查理斯太太: 金絲雀2012大事回顧

恭喜呀恭喜呀！

點解要講恭喜呢？

因為2012終於都沒有末日降臨，不過大家都可以當係一個新紀元o既開始，重新做人~~(搞咩呢？彷彿末日前大家都大奸大惡咁......)

之前兩年都有寫大事回顧，今年縱然因為搬家忙到甩(雀)毛，都係要諗番有啲咩要記低先！

按：以上的開場白真的在2012尾幾日寫下的，但嘛，我戒懶戒了好多年都沒成功，所以又一天拖一天，今天，2013年1月都過一半了......不過今晚看到低BB電視都還在播我的2012，即係話2013年才回顧2012的大事沒問題啊，那團要寫的火又嘭嘭聲燃燒起來了，好，就趁懶筋還沒彈番起時快寫~~

再按：今天......是......2013年2月了......好！最新目標，蛇蛇未o黎到前呢篇一定要完成出街!!!!

工作：
今年開始打住家工，中間有見過工有過offer，但臨陣都係縮沙了，懶係主因，查理斯o既"我養你"言論係誘因，所以寄信見工等動作到尾都只係混桔遊戲......

接近年尾時見咗份政府工，如果請我就係鐵飯碗，咁可能都會試吓投入番勞動人口市場，不過仲未收到信，一切言之尚早~~

查理斯的工作依然係忙到甩碌，平均工時都要朝八晚九，年尾本來有轉工的機會，哪料請辭時獲老細極力挽留，出動銀彈攻勢加人工(!!!!)，我哋唔會同錢鬥氣，所以，走不動了！

由朝八晚九的工作再外加星期六日自動half-day，係好辛苦，但唔辛苦點得世間財呢？趁後生趁有伯樂，查理斯，好好幹吧！

健康：
雀今年無咩大病痛，濕疹都唔算發作得好密，今年轉咗用貴價護膚品sk2，皮膚係有見得到的改善，頻呼後悔結婚前未識得用佢!!!!

年尾頻頻有家居小意外，先係貪快踩咗o係碌碌電腦椅(!!仲以為自己三幾歲，實情係三十幾歲啦)成個撻咗落地，一頭撼埋牆，痛到呢......

去咗急症室攞咗籌，但坐坐吓肚餓到胃痛多過頭痛，所以未見醫生就走咗，可幸雀頭真係由細撼到大，除咗多咗幢高樓，無撼傻我，真係萬幸~~

又，因為搬家比部雪櫃夾到隻中指，三個月了還沒有好，有一小節唔知碎骨定未消腫的瘀血凸起咗，但唔撞到佢唔痛，所以都係遲啲先算啦

查理斯一向都無咩病痛，但年尾開始坐骨神經痛，行唔到耐，睇咗骨醫脊醫中醫都未好番晒，但已經好咗啲，起碼最耐都可以行到一個鐘。希望佢快啲好番，咁先可以陪雀去血拼o架o麻~~

家庭：
今年年中Grandma卒之上樓了，忙著搞裝修買傢俬，但睇到佢好開心好滿足咁笑，真係幾辛苦都值得o既~~

多咗番去同Grandma食飯吹水，每次番娘家食飯都又食又拎，飽到捧住個肚走，呢種感覺同未嫁人時真係好唔同，真係只有番到娘家先覺得自己真係大晒真係皇帝女咁

年尾到我哋大大屋搬細細屋，環境好咗、層樓值錢咗，所以都係好事，不過因為搬家令其他問題一觸即發，傷心難過不忿委屈了一段時間，有時受咗委屈又唔同得屋企人講怕佢哋擔心o個種難受真係好深刻，更覺得自己家人錫自己係無條件、無計較的

變咗全職主婦，日日o係屋企真係覺得啲塵篤眼篤鼻，所以雀呢一年都好努力咁執執復執執，查主外，雀主內，我真係希望查理斯放工番o黎有個安樂窩可以舒舒服服，希望我可以越做越好啦~~

愛情：
我哋可以傾偈o既時間其實都唔多，pillow talk好多時都變咗佢同周公talk，咁樣真係會令感情差啲o架！

一齊咗十年，今年下半年都算係幾唔開心o既一年，亦都真係有啲磨擦係要磨好多好多次先夾硬合到，開始覺得結婚唔係兩個人的事，其實就連婚姻都唔係，不過查理斯大部份時間都算係好老公，只係o係"縱容"雀方面可以再做盡啲，咁雀就會快樂一啲o架喇~~

(老公：o係洗錢方面其實你夠縱容我o架喇，我指o既係其他方面)

總括：
2012其實係唔容易o既一年，不過有屋住有飯食有衫著有sk2搽，我真係唔敢覺得唔幸福