神級酒店的神經服務(上)

之前咁多篇都大曬幸福，令到個個都話要戴太陽鏡先可以o黎睇，其實係因為雀要為今篇 打 定 底，免得回顧番啲傷心事而影響咗我好幸福o既心情~~

今篇，大家可以除低眼鏡攞定紙巾喇，因為可能你會對我不幸倒錢落海o既遭遇深表同情或者激憤落淚！(有無咁誇張呢.....我自己都無因為呢樣嘢喊過......)


 煲開我blog o既都應該feel到我對神級酒店有堆怨氣，掙扎咗一輪，唔知寫唔寫好，講真，我係窮家雀，如果神級酒店因為我反映現實而要告到我無褲著o既話，我真係無錢同佢搶番條褲，但另一方面，我又想一眾選擇咗佢o既新娘子以雀為鑑，唔好掉以輕心，所以雀決定都係如實的寫出我o既遭遇，不過就會隱隱晦晦咁寫，唔駛留言問我神級酒店即係邊間，有心人自能從過往o既文字中搵到答案！

如果你係神級酒店o既粉絲，請立刻離開，因為我將要公開你偶像o既真 面 目！ (同埋呢篇唔會有圖，齋字，係鍛練眼力耐性o既閱讀埋解)

我哋個婚宴咁多瑕疵，其實真係拜神級酒店o既宴會部總監賤婦所賜，平時o既雀尚算有口德，但因為呢個犯婦人實在係太過討厭，所以下文將稱呼佢為賤婦，已經Book咗呢間嘢o既新人，想知賤婦係咪serve你o個個？好簡單o者，酒店網頁有寫o架，快啲去對o下，如果係佢，快啲求其搵個理由換走佢，又或者，你留定時間婚後寫投訴信吧！(可憐雀大部份o既honeymoon車程都在度稿，結果我寫咗6頁圖文並茂o既A4紙投訴!!!)

原本serve我o既唔係呢個賤婦，簽約時見到o既sales唔知係辭咗職吖定係放長假(無人明確咁話我哋知)，總之佢send咗封email o黎say goodbye話serve唔到我哋就去如黃鶴，仲直接將我哋pass咗比佢上司即係賤婦喇，我哋當時見賤婦做到咁高級，係仲歡喜o架，因為我哋情願有個話得事o既人同我哋傾嘢唔駛o徒時間，但係，事實証明咗我哋真係又傻又天真，看不清巫婆都是以白雪公主o既造型出現，仲懞然不知我哋已經登上Titanic，成就咗之後o既婚禮慘劇!!!


先由婚前Book場說起吧！

我哋o係2009年11月尾已經book咗神級酒店o既宴會廳作為我哋擺酒o既地方，到2010年中，我哋又心思思想book埋酒店另一個半露天場地o黎做証婚，但當時已經比人book咗，咁無法子啦，我哋就再問另一個室內場地有無期，當時職員o既答覆係已經比人book咗而又收咗訂金o架喇，咁即係連waiting我哋都唔駛諗喇！咁當時呢個賤婦挖空心思推介我哋book埋宴會廳中午時段o黎証婚，價錢都係可負擔的，咁我哋梗係開心啦，所有o既佈置都用得番，Ballroom証婚又可以容納多啲人，再加上全日都o係同一地方唔駛頻撲，呢條橋真係中晒我哋心水啊~~

可惜，當我哋覆佢話可以去比訂金時，佢話"原來"o個日中午時段宴會廳係NOT available，佢搞錯咗！正當我哋以為好夢成空喇，佢又話佢仲搞錯咗另一樣，就係室內場地原來係有人mark咗，但過咗deadline無落訂=自動棄權論，所以可以幫我哋Hold期等我哋去睇場。我哋睇完場即刻就話落樓下落訂o架喇，免得夜長夢多，但帶我哋睇場o既sales妹妹唔敢話事，死都話等賤婦再同我哋confirm先比錢，咁好啦，我哋等，但一等就兩三日，賤婦都唔覆電話，打去搵佢又搵唔到，結果都係要我三催四請佢先肯收錢作實，好似我逼佢食屎咁唔情願呀陰功......
其實搞咁耐又咁混亂先book到証婚o既場地，我哋都應該有所警惕，但係我哋依然抱住個心態係神級喎，應該唔會再有咩錯漏o架喇，往後o既事實証明我哋真係睇得童話故事太多了，立壞心腸o既巫婆比比皆是、防不勝防！

直到婚前三個月，我哋要約賤婦傾大日子o既一切細節，能幹o既查理斯自己整好咗份上至menu下至floor plan都包晒o既文件攞去同佢傾，所以過程都尚算順利，只係賤婦好主觀，話証婚場地o既designer用o既係冷色，所以我哋自己搵o既佈置最好都用黑白銀灰等色調，當時我已經心諗：靈堂婚禮咩？咁因為賤婦好似好好人咁提意見，我又無理由爆佢o架，又由於佢free盤証婚枱枱花比我哋，傾緊用咩色，佢死都話白色好，我唯有話我
哋o既theme color係粉紅 x 金色，佢先妥協話用香檳色 x 粉紅玫瑰，而其他細節例如晚宴枱花、油畫架位置都一一confirm晒o架喇~~

到最後一次落實所有細節係結婚前一個禮拜，我哋又三口六面坐低全部嘢由頭到尾傾一次，其實我哋有個special offer係好耐之前誤打誤撞之下攞到o既，就係2011年結婚o既新人普遍要跟2010年價錢再加10%升輻，而我哋係唔需要o架，只係需要比番2010年o既價錢就可以喇，我一直都將呢樣嘢保密，係因為酒店講到明係因為我哋早book而有特別安排。

唔知係咪因為少比咗呢10%錢，賤婦o係每項 r 得就 r o既項目入面力勸我哋加錢，例如我哋証婚後會有cocktail，我哋只係諗住中午時段証婚等啲賓客有啲嘢到肚咬住等影相，都無諗過要餵飽啲賓客，我哋order咗大約70打小for食100位賓客，另外仲有15磅蛋糕同埋嘢飲，但賤婦大概以為我哋啲賓客係古人放監 / 飢荒村村民，不斷游說我哋揀buffet menu，仲話如果我哋擔心buffet有啲牛扒羊架食得唔方便，可以幫我哋叫廚房切成bite size，等賓客易入口！

聽到呢度，我開始feel到佢係存心要o係我哋手上 r 番比o個10%更多o既金錢!!!

計一計比大家睇佢呢個建議有幾賺錢：

揀食Buffet係以人頭計，即係有啲朋友如花咁o黎閃一閃咁o黎影張相都要計錢，而價錢大概係$550@一位唔包嘢飲，嘢飲plan係$300@任飲兩小時，即係話呢，100個賓客o既話，我要成10萬蚊埋單!!!

大概我同香港某啲富商有啲似樣，佢以為我哋係名門之後純粹孤寒其實平時當呢10皮散紙咁用(!!)，先會提出呢個爛到不行o既財政預算！

大家唔駛問我最後 r 到free啲咩，因為o個一刻我已經完全絕望，只望佢唔好再陰啲陰啲要我加呢樣o個樣 r 番我轉頭......

最後，賤婦仲話佢會代我哋brief晒所有工作單位，會有working plan比各工作人員，叫我哋放心交比佢~~

滿以為一切順利等大婚啦，而我哋亦點都估唔到呢個神級vendor往後帶比我哋o既驚嚇同震撼原來都係跟我哋付出o既價錢成番正比！

好多謝你睇到呢度，等我估吓先~~

你係book咗神級酒店o既新人?咁務必請你bookmark起我個blog過兩日再番o黎睇中篇同下篇！
你打算book神級酒店?請你快快delete呢個念頭否則直接從銀行提取大量現款丟落最近o既海好了！
你無book亦唔打算book?恭喜你！你真係呢個星球上最有智慧o既生物！
純粹路過?八卦?
因為咩都好啦，雀一口氣寫咗咁多，係時候睇番套戲鬆一鬆先~~咪爆血管都似呀!!!