給查理斯的信(二)

查理斯老公：

係咪好奇怪我又寫信比你呢？嘻嘻，連我自己都無諗到唔係咩特別節日我都會寫封信過你喎~~

其實我哋結咗婚只不過三個月多少少，可幸係逐漸摸索到大家要點"互相包容"同埋"相敬如賓"，o係呢幾個月入面真係聽咗好多其他couples婚姻不如意事件，每一次，鄧人難過之餘，都難免暗暗慶幸自己唔係慘烈事件主人翁，我倆o既婚姻生活尚算美滿！



呢啲不如意事件o既主人翁有成熟的、有稚氣的，似乎婚姻o既如意度唔在於你係咩年紀、拍咗幾耐拖或者你有幾忍得，而係一個字"愛"，看似好簡單o既一個字，但裏面o既大學問，恐怕我哋要花一生去學習了~~

籌備結婚o既過程，我哋好好彩唔係鑊鑊吵架鑊鑊金o既新人，加上拍咗拖咁多年，對對方都有唔算膚淺o既了解喇，但係一齊住o既時候又難免會有啲事情需要磨合，例如你真係好唔鍾意著拖鞋但我又好鍾意乾淨、你成日都要執到屋企一件雜物都無但我又好介意你眼中容不下一包冬菇，不過好好彩，我哋都唔係固執同埋硬頸o既人，所以呢啲咁o既冷戰或者爭拗都唔會多過一個鐘，仲有好多次其實都係你見到我喊就心軟，問我做咩咁陰功豬......嘻嘻~~

最近有機會番去大學行咗一圈，話比朋友知我係o係邊度同你表白，然後諗一諗，原來表白咗都差唔多十年喇，十年前沒有想到這樣長遠，當初你拒絕我，而十年後o既今日，我都嫁咗比你喇！哈哈~~ 咁就十年喇！

我成日都覺得每對couple總會經歷一次愛情o既低潮期，雖然呢段路曾經好難行，但係我好慶幸我o地o既難關係o係拍拖時間已經出現同埋跨過咗，唔係話咁以後幾廿年都唔會再有咩危機，只係婚前o既經歷會令人成長，並且更了解對方，咁樣就算將來再有咩困難，大家都知自己同對方o既定位，一定會較易一齊去解難的。

拍拖o既時候我成日都好想快啲有我哋o既屋企，咁樣就唔駛為咗見耐啲而o係街四圍逛，又唔駛為咗等你放工而等到燶口燶面，今日，我哋有自己o既安樂窩喇，我哋o既屋企人都健康快樂，工作又穩定，似乎無咩好憂心喇，如果問我，我會覺得婚後o既生活就係我暫時人生中最開心最寫意最幸福o既時光了，希望我哋可以快啲有自己o既小生命，咁樣我哋o既生活除咗幸福之外就圓滿了！

不忘提醒你，我覺得o既愛是這樣的：

我今後將會    在每一個日子
不論快樂難過　也同樣專注
不論富裕貧困    也甜蜜相處

金絲雀老婆
寫於懶洋洋o既下午