發過發哥咯)