事先張揚的送花事件(完整版)

嘩哈哈哈，今日係元宵佳節，估唔到有花收喎!!!!

(而家趕住放工喇，聽日先講番呢件好好玩o既收花事件啦~~)

***************************************************************************

尋日一朝早Office tran.咗個電話過o黎，對答如下：

男人：請問你哋學校閂幾點o架？

我：(求其答)5點啦(心諗：做咩tran.條線比我答啲咁無聊問題？真係知道我得閒？定係佢都好悶tran.call當做咗嘢?)

男人：請問你係咪Winnie呀？你收幾點o架？有啲嘢送o黎要你簽收喎

我：我係呀，收5點呀.......(個腦同時不斷loading loading收咩呢簽咩呢我訂咗咩呢?)

男人：哦，咁我5點前會o黎到o架喇~~(想收線中....)

我：喂喂咪住，你送啲咩o黎我要簽收啲咩呀？(我訂o個啲貨送咗o黎喇喎......同埋我只係會留自己係咩小姐，佢無理由知我叫咩名喎)

男人：都 係 o個 啲 啦！(佢好快講完就收咗線)

佢收咗線，我真係有10萬個為甚麼o係個腦度.....佢講得出我個名又即係唔係運桔啦，又唔知送啲咩貨o黎要簽收咁緊要.......

然後我就諗，會唔會係姨媽巾呢？

話說早幾日某大牌子送咗五大箱巾巾o黎比我簽收啊~~(事前我係完全唔知o架，大家咪以為我又中獎呀，其實係送比啲學生o架，如果有得抽獎免費用一世的話，我願意用我餘生的中獎機會去換啊~~要知道每個月都花幾廿蚊o架o麻~~)我估可能係佢係男人唔好意思講我知係啲咩啦.......

後來諗諗o下，又覺得係元宵佳節，會唔會係查理斯補償番無同我過情人節的驚喜呢?

於是，食飽飯我就決定試o下佢~~(呵呵呵呵呵，真係諗番起都好鬼想大笑o架)

Google talk with 查理斯，對話如下：

我：嘻嘻嘻嘻嘻嘻嘻，好靚呀~~ (偵測行動開始)

查：咩嘢好靚？

我：你話呢？ (等緊佢跌落我陷阱啊~~)

查：花花呢~~  (Bingo~~B I N G O~~我估到你送花啦~~)

我：wakakakakaka~~~~我未收到呀!!!!! 好白痴呀你!!!!!!我試o下你o乍!!!!!!!!!!!!!!哈哈哈哈哈哈哈 (yeah，一試就知有花收啦~~呵呵呵呵呵，我好聰明啦~~)

查：收到咩呀？ (死撐中.....)

我：花花呢 (頭先係你自己講o架o麻)

查：死啦，我唔知你講咩喎？？ (扮傻?)

我：你係咪訂咗嘢送比我呀

查：無喎....... (死口唔認?)

我：無咩?!!!!無理由o架喎.......咁你頭先答我咩呀?咩係花花呀 (仲捉你唔到?!!!)

查：我打錯字呀...碟碟.....love碟... (呢樣都得?話說我淘咗呢樣嘢好耐喇喎，但我又未見過實物，點會講呢樣呀?分明掩飾啦你~~)

我：無理由o架，從實招來啦~~ (又唔係做咗衰嘢，咁都唔認?)

查： ?????? (仲扮傻仔!!!! 你想攞影帝乎?)

我：真係無o架?我仲以為有tim.....原來無o架，咁奇怪....... (動搖中......)

查：星期五、六日陪你補番啦

查：sorry ar (無錯都講sorry?唔通真係我諗多咗.......)

我：咁好啦，咁點解今朝有日打o黎話有嘢送比我問我幾點收工o既 (咁今朝o個個人會唔會係o黎等我收工尋仇o架?oh no~~)

查：咁你無問佢送咩咩?? 係咪淘寶?? (呢句嘢仲唔出賣咗你?你明知我淘親都送去你屋企啦~~你媽咪同順豐o個個人做咗朋友啦，你唔記得咗o拿?)

我：我無淘寶嘢去學校喎，我有問呀，佢唔答我呀 (扮傻扮得你咁過癮~~等我又扮傻先~)

查：咁攪笑.....

(隔咗10分鐘，我死心不息，再扮剛剛收到花)

我：但係呢我想講，真係好靚喎， 哈哈哈哈哈，你呃我

我：你老實答我啦，係你搵人送嘢o黎~~

我：我send比你睇啦，我影咗相sms你呀，唔係你係邊個呀 (查高一尺，雀高一仗~~我將我朋友前兩日sms比我睇o個紮靚花forward比呢個候選影帝)

查：我無送依個喎...... (哈哈哈哈哈，無送"依個"，即係送咗第二啲啦~~呵呵呵，行動接近尾聲~~)

我：咁邊個送呀，扮嘢啦你~~

查：無扮野喎....佢無寫邊個送咩?  (我估我成功動搖咗佢喇~~我仲幻想佢打去鬧人哋送錯咗花比我啦，人哋先話佢知唔係喎未送貨喎~~佢仲驚....幾時多咗個情敵呢?wakakakaka~~~~今日似係愚人節多啲喎......)

我：無喎.....就係無~~ 

(接下來影帝唔知點演落去，居然沉默唔應我喇喎)

 (再過咗5分鐘，我真係收到屬於我o個紮喇~~yeah~~)

我：哈哈哈哈哈，好靚呀!!!  (已經重覆講第3次，狼來了故事第日可以改篇變雀來了~~)

查：依間花店唔得囉!!!  (影帝落敗，激動中!!!)

查：寫晒地址，話咗要5點前送，仲打去比你!!

我：仲要打去office呀~~ (關鍵係佢打o黎Office啊~~)

查：我都無比Office電話佢，佢自check o架!!! 要black list 呀!!!!! (傻豬o黎o架~~點可以black list咗佢o架?佢啲花好靚o架~~)

 (金絲雀大戰扮傻影帝行動告一段落~~過程真係仲開心過收到紮靚花呀，呵呵呵呵呵，查理斯啊~~你真係好單純o既o者~~多謝你除咗送我一束靚花，還讓我過咗一個好鬼過癮o既下午啊~~)

Mission：Done~~ (仲要係W E L L -  D O N E !!!)