神級酒店的神經服務(下)

經過咗上篇同中篇，終於o黎到戲肉喇，go go go go go~~~



大婚當日o既早上，我o係酒店房等出門，而查理斯就等酒店架貴車去車佢o黎接新娘，因為查理斯樓下停唔到車，所以佢約咗司機o係屋企後面o既的士站等佢，司機無遲到仲好準時，但係查理斯要等埋個兄弟，所以佢就算見到司機到咗，佢都要等埋個兄弟先可以過馬路會合司機，就係因為咁，過晒約定時間，司機都唔見查理斯就超緊張，猛打電話都聯絡唔到新郎哥，佢又好慌自己去錯地方約錯時間誤咗我哋大事......

不過最後司機當然安樂晒啦，因為佢做o既完全正確又點會等唔到新郎哥呢？當佢o係車度同查理斯講番呢件事，對一對個電話號碼，就真相大白喇！原來司機手上個電話no.係錯o架!!!!!

咁我哋當然明白司機都係接order辦事，o個個錯誤o既號碼梗係又係賤婦o既工作失誤之一啦！

Anyway，結婚o個日又點會得閒再記住呢啲小事吖，而且最終又無出咩岔子，但係賤婦往後o既錯令到我哋不得不重提呢個失誤~~

由出門、入門到証婚，成個過程都無咩問題，當我哋証完婚o係酒店周圍影完相番到上去預備換衫轉粧迎賓o既時候，o黎料喇!!!!!
當時我o岩o岩換番便服諗住去一去厠所先(新娘房無地方殊殊o架......)，個頭又拆到一半成個癲婆咁，多謝兩位都係光顧神級酒店o既戰友早咗o黎幫我睇場，佢哋好慌張咁一定要拉我去ballroom睇o下啲佈置，佢哋好疑惑咁話：阿雀，乜你揀咗個咁o既枱花咩？點解放蠟燭呀？

初時我仲以為佢哋講緊佈置公司同我放咗啲小蠟做裝飾，唔知佢哋做咩咁緊張，去到ballroom雀仲望咗一輪先見到......真的 大 鑊 鳥 !!!!

OMG!!!!! 白蠟燭!!!!!! 打孖上仲要枱枱都係!!!!!

當然啦，抆番走啲蠟燭成件事就ok番晒，亦唔係好難改o者，呢個時候，戰友又問喇：阿雀，乜你揀呢隻花做主家席枱花咩？唔係揀爆爆花咩？

我再望o下，賤婦貫徹唔帶腦番工o既習性，連主家度個枱花都錯埋!!!! (如果唔係戰友指出呢個錯處，我真係曚查查咁唔為意......)

除非你特別唔鍾意呢隻花，否則，無理由唔揀呢隻爆爆花而揀玫瑰囉!!!!!

後來番屋企睇番之前showcase影o既相，我就好奇怪點解佢做比我o個兩隻花款都唔見2010 showcase有o既呢？當時我哋應該係心儀以下呢兩隻o架~~



再搵o下，真係想為賤婦鼓掌呀!!!!

佢幫我哋做錯o個兩款枱花係2009年款啊~~(如下圖)



呢個時候因為有第二啲嘢都激起咗雀把火，賤婦呀賤婦，你真係唔好彩，因為我無人可以爆o既關係，我唯有爆你鑊勁o既！(特別鳴謝兩位戰友掃住雀背勸雀唔好衝動爆錯人，賤婦受人二分四，就揀佢o黎開刀啦~~)

賤婦最好嘢o既就係我哋找晒錯處佢都仲未現過身，仲要佢啲同事催佢先出現，佢好醒咁攞番幅圖o黎同我對質，一開聲就話：哎呀！花房個姐姐做錯咗呀！你係揀呢隻同呢隻吖o麻(佢指住當日比我哋揀枱花款o既文件)，佢做錯咗隔離o個款呀，你睇o下！

佢講o既時候仲要係好理所當然唔係佢錯咁款喎！真係想出去攞個speech bubbles 比個 "Like" 佢！

我覺得花房姐姐無理由大意到咁10圍10圍o既花都係錯o既，好明顯係同司機單case一樣，係賤婦比錯咗料人哋，就算唔係，真係如佢所講係司機同花房姐姐出錯，你做到咁高級唔係淨係識賴o掛？況且對個客o黎講邊個做錯都好啦，實情係錯→再錯→全部都錯，點解唔可以有guts啲承擔o下責任呢？或者你講句唔好意思對唔住耍走我都得o架喎！

偏偏佢條頸真係搽咗神油咁硬，誓不低頭咁款，我一輪咀喪話佢：

咁你係負責我哋婚禮o既人，唔係應該落o黎收場睇o下有無嘢出錯o架咩？

點解所有錯都係我哋發現咗去話比你聽仲要等你落o黎，然後你落到o黎就係賴呢個錯o個個錯，你就無錯？

今日係我結婚+生日，你插白蠟燭？你唔係玩呀？

我哋先前有考慮過揀米白色枱布你都識講中國人唔好喇，老人家唔鍾意o架，咁而家啲老人家睇到好唔高興囉!!!

係人都知白蠟燭代表咩啦，呢個唔係祝福囉！

大家係咪以為當個新娘咁激動而又完全係酒店錯，就算CEO落到o黎都應該道個歉先啦？但係賤婦只係"係咁二"講句唔好意思又或者"哎呀，你唔好唔開心啦，今日應該開心o架o麻" ，而大部份時間佢係唔服氣又木無表情咁望住我，個樣係一啲歉意都無o架！

可能佢真係心坎裏覺得唔係佢錯係我哋屈佢，所以我連帶朝早司機contact我哋個電話係錯o既呢樣嘢都話埋比佢知，佢好嘢喇，當時不斷地話無可能o架喎，後來仲上番去攞份文件落o黎同查理斯對質，仲加多句話：無理由錯o既，我不嬲都係打呢個電話contact你o架！

一對，哈哈，真係錯o既！

佢手上份紀錄係18304567，但查理斯個電話係16304567啊~~

咁點解佢話之前打到電話比我哋o架呢？

咪就係因為佢其實從來無主動through電話聯絡我哋，咁耐以o黎都係我哋打爆佢office個電話搵佢，而絕大部份時間不得要領迫於無奈咁用番email同佢溝通，所以一開始就錯咗佢都唔知，仲諗住死話平時都係打呢個號碼就無錯！

o個時已經5:30pm，我限佢6:30pm一定要改番o岩晒啲枱花比我哋見到，但亦因為咁樣，原本我係打算5:45pm迎賓o架，最後搞到6:30pm先換好衫出o黎同專誠o黎賀我o既Blog友影相，真係非常唔好意思，亦都好飲恨無長啲o既時間同你哋傾o下偈玩o下speech bubbles！

我相信賤婦個心入面一定一定好憎雀，因為佢已經係負責宴會最大粒o個個，應該好少比人當眾噴佢，又或者平時噴佢o既應該都係一啲有頭有面有身份有地位有錢o既大粒佬，而唔會係我呢啲一望就知唔係富二代o既死人頭！

不過，錯咗就係錯咗，佢話佢請示咗上頭，為咗彌補呢啲過失，佢即時免費開始serve席前飲品，而雀聽到佢咁講，一方面係貪小便宜(其實佢唔送番任何嘢比我我都唔能夠咬佢食o架啦)，另一方面係覺得邪不能勝正！佢之前仲呃我話朋友仔o個6L fruit punch係比錢買o既，而家佢 r 唔到我哋比錢之餘仲要倒送番比我啊，呵呵呵~~所以雀亦都逢人就講，飲多幾杯啊~~

(好喇，雀o係度真係要多謝咁多位Blog友 / 路過者關心o既留言，大家睇到雀成日都咁唔順利又咁激動係咪好擔心呢？嘻嘻......

其實雀真係下屆影后o既不二之選！

因為o係爆賤婦o既過程入面，縱然雀係七情上面咁鬧鬧鬧，但其實我真係一啲都唔 上 心 o架！

鬧佢純粹係因為有第二啲嘢令我好忟憎，佢唔好彩做咗炮灰，但如果唔係佢錯成咁，我又點會有機會出番啖氣呢？

To be honest，雀真係丁點都無因為佢插咗白蠟燭而唔開心，而"老人家睇到好唔高興"都係一時興之所至o既對白之一咋~~

事實上如果真係有人為咗呢堆白蠟燭而唔高興o既，應該只得賤婦！)

好喇，o黎到呢度都夠鐘入席喇，大家係咪心諗：都應該告一段落喇o掛？


噢，NO！

賤婦應該特別祈求過整晚都別讓我們順順利利，估唔到入咗席都仲有堅嘢發生!!!!

大家抹乾淨啲眼屎等雀繼續講故仔啦~~