金光燦爛金絲雀

結婚啲錢好似紅雨咁傾瀉落大地，大日子就係雨後放晴o既機會喇~~

雖然真係好市儈，但不得不講吓回本o既開心事

決定咗book神級酒店作為我哋o既婚宴場地，其實都預咗係"請"大家o黎飲食餐飯o架喇，唯一o既寄望係唔好收到啲騎哩禮物例如波斯地氈(!)、古國壇香(!!)又或者歷史銅象(!!!)



金價屢創新高，由奶奶買第一金o既$10860到雀家人買最後一金o既$12500，時至大婚當日，金價曾經一度攀升$18900!!! 雀一直都深信除咗兩家屋企人之外，唔會再有金器增添，直至婚前兩三日，收到風會有多兩對金鈪，雀已經有啲......擔心！

望住自己對肥手，難免擔心到時戴唔落啲鈪，結果婚前一晚雀係攞咗手頭已有o既金鈪試戴，但係戴咗兩對已經夾肉夾死我，啲鈪又已經因為大大力夾硬戴而凹凹哋，真係嚇鬼屎我呀，拿拿林放番入盒當咩事都無發生過......

第二朝斟茶o既時候，雀成功劫得大量金器，收鑊甚豐~~

揚晒出o黎唔係想引人犯罪，而係好驚訝好感動自己呢個黃毛丫頭都深得各位長輩厚愛，幫忙打造一隻真正o既金絲雀~~

(傻豬o黎o架，所有金器已安放保險箱，大家如果堅想打劫銀行，建議你還是從新計劃創劫市面o既隱形富豪，雀手中已有數個target~~嘿嘿)
查雀兩家都不是大富之家，連帶親戚友好都只係普通星斗市民，金價咁甘都仲去買金，相信唔單止係為咗斟茶o既時候好好睇睇咁簡單o既，而係盛載住祝福同埋心意，雀投身社會後可能連一餐茶都無請你哋飲過 (坦白講，有啲......直程連一齊飲茶都無試過......)，多謝你哋依然慷慨付出，伸出援手將我同查理斯o係貧窮線下力扯番上去正常線！

之前提過我隻肥手累事，所以金鈪只能用紅繩穿起來，在胸前營造串串金o既效果~~

而最意想不到的禮物，還有來自雀爸o既一對手錶。

雀爸跟雀媽分開好幾年了，雀也很少見到雀爸，由初時恨爸爸的缺失，到中段開始反思爸爸在父親這個角色上完全稱職，及至後來看到爸爸為我們o既婚禮喜形於色卻不算太著跡o既著緊，雀一早原諒了爸爸了！身邊有好友也正經歷這個階段，她不明白我何以做到，我只能說時間除咗可以沖淡恨意，時間亦累積咗我哋廿幾年o既親情厚愛，我都夠年齡嫁了，爸爸還年輕嗎？唔知仲有幾多o既相處時間，我只期望用愛o黎填滿餘下o既年期多於憎恨！

雀爸早早給雀買了一對龍鳳鈪又給查理斯買了金戒指，滿以為就是這些了，奉茶o既一刻，雀爸還拿出一對手錶來，佢話佢留意咗查理斯好耐，佢手上戴o既都唔係咩貴牌子錶，所以一早計劃要送錶，特登揀咗兩隻一樣款但唔同色o既等我哋可以交換戴，又希望錶可以令我哋記得我哋從今之後要一齊渡過以後o既日子喇！

聽到爸爸呢番說話，雀真係忍得好辛苦先無大喊出o黎，亦都更加令我感恩，上帝賜我不鐵石o既心腸，讓我可以重新感受同享受做人女兒一生一世都被疼愛o既呢份福氣！



講完啲感性嘢，要現實番啲喇，接住落o黎，為大家介紹一個好駛好用o既法寶，好用程度拍得住叮噹o係未來百貨公司攞番o黎啲水貨啊~~

優點：

1. 令到啲極易變形o既金飾一人一格各就其位、互不打kick

2. 易於點數，一目了然

3. 似化粧箱多過首飾箱 (如果大家有時間DIY，建議將佢改裝成一個藥箱咁樣就仲安全，姊妹裙記住轉埋護士制服啊~~)

4. 唔駛勞煩托管人顧住一大堆連盒金器，一家大細一屋過，方便保管

缺點：

1. 而家唔知道度有得賣

2. 而家唔知賣幾錢

3. 唔記得密碼係無鎖匙o架，請由000試到999

呢個盒已經買咗好幾年，陪住幾位少女一齊出嫁 (可惜每次借完比人，啲人都唔記得漏低一兩件比我......)，個個用完都讚o架！

如果每次要除要戴都要將啲金器歸位，恐怕要各大金舖派出幾名專業職員貼身跟進先認得到邊件瞓邊個盒，所以當日呢堆金器全程安坐箱中，當日仲全靠一位大肚姊妹同佢老公整天箱不離手，當正係自己個仔咁捉到實，如果諾貝爾有最佳保安奬，我真係好想提名佢哋啊~~

好喇，呢篇o既重點都唔係以上o個啲，而家我o係到呼召各位靚太同我一齊許願，

而o係許願之前，我想邀請未買金o既準新娘現在按 "X" 離開本頁，否則，你一定會鬧爆雀啊~~

因為......

我每日除了祈求街市餸菜價格下跌之外，

雀還有個小小o既心願，

就係──

金價日日升到無回頭，換o黎洋車 + 大樓， YEAH~~