金絲雀的"The褂"

先講解一下我而家敗咗啲咩租衫packages先啦：

1. 歐陸婚紗：造租1婚紗、2晚裝

2. Janny Wong：租1婚紗、2晚裝

3. 名婚紗：婚紗晚裝任揀4件，已預家姐2件，媽咪1件，Grandma(麻麻)一件褂皇 / 我一件褂(咁要視乎我哋邊個著得落喇，wakakakaka....)

所以呢，我件褂係仲未有著落o架~~ (唔好問我一個人點著得晒2婚紗2晚裝呀，我都毫無頭緒，亦唔想大日子變身Barbie雀玩換衫遊戲，如果你有興趣造租禮服，我願意低價出售)

其實呢，我個心真係好鍾意Cocoon的潮褂o架，但一來貴二來我都未必o岩著，所以我都打消咗呢個念頭喇 (雖然每次見到有jm著潮褂出嫁，我個心都會不斷話好靚好靚吖~~)

趁住星期六放半晝，放工就同查理斯展開呢個尋褂長征喇~~

第一站係金巴利道o既鴻運繡莊~~

仲記得有次見佢擺expo.，個價錢都唔係貴，咪諗住貢上去睇o下囉~~

要讚o既係樓下的看更，佢見到我哋行入大廈，即刻彈起身幫我哋按lift，今時今日就算我哋有交管理費，屋企樓下個看更都無咁好呀~~

入到去，我哋坐低睇相簿先，然後有位叫"甜姐"o既類似大妗姐自我介紹，叫我哋有啲咩關於結婚禮儀的都可以問佢，睇咗一陣，都係問佢有啲咩款係我o岩著o既，不如睇咗先啦~~

好快佢攞咗三套出o黎，第一套係佢好出名o既水晶褂，多紅色啲，領口衫腳同裙身都有兩行一粒粒閃閃水晶 + 七彩閃片，衫身都係大龍鳳啦，所以一攞出o黎我哋都覺得好靚好新淨喇，試咗上身，窄但可以拉埋拉鍊，隻手都可以郁到向前向後(咁其實係咪仲叫窄呢？)，但條頸好箍啊~~(我已經幻想到所有朝早o既snap都會影到我"抆"緊條領，驚死勒住我咁~~)

第二套係金銀線多好多o既大龍大鳳褂，對我呢個外行人o黎講，件件傳統褂都有大龍同大鳳o架~~(唔通係大傻同大賊咩......)

一試上去，個個都話呢件唔o岩我，老咗又脹咗，佢好快就同我除番落o黎喇....

都無繼續試喇，佢就話如果租第一件水晶大龍鳳要$2380，租Grandma著o個啲棗紅色褂就$1280起，一聽到個價錢我哋都係走人大吉喇~~

第二站去咗名婚紗，其實一早都知道名婚紗有件褂可能o岩我著，我上次都著過上身，但爭成兩吋拉唔埋拉鍊呀，不過又唔想額外再比錢租褂喇，所以都係諗住博一博hold咗先啦，或者到咗大日子我會自然瘦啲呢~~

由於心急 + 路經，我哋上咗去同佢講話想hold咗件褂先，除咗用坐無虛席o黎形容當時人多o既情況，我唔知可以點樣講明有幾多家人o係度傾緊package，我哋無攞單但係有單no.，佢好快就搵到件褂出o黎比我哋睇，我仲問佢可唔可以比我著一著上身，sales姐姐無黑面不特止，仲話梗係可以啦(要知道如果多幾個我呢啲咁o既即興人得閒無事貢上o黎，佢哋真係會好忙o架~~)

一試上身，我都唔敢搞條拉鍊呀，容乜易一陣成件褂好似人哋筋肉人爆衫咁爛晒o架!!

sales姐姐無諗過就同我拉埋咗，呵呵呵呵呵，雖然窄咗啲，隻手只可以向前唔可以向後撥啲頭髮，但係個領口位無咁箍實我呀!!!!

大家睇o下~~(由於連續兩晚點幾先瞓，o個個吸毒咁o既眼瞓樣都係要遮住先~~)

 我唔知呢件褂叫咩大中小五福定係咩七色彩雲牡丹呀，我只係知道著咗上去，居然有"The褂" o既感覺呀!!!!

呢件褂比起鴻運o個件少咗兩行水晶，但係我哋慳番$2380呀!!!!

呢件褂紅色多啲所以著得後生啲啲，有大龍大鳳，仲有我好喜歡o既彩色閃閃珠片呢~~現場睇件褂好新淨好sharp仲好閃tim呀~~

Yeah~~~我搵到"The褂"喇~~

既然我著得落件褂，即係代表麻麻件褂皇落空喇~~所以我哋又沿住上海街一路行落去，睇咗冠南華、永隆同錦發，由於之前都去過永隆試過一次新娘褂，覺得佢哋服務幾好所以今次主要都係問佢如果租棗紅色的褂要幾錢同埋有無啲大size啲o既？佢話有同埋開價$780~~

然後一直行一直行又入咗錦發八o下，嬸嬸好好人吖，佢開價係低過永隆的，但件褂比較多色少金線，所以佢提議咗另一件比我哋睇，顏色少啲金銀線多啲，佢話呢件係棗紅色版o既褂后喎，都只係$680 o乍~~

長輩褂冷知識：

如果係奶奶同外母，以前係會著全套棗紅色o既褂o架，咁再高一級麻麻同婆婆o個啲就係上黑下紅/全黑都有，但隨住奶奶外母年輕化揀咗晚裝，麻麻婆婆都可以年輕一級揀全棗紅底/褂皇褂后而唔揀黑色o個啲喇，因為好多老人家都仲係好抗拒黑色呢~~

由於要確實麻麻o岩唔o岩著先帶佢o黎試，我唯有扮住佢老人家試一試呢件奶奶褂啦~~(唔准笑呀!!! 笑親呢.....block咗你)

下面呢張相係我tune咗少少色先咁sharp，應該偏紫紅啲o架~~

睇完啦o麻，你覺得點呢？

核突──請load番去上面睇番我著"The 褂"個樣吖唔該，我無咁肥婆奶奶咁o架......

靚──咁第日笨啦啦娶老婆我再租o黎著啦~~

勁好睇──咁我係咪要考慮大日子著呢款呢？

由於我同麻麻係好似樣o架，所以呢，如果我著得好睇，佢都應該carry得到o架喇~~

由於錦發係落訂之後就會封褂，所以我哋都比咗一半訂金hold咗先，如果麻麻o黎到再揀其他先再睇o下多除少補啦~~

仲記得第一次試褂係o係元朗間鴻運，當時佢攞咗一件我著都仲有鬆o既褂比我試，一照鏡，噢！天呀.......我唔想做深圳整牙代言人呀!!! o個個死人查理斯仲話ok、好睇，我話如果要著到咁出嫁，我唔嫁喇.....

第二次o係係永隆試o既，件褂又係鬆得滯，但佢攞一件細啲o既我又唔o岩，雖然無第一次試o既時候咁不可接受，但都唔係好睇囉......

最後好彩係名婚紗有件o岩我著仲係新番o既褂，顏色pattern都比我之前試o既靚好多，呢個尋找大龍鳳o既長征先可以告一般落o乍~~

(期待我可以自然瘦，等我大日子著住"The褂"都仲撥到後面啲頭髮吖~~)