最強組合

呢篇blog真係隔咗太耐先寫喇，無法子，天生太懶.......

好耐之前就已經confirm咗場地佈置公司，那又是一次鬼掩眼勁衝動之下做o既傻事，初時join咗仲覺得自己好醒扮勁，其實做咗豬頭丙~~

一直都唔知自己係豬頭丙，直至第一次bloggers聚會，頂好新娘子(有班外星姊妹o個個呀，不過好心有好報，佢結婚o個日好靚吖又都算順利呀~~)講話百利有間no good佈置公司，叫我哋千祈唔好join，一聽到我仲心諗：唔會係我o個間o既，我上網search咁耐都唔見有差comments同埋佢啲製作咁大型......

都未諗完(!)，佢接落o黎就講咗我join的佈置公司名，我即時從心發出口o既反應係：呀頂.......

然後佢就講咗佢o既遭遇出o黎，雖然又唔可以話呢間嘢係黑店，但真係唔係好囉！

最慘o既係我哋已經join咗basic package $3900 + 額外加一棵即插龍柳枝$1300，落咗一半訂喇......

咁但係當時都安慰自己，早啲知道佢有問題都好o既，咁我哋跟緊啲囉~~

o係去睇Felix個場之前我哋就去問o下呢間嘢，如果我哋想加多少少佈置o係Felix，主要都係用番basic package啲嘢(因為我哋唔要backdrop，佢轉咗6對橙柱 / 花柱比我哋)，問佢搬上搬落要幾錢？佢話約$800，咁我哋又問如果唔要o個啲龍柳枝咁$1300可以轉啲咩？佢話1對高身花樽連假花喎......

然後佢見我哋個樣好似唔係幾同意咁，佢居然...係居然(!!)提議話$1300可以將我同查理斯個英文名頭一個字母整個立體字，大大個放o係面張雲石枱，再搵啲spotlight射住對字，隔離再放少少假花呀蠟燭呀就好靚喇!!!!!

我根據佢即場手畫o既圖做咗現場效果比大家睇o下，你哋就知發生咩事喇！

我哋個名各取第一個字真係全宇宙最強o既組合呀我唔想啲賓客入來時以為o個度係厠所呀!!!!!

仲要搵啲燈射住呢個厠所名，crazy!!!!  (就好似英國王子同佢未婚妻一樣，人哋發現咗呢樣嘢都即刻改logo啦....)

最頂癮係佢完 全 唔 發 覺呢個組合有問題(!!)，仲不斷游說我哋採納佢o既建議，佢梗係想我哋用啦，$1300界舊發泡膠比我哋，多謝晒喎~~

後來因為睇過呢間嘢插o既龍柳枝實物，除咗用"驚恐"o黎形容，我實在想不到其他形容詞......佢插到棵嘢勁似人哋年廿八掃屋o個啲掃把呀!!!!! 一啲都唔係佢show比我哋睇o個啲相咁呀，可惡!!

就係因為咁，我哋對呢間嘢失晒信心，仲開始四出搵其他佈置公司，最壞o既打算係撻訂就算喇.....(雖然只係諗，但啲肉都赤赤痛......)

但係坊間o既佈置公司又再一次因為我哋book o既係神級酒店而報一個神級價錢比我哋，最離譜o既係16張行禮用o既排椅側邊夾一小紮假花束要$2688-$4388，我想像到如果用$168買假花夾排椅，o個束假花應該可以比一個地球儀還要大，有人會覺得每張椅上有一個地球花是漂亮的嗎？

印象比較好o既係Monarch，佢知我哋同一間酒店有兩個唔同場地要佈置，但大置上都會用同一堆o既佈置品，佢初時都話可能要加少少搬運費，因為師傅要駐場等候另一次的setup，但後來佢幫我哋夾過個時間，話因為上面完咗緊接住下面setup，咁可以唔駛加錢都得，就算係加都係約$200，我哋都覺得佢哋helpful同埋明碼實價，不過因為啲肉赤赤痛提醒咗我哋唔可以輕舉妄動，所以無join到

思前想後都係番原來o既佈置公司再睇o下佢哋可唔可以唔加錢 / 加少啲錢搬上搬落啦，去到，今次唔係一直同我哋傾開o既女士，而係傳說中好討厭o既太子爺，咁我哋又問佢如果用同一堆佈置品做完Felix再放去M2要點計啦，佢話要加──

$2000!!!!!! 呢個價錢係令人噴火o既價錢!!!

我哋話上次佢個職員話$800 o乍喎，佢話唔得喎，咁樣要有人o係度等再setup，要計番人工同搬運費，我話咁搬係搭lift又唔係要你行樓梯，你會唔會收得太貴呀？

佢都堅持話係正常價錢，要留低個人o係度拆同埋setup，阻住佢去第二度做job，我即刻捉住佢呢句說話：咁即係因為個人要駐場所以要加咁多錢啦，咁我哋自己搵人搬啦，你上晝set完一次，可以走人，下晝完咗証婚我哋會搬好晒啲佈置品落M2，你哋再番o黎setup啦~~

就係咁我哋成功慳咗呢$2000，但查理斯又打蛇隨棍上，問佢咁我哋而家都用唔著龍柳枝喇，可唔可以唔加錢要呢樣嘢呀？

估唔到呢條友居然話ok仲開過張新單比我哋，我哋再成功撈番呢舊原本跌咗落海o既$1300~~yeah~~慳番呢堆錢我哋自己買啲佈置品好過啦~~

呢次我哋仲唔係最強慳錢組合──厠所俠侶~~