神級酒店的神經服務(中)

以下文字能夠失而復得，真係要多謝Blog友Kiyomi，你真係雀同所有追睇blogger o既大恩人呀!!!! (如果搵唔番，我咁懶，幾時先會打過吖？真係有諗過不如聲演錄低佢放上o黎算了......)

好，番o黎睇喇喂！

上回比咗個概念大家神級酒店有個賤婦負責serve我哋，就係佢o既種種惡行，令到雀婚後成日都要筆耕，寫6頁紙投訴信之餘，仲要o係呢度公告天下！

大家預備好生平最惡毒最粗鄙o既說話了嗎？ok，起飛~~


飛番去結婚前一個禮拜，同賤婦傾完整天o既rundown之後，賤婦話佢o係我哋大婚之前o個日放 假 ！(咁勞例又真係話你有權放假o既，哼，算我倒霉！)

細心o既我哋梗係追問佢如前一日check-in後發現有咩甩漏，我哋可以求助於邊位呢？賤婦當時只係好官腔咁話酒店任何一個員工都幫到我哋，唔駛擔心~~

又由於朋友仔成功 r 到席前free 6L fruit punch，於是我哋又厚住面皮咁問o下啦，佢當時o既答案係：人哋有嘢free一定有佢o既原因！佢番去搵o下個原因再覆我哋！

我哋當然唔會比佢hea走啦，番屋企再用email同佢confirm一切細節，賤婦覆番o黎話，free比朋友仔o既fruit punch係要錢o架，係朋友仔自己比錢order o架喎，咁算啦，我明明白白知道朋友仔係無比錢o架，賤婦都要呃我，好明顯係佢唔想free比我，算！我唔同佢糾纏喇，席前serve冰水同熱茶好了！

至於佢放假當日有咩事可以聯絡邊位，佢比咗阿Wing同Thomas呢兩個人名我哋，好，咁無嘢要煩佢喇，收線。

直到大婚前兩日，佢話我哋一定要放低所有要播o既music同video CD/DVD比佢哋試播一次，make sure無問題先得，咁我哋18號攞完某部份衫就連同所有碟放低o係酒店轉交比賤婦，仲補咗個email叫佢check完有咩問題快啲搵我哋！

直到19號朝早我哋收到佢email喇，佢唔係覆我哋啲碟有無問題，而係問我哋個晚宴menu係咪由海蜇 轉 蟹箝，如果係就每圍要加$3xx！

OMG!!!!!!!

收到呢個email我哋真係慌失失o架，因為我哋一早同佢講咗係將海蜇 轉 釀蟹蓋(真係堅好味!!!)，每圍要加$6xx，menu tasting時都無錯，點解到大日子前夕先o黎重 新 問 過？就好似阿仔聽日就去考會考數學，佢今晚先o黎講佢原來唔識背乘數表一樣咁可怕！

再睇真o下，呢個賤婦真係失 心 瘋，佢attach比我哋o既file name係ABCD Fung，即係佢應該send比呢位叫ABCD o既客問人哋係咪轉蟹箝，但佢又好醒咁封email一開頭係Dear查理斯，咁你話吖，佢番工係咪無帶腦又唔用心吖？

要知道o黎到大婚前一日，就算我真係零緊張，都唔駛佢咁比啲咁刺激o既嘢我哋玩o下o掛？

於是查理斯又拿拿林摷番之前同佢confirm menu封email同中英對照份menu send番比佢，re-confirm佢我哋係 唔要蟹箝 要釀蟹蓋 (丁蟹呀丁蟹，做咩婚前一日o黎搞事？)，但係呢個賤婦勁呀，佢放假吖o麻，無check email亦無覆我哋吖，而當日其實仲有十萬樣嘢等住我哋整，再加上要應付比我哋更緊張o既各家庭單位，我哋就唯有聽天由命，祈求蟹仔壯士斷臂留番個蓋比我哋得o架喇~~

o黎到呢度，我哋開始覺得賤婦唔穩陣，於是打去Catering搵賤婦交帶低另外o既人幫手睇o下啲碟試咗未，如果唔ok，我哋就再燒過先去check-in啦，但係......

Catering聽電話o個位話無Thomas都無阿Wing，好似我哋白撞咁，不過好彩呢位職員一聽到係佢老細啲蘇州屎，就拍晒心口話會幫我哋check啲碟然後覆番我哋，但結果係，佢覆o個時已經係夜晚七點幾，其中一隻播歌碟唔得，好彩呢隻碟只係打算o係無節目期間播o下啲歌比大家聽，查理斯都有燒過第二隻，不過最後都係播唔到......算！我用番晏晝cocktail時播o個啲好了~~

少少驚險咁終於去到酒店check-in，但深層次o既惡夢而家先正式開始！

我哋總共五個人去check-in，由於我係用貨van幫我哋運物資去酒店，o係正門落車時啲bellboy真係眼珠都就跌落o黎咁滯 ，可惡o既係我話o黎check-in佢都無我符，就係咁，我哋將total 12袋物資丟低o係酒店門口等佢幫我運入去就算，我哋顧住o既只係個求婚城堡，但亦真係太重喇，我哋將個城堡同罩住佢o既透明蓋分開咗拎，咁就出事喇！

我哋o係櫃枱等緊check-in o既時候，其實已經有四個人圍住咗個城堡蓋企，但突然間有個職員衝埋o黎衝散咗我哋，佢大腳踢咗落個蓋度(係我唔好，臨出門之前仲抹乾淨個蓋，太乾淨了又透明色，所以佢 視 而 不見)，個城堡蓋當堂爆邊 + 角位爆裂，我都明白職員個菠蘿蓋有幾痛(但佢就算碎骨都可以claim工傷吖)，因為呢個蓋係查理斯特登訂造，厚身阿加力膠，亦正正因為係訂造，我哋真係無法子搵個第二個！(其實已經好好彩，唔係踢爆咗個城堡.....如果唔係，我會殺人！ )

黑暗中仲有少少曙光係幫我哋check-in o既係個日籍女生，佢又鞠晒躬又道晒歉，送咗我哋上房之後最後仲一力承擔捧走咗個爛蓋話搵同事修補，睇o下整唔整到，其實我哋都完全唔抱希望o架喇，因為我哋係透明膠面，用咩方法黏合都會留有手指模，不過當時我哋都無咩辦法，就由得佢攞去整啦~~

入到房由於我事先叫咗賤婦預備多一套茶具比我斟茶用，但係佢又係漏咗，我哋仲搵勻成間套房都無一個可以煲水o既水壺，唯有打去服務台叫人攞o黎啦，服務台o既人稱呼我做鳥小姐，但其實我係雀小姐啊，第一次我都好聲好氣咁更正番佢叫佢改番，但後來每次啲職員call上o黎話我知個蓋o既修補進度等等都係叫我做鳥小姐，我都不厭其煩咁再叫佢改，因為我怕翌日啲親戚去櫃枱問房號會搵唔到，雖然每一次佢啲職員都應我係係係，但結果第二朝我叫早餐時都仲係叫我做鳥小姐，我真的啞了......

原來神級酒店覺得稱呼錯個客無咩大不了，夾硬要我改姓，我真係覺得零尊重同埋好討厭！不過當時心諗我都唔會再order啲咩喇，你鍾意點叫就點叫啦！

講番個城堡蓋，o係我催了又催之後，大約夜晚九點佢終於送番上o黎，佢送咗個刻有神級酒店名o既相架同埋支爛鬼香檳比我哋賠罪，但不出所料，個蓋都佈滿咗手指模，唉，早知係咁我唔駛整簽名布啦，大家打個指模o係個蓋度得啦......不過我知道迫死佢啲職員都無用，而我亦都仲有若干DIY要趕工，所以就又算了！

好彩我同查理斯唔係迷信o既人，婚前一晚又有幾位好姊妹相伴，掛住玩掛住笑都無時間細想一連串o既不幸事件(大抵可以結集成書或者拍套戲)，我只可以話，真係好彩我哋唔迷信，因為o係我哋o既大日子，神級酒店o既錯簡直係 unbelievable ! ! !

嘻嘻，雀真係好努力打番成個經過，下集真係高潮泆起，鑊鑊新鮮想打佢鑊金，追開我blog o既你行開一陣好番o黎睇喇~~