最有眼光的選擇 (Elite Production) 公開篇

婚禮有好多項目都唔能夠唔用，既然一定要用，當然希望搵到啲價錢同服務成正比o既vendor啦，所以雀婚前都算好勤力咁刨blog睇o下前人o既comments，怕到時錢就用咗，度氣就谷住~~

今日到雀回饋大家o既時候喇，所有comments出自真心真意，無錢收無回佣無禮物，all from my heart~~ (註：如果你見我咁落力讚有啲慚愧同唔好意思o既話，有日我啲仔仔孫孫搵你哋影相就收順啲啦~~)

今次要講o下我哋揀o既大日子攝錄，Elite production，2P (1 Standard shot, 1 Snapshot) + 1V (後來仲有一位攝影助手)，我Book o既時候係2009年12月，所以價錢係超值，佢係我哋決定半島之後confirm o既第一個vendor，時至今日(我估時至白頭)，我同老公都200%肯定呢個係至抵精明眼o既選擇!!!



我哋confirm o既時候，佢哋唔算有好多ref.比我哋睇到，甚至當時係未有半島o既ref. o架，但係阿Jan o既snap + Michael o既video已經迷住咗我(重點係價錢都係筆直之內)，經過兩年o既洗禮，到我哋大日子o個日，佢哋已經更有經驗同埋成熟(即係老咗.....wakakakakaka)，不得不讚o既係佢哋唔係收咗訂就安安樂樂un un腳等收錢，婚前幾日仲會打電話o黎傾一傾個rundown同埋注意事項，呢樣都係值得讚o架~~

等我講一下我哋當日o既流程先 ──

半島接新娘 → 半島出門 → 坐花車行大運兼停PolyU影相 → 半島入門 → Felix証婚 → M2婚宴

我哋整日o既行程被佢哋喻為好舒服，而阿Jan後來亦坦然話初時佢驚咁簡單o既流程無咩特別嘢好影，估唔到佢連呢樣都顧慮埋，哈哈，唔係應該我哋擔心多啲咩？

首先佢哋好準時到達(我估係準時啦，我無戴錶，無人話佢哋遲咗)，一o黎到我連利是都未比，就自動波搵位搵人影相，雖然佢哋唔係傳統攝影佬咁口若懸河開籠雀咁不停講好說話，但都係健談而且o岩傾o架，睇番video我先記得理應緊張到標尿o既我居然同佢哋討論 皆 大 歡 喜 o既劇情! ! !

仲有一樣雀好欣賞o既係佢哋唔會要求我哋做啲假嘢，即係呢有啲videoman唔知咩事，對新人明明出咗門都要佢哋行番入去再出過，如是者幾次就係為咗比佢影，但而家唔係拍電影啊，我唔需要呢啲虛假o既踏腳出門鏡頭啊~~

去PolyU o既途中，阿Jan講o既嘢亦令我好放心將整日交比佢哋，佢話原先以為成日都o係酒店無咩好影，但佢話佢影咗好多新人，我哋算係好好影，因為好真情流露好自然(當然啦......我成日都無視佢哋o既存在，佢哋唔會企o係啲當眼位，令我忘記咗有人影緊我，搞到我喊又好笑又好都無顧過儀態，平時o既我就係咁o架喇~~)，我都回應番佢我一直都好擔心佢要我哋影啲好cool style o既相，因為我哋真係完全cool唔起o既人，cool = 唔笑 = 黑口黑面 = 追數咁o既面口，好彩Jan亦明白我哋係開心o既新人，唔會叫我哋擺o個啲pose~~

佢又讚啲兄弟姊妹都好真好幫得手好合作，叫佢哋影相又唔扭擰又唔作狀，所有嘢都來得自然，佢話佢見過好多，好o既兄弟姊妹唔係must~~

去到PolyU，由於我哋時間緊逼，初時都唔知o係邊度好，諗住好似自由人咁影噴水池啦，但求有個回憶算了，專業果然係專業，阿Jan叫我哋企埋一邊，佢用後啲紅磚作背景，好快手咁幫我哋影咗好多張相，呵呵，好似多咗輯pre-wedding咁呀，yeah yeah yeah！

番到酒店，發覺斟茶位置同出門前唔同咗，原來係佢哋主動搬動傢俬，令我哋影出o黎o既相唔駛男女家都一樣，呢點真係超級抵讚，又細心又肯用腦，一啲都唔hea，好多謝你哋o既用心啊！

由於我哋有好多DIY，阿Jan都好自動波咁幫我用鏡頭紀錄低~~



影隻戒指都有嘢襯底，Good~~





嘻嘻，連佢哋都有輯靚靚寫真

好鍾意呢張相，盡在不言中！

唔知佢幾時搬咗城堡去影相，但佢哋真係好鍾意個城堡，仲話：用呢樣求婚，點樣唔嫁呀？(Videoman話就算佢係男人都想嫁......)

影完呢張相無耐，啲賓客圍住個城堡睇，阿Jan即刻好緊張咁問我攞番隻戒指未，細心，抵讚！

除咗阿Jan o既snap好了得，Ryan除咗負責standard photo之外，都會影啲snap，所以我加埋o既相有千千聲，我仲join咗佢哋o既即場派相服務，過程都唔大問題，好多賓客即場攞到相都好開心~~好多謝你哋o既付出~~

最後，仲要多謝Videoman Michael，初時我都有啲擔心你咁後生會唔會好藝術家o既呢？又或者會唔會好cool呢？好彩，你唔係！即日剪片o既歌係我揀o既，你將畫面同音樂配合起來真係感動咗好多人，後來再收到全日o既video highlight，你配了另一首輕快o既音樂，想不到又有另一番感覺，好開心，或許這是你參與了我們o既婚禮後都感覺快樂吧？好多謝你將我哋快樂的片段都紀錄下來，令到我哋每次睇番啲片o既時候，o個份快樂感動都可以延續~~

你哋真係好得！又一次証明雀唔係只係識得揀老公，雀揀咩都係叻同有眼光o架，wakakakaakak~~~

有啲遺憾係唔記得咗同你哋Team合照，不過當日你哋o係我大日子o既幫忙，我會好好記著，這篇文字真是雀的肺腑之言，希望呢啲真心意見可以為你哋帶來更多o既生意，令更多新人可以有個甜蜜難忘o既回憶啦！

以上所有相片均出自阿Jan手筆，有人樣o既已經私有化咗，或者睇住下面呢張補數啦~~