第一針

尋日要去銅鑼灣皮膚覆診，所以順便去埋之前已經o係婚展book咗o既毅力醫護健康集團(Kinetics)打預防子宮頸癌疫苗，我揀o既係阿GEM做代言人o既卉姸康~~

由於o係婚展Book，只需要$2700三針，加送以下其中一項：

1. 柏氏抹片檢查一次，由護士取樣本

2. 2009-10年度流行性感冒疫苗一支

3. 身體檢查一次，包括：全血圖、谷丙轉氨酵素、丙氨酰轉肱酵素、尿素、肌酸酐、總膽固醇酸甘油脂、血糖、小便常規。

我揀咗第3項，因為第1項唔駛做住，第2項之前打過又發燒，o個年仲多咗感冒....所以就揀咗第3項喇~~第3項唔一定係你自己本人做o架，佢話比親人朋友都可以o架~~

好喇，講番第一針o既經過先~~

我約咗2點，1:50pm上到去...烏燈黑火...原來佢哋1pm-2pm lunch，所以唯有好無聊咁搭lift落番去o係SOGO行一圈又上番去啦~~

上到去填咗少少資料，就有姑娘帶我入房坐低，佢好nice o架~~

首先又係要填張聲明，然後佢會re-confirm我係揀卉姸康，再o係我面前拆開個疫苗盒，攞咗o個支又長又幼o既針筒出o黎，同我對一對個製造日期同埋到期日，然後......都仲未落得針呀，因為佢話佢要整暖啲疫苗先，咁打落去就會快啲吸收無咁痛~~

但係當我見到佢兩隻手不斷咁搓支針筒時，我個心由唔驚到有啲驚......佢仲會不停重複打呢支針係痛過打其他針o架，而副作用可能係發低燒同埋針口紅腫、疼痛，但如果有以下幾種情況出現就要即刻去睇醫生喇，分別係發高燒(40度)、抽筋至反白眼、氣管收縮呼吸困難...(仲有一樣唔記得咗~~)，因為佢都驚我會係一百萬分之一o個個對呢隻疫苗敏感o既人~~佢叫我將個疫苗o既盒袋o係手袋，至少袋3日，因為怕有副作用出現時人哋都知我打咗呢隻針喎~~

好喇，然後呢佢問我想o係邊個部位落針呀...(我心諗：原來有得揀o架....但咁大個人仲揀打pat pat會唔會好尷尬呢....) 姑娘真係好好耐性又好細心咁講解一次打針o既部位比我聽呀，佢話打針係要打o係肌肉度o架，咁可以有4個部位選擇，1. 上手臂 2. 大脾 3. pat pat  4. 近盤骨位置有舊肌肉，佢仲有張圖片示範比我睇o架~~真係好pro呀~~

終於，都到戲肉喇，佢問我揀邊隻手，我話右手啦，因為左邊要揹袋(我係唔識得用右邊膊頭側揹袋o架....唔准笑呀!!!!) 坐好位置，佢就問我點解揀佢哋公司o既？我話o係婚展見到同埋網上評價都好好，所以揀佢哋，然後我見佢唔應我，咪望o下佢囉，佢叫我唔好望佢繼續講o下啲評價係咩好，咁我就bilibala咁講啦，然後...佢已經打完幫我貼膠布喇....哈哈，佢分散咗我注意力，所以只係覺得有少少痺o既感覺，唔係痛....呢個姑娘真係抵讚呀~~

佢提我要o係一個月之後o既一星期內番去打第二針，到時再電話預約啦~~另外，佢仲提我可以o係下次打第二針時做埋個身體檢查，跟住我就好疑惑喇...以前細個要驗尿姑娘都會比定個藥水樽裝住o架喎，但如果今次要我預先預備，我無樽喎...同埋運送過程中如果o係我個袋度倒瀉咗咪大鑊....後尾姑娘話原來去到檢查時先裝o架，唔駛o係屋企留定o架....哈哈，即刻放心晒呀~~

不過由小學後期開始，每次打完針我都會好頭暈o架，試過暈到行唔到要o係診所瞓一陣.....所以大個咗就病到死都唔想打針....今次打完都有啲頭暈暈o既感覺呀，但就唔會行唔到(至少打完針之後我可以由港島番到北區)，個傷口又無佢講到咁痛，係有少少少少好似肌肉痛咁啦...都無腫吖~~好彩呀!!!!

總括o黎講，今次打針之行都好順利好滿意啦，所以婚前檢查應該都會book呢間做埋喇，上次婚展的價錢係$1280 for 2~~