敗家敗到餅店去

自從上星期post咗關於揀wedding cake的圖片之後，真係不得了呀，城堡蛋糕以大熱姿態擊敗咗其他蛋糕對手呀~~

星期日我同查理斯約咗Cake 2試食，6pm前去到，蛋糕店另一邊有pair情侶都試緊呀~~好快職員就攞咗一壺靚茶同埋兩碟每碟6件的蛋糕比我哋試食，6件都係忌廉蛋糕，分別有Fruit cake、綠茶粟子、綠茶紅豆、朱古力、軟心朱古力同埋咖啡~~有無睇到呀，呢6件蛋糕雖然係比人客試食，但係都唔馬虎o架，佢上面真係有花紋o架(雖然係切開咗)~~

佢哋o既蛋糕分兩類：忌廉蛋糕同埋糖霜蛋糕，忌廉蛋糕就係平時我哋食o個啲喇，至於糖霜蛋糕就好似莎莉蛋糕咁實啲，但係糖霜蛋糕就可以好多款都做到，又可以承受一定的重量，所以可以用好多糖霜做成花朵或者其他裝飾，相反，忌廉蛋糕唔受重，同埋易溶，所以唔可以有太多裝飾物，純粹靠師傅唧花紋去裝飾個蛋糕。至於價錢方面，Cream cake係$218-$238一磅，包運送(離島除外)，Fondant cake係$358一磅~~

職員話試o既時候都要順序由清淡的fruit cake試起，每試完一款最好都飲啖茶清一清啲味先試下一款，咁先試到最真確的味道喎~~

Fruit cake：普通生果蛋糕，但好軟唔太甜，好味但唔算好特別，所以得分：

綠茶粟子：我平時唔太喜歡食粟子蛋糕，因為唔鍾意見到一條條好似蟲咁o0既粟子(但其實我鍾意食一粒粒o個啲粟子o架喎~~) 不過呢個蛋糕好少粟子味，得分：

緣茶紅豆：我真係好好好鍾意紅豆o架，所以呢個係我首選，好好味o架~~得分：

朱古力：我平時都唔太喜歡朱古力o架喇，但呢個朱古力good喎~~中間有啲好細粒的啫喱o架，好得意咁~~得分：

軟心朱古力：說真的，本來諗住唔試o架，但好彩試咗o乍~~因為真係好好味喎~~連我呢個唔鍾意朱古力o既人都話好味呢~~得分：

咖啡：哈哈，咖啡係我平時最唔鍾意o既口味，我唔飲咖啡甚至連聞到咖啡味我都唔覺得香......但係，cake 2真係勁呀，我覺得呢舊蛋糕好味喎~~起碼如果要再食多一件都ok喎~~得分：

後來佢仲比咗2件糖霜糕我哋試，一件係檸檬味，一件係朱古力味，第一啖食埋個糖霜皮，開頭唔覺得甜，但真係到啲糖霜皮溶晒o係口，真係覺得太甜了，no way~~

一邊食，職員仲會用o個個勁大o既screen比我哋睇o下唔同類型、層數的蛋糕係點o既~~

最後，我哋揀咗Cream cake，12-15磅，1磅大約可以serve8個人，三層高可以有三款唔同味，如果係12磅，就大約係頂層1磅、中間o個層4磅、最底層7磅，佢仲suggest我哋留起頂層帶番屋企食tim~~不過我哋已經錯過咗之前的promotion有8折，而家無喇......落咗$1000訂，款式同味道都可以留待婚前一個月先confirm~~

雖然未揀實咩款，不過既然城堡大比數勝出，我哋又點會唔用佢呢？

因為cake 2的城堡cake topper只係剩番兩個，我哋根本就無時間猶疑，都係乖乖比咗錢喇.....好貴呀其實......等於3.2磅蛋糕喇.....不過真係好靚o架，去片~~

多謝查理斯又一次縱容敗家小女子~~

原先o既城堡係用鏍絲固定咗o係個聖殿入面o既~~真係超靚~~

但可以拆出來，而且可以著燈~~做完cake topper仲可以攞番屋企做裝飾tim~~(自我說服中)

同我哋個城堡好似o架~~