婚展倒水記

尋日又凍又落大雨又無地方好去，結果patpat痕就去咗婚展喇~~

等唔到人帶我哋入場，所以比錢買飛，仲以為比錢買飛會多一堆coupon，點知全部都係試酒券，o車...有等於無，後來又諗住好啦咁去抽獎啦，以為佢6pm抽，點知原來係630pm，那一刻我哋對腳剛好踏出個展覽場門口，哈哈~~我唯有幻想自己已經中咗大獎啦~~

言歸正傳，今次去係知道我個mua會擺檔，打算入去落訂join埋佢哋o既姊妹化粧服務(之前已經同佢提過兩次，但係佢猛話叫我結婚o個日先比佢喎)，佢仲話已經mark低咗會預人o黎幫我啲姊妹化，但而家搞到我好迷惘呀，張單無寫過，訂又無比過，連要化幾多個姊妹佢都無問過呀，咁佢點知預幾多人o黎幫手呀?!!!! 唉，不過佢好似點都唔想收錢住，咁我唯有信佢啦.....(天呀，呢個環節係我承包各姊妹o架，千祈唔好失場呀，咪好似我呃人咁呀.....)

下一站去咗Kinetics，join咗$1388的婚前檢查，比過年前貴咗$100 lu~~但今次有個優惠好抵呀，打預防子宮頸癌疫苗可以減$300，我已經o係星期六完成咗呢3針喇，好彩3針係一針比一針唔痛，又無腫咁，姑娘都話我好彩吖(佢話佢痛咗5日呀)~~

然後到名帖，比咗$300訂金hold住價錢 + 8折，仲可以攞走以下幾款參考~~

我哋攞o既主要都係有凹凸紋 / 加咗UV / 燙咗磨沙金，如果印300張約$6.6@再有8折~~仲會送回禮利是封同埋貼紙~~

再之前一次婚展其實我哋仲同新翹行訂咗一箱紅酒tim~~趁今次寫埋啦~~

話說入到婚展好口渴，見到有人比嘢我哋試飲喎，咪試o下囉，佢話係果汁酒呀，仲話可以自己參與釀酒過程，好多新人仲用來做回禮禮物呀，我呷咗一小啖即刻，.......又話係果汁酒......但都酒到不得了呀!!! 睇o下個價錢都千千聲o架，所以我哋極速離開咗呢個攤位~~

然後見到新翹行，我記得呢間嘢都好好comments o架，佢個職員又好有禮咁招待我哋，所以我哋就試o下啦~~

個職員係後生仔o黎o架，但都好好服務，首先問我哋平時有無飲開酒？我哋話無，佢就攞咗啲最易入口o既比我哋試，其實呢，我真係一啲都唔鍾意酒味，少少都覺得難飲，但佢每次都會斟2小杯比我哋試，佢話一場o黎到一定要咩都試o下喎，原先佢第一隻比我哋飲o既都好勉強入到口，但後來越試越惡頂，有啲佢話有果木味o架喎，但我條痢真係唔多喜歡佢，但個男仔都超有耐性咁推介唔同o既酒比我哋，又細心解釋擺酒唔駛買啲最靚o既(除非你有特別要求啦)，每圍大約預幾多支佢都幫我哋計埋，見佢服務態度咁誠懇又唔hard sell我哋買貴嘢，所以我哋都幫襯咗佢.....一箱咁多啦~~~(一箱係佢計出o黎o架，佢話夠晒o架喇~~)

大家一定好好奇，既然我哋講到咁唔鍾意飲紅酒，咁最後點決定訂邊隻酒呢？哈哈哈哈，就係佢喇──

Bushman's Gully Shiraz Cab ─ Australian $59@

馥郁草莓及黑加倫子味道，果香新鮮怡人，入口細緻順滑，女士尤其喜愛。(我仲係小姐，所以我一啲都唔喜愛.....)

揀佢除咗因為價錢好OK，亦因為四季酒店都係用佢，咁既然神級酒店都用佢，咁應該唔會失禮啦~~(就算有人話唔好飲，都可以用呢樣嘢塞住佢把口)

最最最抵係飲唔晒的話，只要未開過就可以8折價錢退番比佢，o岩晒我哋呢啲真係留o黎都無用o既無酒夫婦呀~~

後生仔落單時都幾好笑o架，佢話會婚宴前唔知一日定兩日送箱酒去酒店，到時會再打電話比我哋等我哋知送咗去，咁寫地址時我哋就咁寫咗：半島酒店，佢話要寫埋詳細地址呀，我即刻啞咗，好難有人唔知半島酒店o係邊o架喎，我淨係知道係梳士巴利道囉，唔知幾號呀，然後上網一查，哈哈，原來就咁"九龍梳士巴利道"，無幾多號o架!!!! 型呀!!!!!

Kinetics：http://www.kinetics.hk/

名帖：http://www.goodday111.com/

新翹行：http://www.sunstalent.com.hk/