一年半

今日係Big day倒數一年半的日子，距離婚期又近一步，真係開心喇~~

籌備咗半年，其實所有要預訂o既嘢都七七八八了，只是很多要DIY的items還未開始製作，心入面有很多o既idea，希望真係可以逐一逐一整出o黎再同大家分享啦~~

有好多新人會o係好多items上各持己見、吵得面紅耳熱都係為咗要令對方聽自己o既意思，但係我越來越發覺，你愛佢.....你就唔會捨得同佢爭論！

呢半年，非常感恩o既係，我哋無為咗婚宴的各個項目而有爭拗(查理斯睇到呢度個心應該會話：梗係啦，我"就"晒你o麻~~)，亦都因為籌備結婚就好似大家合力做緊一個大project咁，感覺像回到大學時期一齊為Christian week各項事工而努力咁，雖然有灰心氣餒、情緒低落的時刻，但係，我們都一一走過去了！

另一樣奇妙o既係，越搞越多嘢就越會發現，查理斯真係一個好值得嫁o既老公，佢有耐性、細心、有計劃、"就"得人......最緊要係，我發覺佢真係好錫我！

我係一個滿腦子鬼主意又成日改變主意o既人，但佢通常都"由"得我，只係會講：

「你唔睇定啲先呀？我怕你到時後悔又唔開心o乍。」/

「唔緊要啦，你鍾意就買咗先啦，到時唔鍾意咪再買過囉！」

因為時間尚早，所以我們尚未到趕頭趕命o既重要關頭，有好多嘢都仲有商量的餘地，我希望今日寫o既呢篇嘢，會作為我呢年半o既提醒，要keep住好心情去為我們的大日子加添更多美好甜蜜的回憶！