戀上雀的巢(下)

望一望，原來上篇已經係上個世紀寫落o架喇，好，等我今日完成埋下篇先~~
(通常今日o既意思都係今日開咗個頭，一寫寫幾日甚至幾個星期.....或者最後下世紀先會完成.....)

比大家睇o下雀巢真身先~~

 

 

公主梳粧枱from青山道裕興發，靚、實正、價錢合理！
 

還記得為我哋示範姊妹裙o既國際標模Mary小姐o麻？

大家參觀完喇，通常都係"嘩，好大呀!"

大，係事實，但呢篇o既重點唔係佢有幾大，正所謂室雅何需大？今日要講o既重點係維持家居o既整潔度！(每當我拖地時，我強烈希望自己只係住籠屋)

仲記得舊年八月開始清潔同收傢俬，床一送o黎雀已經急不及待o黎個非正式進駐，每日放工長征般由元朗番東區，但一番到屋企又閒不下來，唔係抹塵就係拖地洗厠所，我覺得自己簡直係addicted to home cleansing！！！

每次一有朋友/ 送貨師傅上完o黎，我就開始家居清潔大行動，年廿八大掃除的情況差不多每天都在我家上演啊，好幾次見到送貨大佬著住鞋踩上我剛拖完地o既地板，心痛之情溢於言表，但係我真係唔敢叫佢哋除鞋，一o黎驚臭，二o黎我驚佢隻襪仲污糟喎......(我絕無歧視成份，我承認我有少少潔僻)，當然啦，厠所更加係絕不外借，每次有三唔識七o既人上o黎我都會閂埋厠所門扮入面有人 / 唔方便，假設佢強行要用，我更加係會話入面爆咗屎渠，我要好好捍衞我家o既馬桶啊~~

可憐洗洗擦擦之後，屋係乾淨了，但雀就累到半死鳥，所以雀開始奉行隻眼開時隻眼閉政策，如果只係少少餅碎跌咗落地就吸塵機吞咗佢，唔會再全屋拖一次了，幾個月下來，幸好，家居尚算整潔！

對於雀o黎講，嫁咗就係要擔起一頭家(!!)，當然唔係指經濟方面啦，而係屋企入面上至天花板下至地板我都希望搞得妥妥當當，希望佢符合安樂窩o既標準！所以我真係唔鍾意見到間屋亂，當然啦，我都會甩頭髮甩到通屋係、除咗啲衫周圍丟，但我唔會比呢度亂得太耐，大概係....亂....唔會多過一日，哈哈~~~因為亂多過一日，到時又要執餐飽咪盞自己辛苦！

說真的，我很喜歡婚後當小主婦(搞不好其實係一個本地家傭)o既日子，能夠為自己深愛o既人預備舒適o既居所，就係雀婚後第一個立志，亦希望呢個志願可以同婚姻o既承諾一樣，keep到一生一世啦~~