神級酒店的神經服務(續集)

呵呵呵呵呵......真係唔好意思喇，千呼萬喚，雀終於捨得飛番o黎講古喇~~多謝各位火滾地耐心等候

我諗真係無咩新人會 / 需要o係大婚之後用四篇o黎交代同一個vendor o既失誤，呢個vendor review真係字字辛酸，粒粒皆辛苦！

再o黎就係入席喇，由於先前o既錯已經係意料之外，我哋都估"應該"不能再有甚麼錯了吧？

可惜，我是低估咗神級酒店喇......



話說播成長片段時我同查理斯係o係ballroom門外standby，度門閂咗，我哋咩都睇唔到o架，只係聽聲等開門就開步走，當時啲掌聲尚算熱烈，我哋當然唔察覺有咩問題啦，好彩戰友事後話番比我知，原來當晚成長片段播成咁鬼樣......

鬆、郁、矇!!!!!多得戰友老公拍得呢個難忘一刻，我先追問番負責播片o既兄弟姊妹，佢哋話晏晝試片時係無問題o架，當時見個畫面係咁已經飛奔過去打算搵負責播片o既職員整整佢，但無職員o係o個度，佢哋就自己試o下襟o下啲制例如Focus啦，但都係鬼影幢幢，到職員卒之歸位喇，段片又播到尾聲了，但呢個擅離職守o既職員事後竟然話唔係佢部機o既問題，係我哋條片本身係咁o架！

叮! 叮!! 叮!!! 叮!!!! 叮!!!!!

我聽到呢句真係爆火，又係賴個客!!!!! 總之有咩問題，千錯萬錯都係個客o既錯!!!!!!!

其實我真係唔係好介意條片以矇矇矓矓o既姿態呈現大家眼前，我介意o既係呢條片係我哋親自試片o既，就o係大婚前一個星期，賤婦同我哋一齊試o架!!!!!

當時條片係清過高清，賤婦仲好好心咁提我哋播多幾次睇o下順唔順暢，所以呢條片出意外又賴我我真係唔服！(後來估計應該係入席時啲人行過唔覺意郁到個projector，focus錯咗先會咁，因為接落o黎全晚要播o既嘢都轉番去高清台了......)

最令我揼心o既係條片係我自己整，真係花咗好多時間心思去搵相、組合，期望親友睇到時可以記起我哋相聚o既小片段，誓估唔到爛尾收場，唉......

不過片段當時已出街，o係無可挽回o既情況下我唯有強迫啲朋友仔上o黎我家重溫一次，哈哈哈哈~~

晚宴過咗大半，除咗我碗翅無翅之外我唔見有啲咩問題了(唉......原本酒店實牙實齒話每碗都有一両翅o架，但我坐主家席，連查理斯o個碗都只得兩條，正當我哋諗住un un腳享受婚宴之際，神級職員再發功......)

我哋晚宴有個環節係送禮物比父母，我哋揀咗頒最佳父母獎比佢哋，原本係每位爸爸媽媽都要上台領獎，企o係查理斯媽媽後面o個位職員只係好殷勤咁拉開咗佢張椅，但佢o係位企咗起身一陣，因為怕羞又因為件晚裝唔係好方便走動，諗一諗都係唔上台打算坐番低，可能我哋太靚仔女，又可能我哋講嘢太吸引，個職員太投入了，居然無為意要推番埋張椅，查媽就係咁坐了個空，成個人跌坐在地上......o個一刻真係又痛又瘀，最慘係查媽一向都有腰患，咁樣跌一跌，佢之後睇咗兩次醫生呀！

賤婦最厲害o既地方係，整晚接二連三咁出錯，到埋單一刻佢都唔現身再正式道歉，呢啲另類服務態度真係好值得我哋再一次以掌星(以手掌星巴佢)鼓勵！而我哋亦理所當然咁一毫子貼士都無比~~

唔知係咪瞓醒覺賤婦就醒覺喇，第二朝收到佢封補鑊電郵，其實都係表面而又公式化咁為整跌咗奶奶件事深感抱歉，期望我哋有個愉快o既婚姻生活云云......

好好彩，上天賜我樂觀o既性格，否則大婚當日面對一次又一次o既失誤，真係少啲IQEQ都真係喊足一年呀~~

不過話說回來，雀辛辛苦苦嘔咗6頁A4紙去投訴最後係獲接納o架，但係賠咗啲咩我唔會透露喇，可能有神級酒店o既誓死追隨粉絲會覺得雀好刻薄，人哋都接納咗我o既投訴又賠咗啲嘢比我，我都仲數臭佢，我只可以話佢比o我既賠償我受之無愧，亦唔會當o個啲係掩口費，雀咁多篇所寫o既全部都係事實，寫出o黎係想大家有個警惕，唔係神級酒店服務就一定好，就算跟得幾足好似我哋咁調番轉頭做晒proposal咁比佢跟都可以錯到咁o既田地，所以結婚當日好多嘢都話唔埋o架！

雀真心希望仲搞緊結婚o既B2B盡量放鬆心情，Hope for the best, prepare for the worst！
而如果你係已經結咗婚又o係大婚當日遇到不盡如人意事o既靚太，雀真係衷心希望你哋Let go 啦~~最重要係大家已經結咗婚有個幸福家庭，唔應該再比結婚當日o個啲礙事o既飛禽走獸侵佔你o既生活，阿Q啲咁諗，就係因為有呢啲唔完美，而家同朋友仔傾偈又可以八婆吓，老來同另一半都有個話題吖o麻~~

終於都寫埋呢個續集喇，其實都仲有啲花邊嘢濕濕碎碎可以寫，不過雀呢排真係無咩心機，等有日我條懶蟲離我而去另覓主人時我再寫個大結局比大家睇啦~~