中咗獎免費影Pre-wedding(Part 1)

唔知幾多個月前睇婚紗雜誌見到話寄番張表格番去，有機會免費影一輯pre-wedding~~估唔到，今日我收到個e-mail話我哋真係抽中咗呀!!!!!!名額得3份o乍喎~~

但係....要o係9月中前影喎~~crazy~~

同查理斯商量o下又打電話去問問詳情先~~大家有無聽過呢間嘢做咩o架？會唔會呃人o既呢？

打咗電話去問喇，補番個後記先~~

打咗去兩次，都係留言，咁唯有留言啦，到七點幾，職員阿Ling打番o黎，佢好nice，解釋好清楚，詳情如下：

免費項目

1. 呢個package本身價值$6xxx，包影150張相，全部底片會比番我，如果影多過150張，都係會免費比番晒我，地點會係佢哋深圳福田的影樓另加內地景點(我哋自己揀)

2. 包30張入相簿及修相

3. 包男人女人化粧set頭、禮服，男人唔包恤衫鞋，女人唔包girdle同鞋

收費項目

1. 車費：視乎景點而定，深圳境內的要$500-800一日，廣州例如百萬葵園或者再遠啲南海影城要$1200-1400一日

2. 景點入場費：除咗我哋自己之外，仲要我哋比埋司機、攝影師、助手同埋化粧師的入場費，除非我哋揀世界之窗就我哋自己比自己可以了

3. 改期影：如果即日先改期(無論係因為天氣或者其他原因)，要加錢$500-1000

問題係：

1. 要8-9月影，天氣真係好曬好熱，大大大太陽底下的我們不會拍出活潑青春陽光氣息的，只會拍出喪屍般的黑口黑面....

2. 我哋打算揀最平的plan，即係世界之窗，因為我哋講咗好多年但都未去過，景點入場費又平，又唔駛包工作人員，咁即係連埋我哋上深圳的車費，都係大約$1000 o者~~但影出來會唔會好老土呢？

3. 8月查理斯好忙，閒日請唔到假，但係9月我番新工，完全唔想亦唔可能請假，所以一定要8月影~~而家打算下星期日影，星期六去試衫，(不過未confirm唔知有無期)，加上阿Ling唔建議星期六日影，因為超多人，我哋甚至想，不如當我哋只係著咗婚紗去遊世界之窗，行到去想影的景點咯，咪佢搭住我膊頭好似平時去旅行影合照咁囉~~

4. 呢輯婚紗相應該會收o係床下底，試問有邊個會o係肥胖高峰期的時候去留倩影o架？都唔知佢啲禮服我哋著唔著得落.....

5. 曬完之後我的濕疹會唔會惡化呢？呢排先叫做好咗啲，如果又因為曬完而衰咗....咁咪得不償失...

6. 好友話其實都只係少少錢，但係可以讓我倆有個實習影相的機會，試o下比人影 / 擺pose對望的感覺，咁之後自己比錢影o個啲就會好啲~~

好苦惱呀~~我患咗五時花六時變一時一樣又驚曬又驚後悔後群症呀!!!!!!

換著係你哋，你哋會唔會去影呀？

*************************************************************************

一場歡喜一場空

星期六打咗去約時間，由於查理斯閒日真係無咩可能請到假，所以我哋只係得番星期六日可以影，又鑑於要早一日上去試衫，即係得番星期六揀衫星期日影相，原先佢話要8月內影，29號查理斯可能要出trip，即係得番22號，但係佢哋無期lu.....原先佢話9月5日都可以的，但係.....要影成日....我驚影完翌日番唔到工喎....所以都拒絕咗.....我好蠢呀!!!!!!口快快同佢哋講咗話唔要喇咁.....查理斯話佢要今個星期中先知29號係唔係真係出trip，如果唔係就有得去影啦.....早知book咗先啦.....而家就算佢真係唔駛去，人哋都唔會比番個期我哋啦.....

其實唔知係咪雜誌同呢間shop溝通有啲問題，呢間shop話佢哋係定咗6-8月影的，但我收到的notice係9月中前喎....咁後來阿ling都話佢同公司講咗，最盡都係要9月中前啦~~~其實由收到notice到影相要一個月內完成，真係幾趕o架....不過呢啲都係gift，無得要求同強求~~但我只係覺得，間shop都係想宣傳，點解唔再大方啲，限半年內完成拍攝呢？而家收唔到宣傳之效，無咗口碑，唔係仲唔好咩?

無法子啦.....自己度唔到期.....不過真係要多謝一班blog友仔好真心的幫我諗諗如果真係join要留意啲咩~~比咗好好的意見我呀~~雖然今次未能成事，但我都會mark低呢啲有用的資料，提o下自己又提o下人哋啦~~多謝晒你哋呀!!!!!

預告一下先，星期六我哋又快快手cofirm咗男禮喇......下篇會寫詳情~~

***************************************************************************

希望在明天

查理斯真係好好好好o架~~佢睇咗我篇blog，知道我真係仲心思思想去影相，所以lunch時話我知一係book咗29號先啦，我話咁樣衰我唔打去o架，查理斯又肯打去喎，仲o係佢邊食飯邊打去同佢講o架，佢話而家book咗29號喇~~yeah~~

天呀....可唔可以唔駛查理斯出trip呀~~