雀揀雀巢之雀見(一)

過去幾個月，樓價持續有升無跌，雀每個星期六日同查理斯o既活動就係睇樓同埋同經紀做朋友~~

雀深信，呢個世界係無不勞而獲o既，買樓o既揀擇程度應該僅次於揀另一半，所以我哋置業之前真係做足功課o架！功課熟到咩程度？咪就係好幾間地產都問我有無興趣入行或者話我係做經紀o既不二人選囉~~



我哋好幸運，o係屋企人o既幫助下，o係婚前兩年已經買入一個單位收住租先，當時雀未係查家人，所以無多過問呀，功課都係查理斯做o既，至於佢o既眼光係點，嘻嘻，100 分，因為佢當日o既選擇，今日我哋先可以樓換樓~~

第一樣想講o既係捨得。樓價係咁升，如果你個單位正正常常，應該都係跟隨大市升o架喇，咁升到咩位先應該放呢？好簡單，你覺得係時候 / 你捨得就係the right time！當然啦，有啲人會話我而家賣咗佢再升我咪好蝕？如果你係抱住賺到盡o既心態，咁你亦都要有蝕到入肉o既心理準備，無任何一項投資可以賺到盡o架，你只可以攞住唔會令你後悔o既利潤離場，對我哋o黎講，賣咗可以換個好啲o既單位就係the right time喇！

咩叫好啲o既單位？咁人人鍾意o既嘢都唔同o既，對於我哋o黎講 1. 舊換新  2. 單幢換屋苑  3. 新界換市區  4. 細單位換大單位 等等都會係我哋覺得"更上一層樓"o既要素，咁符合呢幾個因素o既話，賣咗再買番就係更上一層樓o架喇~~

第二樣想講o既係，買樓自住都要抱住"更上一層樓"o既心態。

講真，我哋呢啲人未到中年就首次置業o既幸運人士，絕對唔應該諗住買第一層樓就住過世，只要你抱住要越換越好o既心態，你先會謹慎你先會努力做功課，第一層樓未必會令你發達，但絕對係令你更上一層樓o既踏腳石。

好喇，當你態度正確之時就要鎖定目標喇，鎖定目標之前都仲要計計數先o既~~

簡單啲講，就係計吓你o既入息同埋供樓o既負擔能力喇！(有啲pro terms o架，但雀真係唔記得，我諗我咁講大家都易明o既)

假設你月入$20000，無任何負債，咁你應該係每月可以用最多$10000(收入一半)o黎供樓，咁即係可以買到幾錢o既樓呢？

每問銀行借(即係做按揭)100萬，以而家銀行普遍P減o既息口(實際年利率2.15)，選擇最長的供款年期30年，每月供款大約係$3800，咁即係你最多可以問銀行借260萬，至於買幾多錢o既樓喇喎，就睇吓你比幾多首期喇~~

我哋唔係pro到銀行職員咁，好多時只係簡單啲心算一下，去到銀行度佢真係要詳細咁計o架，仲要加多2厘息做吓壓力測試，呢啲計數o既嘢我就唔詳述喇，大家如果想盡確至小數後幾個位o個啲，建議大家google一下"按揭計算機"輸入啲簡單資料就計到o架喇~~

好喇，供款能力都知道咗，就可以睇餸食飯喇~~

假設你可以問銀行借260萬買樓，而最盡可以按9成，即係你可以睇under 290萬o既樓，而你要預備1成首期，即係你手頭攞住29萬就可以置業？錯！

買樓除咗要比首期，仲要預埋釐印費(呢個因應樓價不同係唔同o架，少則$100，多則幾百萬都有)、律師費(通常都係一萬蚊樓下，但都聽聞過有啲律師樓影印都收你幾千蚊)同埋經紀佣金(通常係樓價1%，但絕對絕對可以講價的，有人好牙力真係可以講到一個仙都唔洗比)，如上買大約290萬o既樓，你o既首期連雜費要預大約40萬先穩當，呢個數仲未計要搬屋、執裝修、置傢俬等費用o架~~

睇到呢度，大家係咪又係搬話：唉，我都買唔到o架喇！儲極都趕唔到個樓價升輻啦~~

係，樓價真係升到媽媽聲，但係如果你一路都抱住"我點努力都係買唔到"o既心態，咁你已經輸咗一半喇，有志者事竟成，公一份婆一份儲吓儲吓就有o架喇，儲，係真的要付出咁儲，唔好一邊話儲唔到一邊又一年去幾次旅行、閒來又豪飲豪食豪買豪玩，如果你係享受呢種及時行樂o既life style o既話，你就唔好迫自己趕上車喇，講真，我哋父母o個代都唔係廿零三十歲就做業主啦，所以，唔駛心急o架~~

以上雀見只係師奶仔o既親身體會同諗法o者，比起o個啲教人投資o既銀行家/職業炒家，我o既心得只係愚見，雀相信條條大路通羅馬，o黎緊會繼續講多啲開波睇樓o既實況，有興趣o既就時不時click入o黎睇吓我有無update啦~~(陰功.....yahoo而家無埋通知人哋blog友更新......)