金絲雀2010大事回顧

見到新聞電視報章雜誌都開始有2010大事回顧，等我金絲雀都數一數今年發生過啲咩大事先~~

1. 因為寫Blog記低籌備婚禮點滴，承蒙各位厚愛稱呼民女為金絲雀，我好喜歡呢個稱呼啊~~即刻想用金絲盛宴作為我哋婚禮的主題呀~~

(yeahyeahyeah~~你哋都贊成我用呢個主題哩？有你o既幫助我哋會搞得盡善盡美，如想贊助金錢或物資，請私留比我~~你o既慷慨將紀錄在我家o既大恩人名冊裏，第日笨啦啦同菜菜子都會歌頌你o架~~)

2. 九月轉咗另一份工，對我o黎講都只係由一個位於屯門背牆o既位搬咗去另一個位於元朗背窗o既位，上班的時間有9 成都在盡情上網淘寶煲blogMSN睇MyTV!!! 真係想講一句：雀復何求~~ (求求你，千祈唔好告發我呀!!!)

呢份工8月尾到期，我成日都諗，就算餘下的日子辛苦到飛唔起(我係雀，所以平日係會飛起，辛苦時應該係飛唔起~~好無聊呀我.....)，我都已經嘆咗4個月咯~~當然啦，我希望呢啲咁嘆o既日子一世都唔會完，最好延續到我下一份工同下下一份工，直至查理斯養得起我做少奶奶o既日子，阿門。

3. 與同事關係充滿變數o既一年，我每做一份工都可以將同事的關係變成朋友，我亦很珍惜這些有緣才能轉化o既關係，但係，今年，來到尾聲了，我卻為著某些關係而囉囉孿，比同事o係FB Block咗我睇唔到佢哋o既updates，令到自己亦有幾次衝動想Block番佢哋，但諗深一層，放得o係FB的都係好普通好普通的心情狀況/發up風，究竟有咩唔比得佢哋睇呢？同埋原來要Block佢哋我係要重複又重複咁click同一堆人名，好幾次當我更改到一半的時候，我就放棄了，如果已經去到唔比得人睇o既地步，不如乾脆delete咗佢啦，多謝呢啲人為我而花時間更改設定，但我唔會，話唔埋有日心情差勁，我會毫不猶疑咁delete delete......

學習緊放開，學習緊做豁達達人，呢個世界人揀我我揀人，希望呢啲人同埋事唔好再潛入我個夢打搞我，浪費咗我發夢同拉姑柏芝去cova嘆hight tea做少奶奶o既quota~~好，Next~~

4. 比衰人校長照肺多次，讓我發現自己好"long黎"o既一面!!!(佢有幸見識我呢一面喇~~) 唔知從幾時開始不畏強權不怕炒魷據理力爭聲大夾惡駁咀駁舌，雖然好無稽，但大概就係查理斯o既求婚戒指吧？每次看著無名指上的閃鑽，都覺得自己額外幸福，我可是半島新娘啊!!!!(突然間虛榮鬼上身) 我唔係等你呢份人工開飯o架，你呢個刁民點解處處為難挑剔我？我嚥不下這口氣，一定會同你對著幹!!! 但係佢真係好奇怪，明知每次都輸比我，但都要單挑我!!!! 唔通佢想我train-up佢？

後來有次買咗啲水果番去探舊同事，呢個cheap精落咗order比門房工友，以後見到我 + 某啲離職員工 進入/疑似進入校園都要立刻通知佢，聽到呢個消息讓我開心了好一陣子，o個間學校位處大街，佢間房出面係行人路，如果我得閒，只要日日o係佢窗出面行來行去，真係可以玩死佢o架喎，不過，我唔會咁無聊，就由得佢成日驚驚青青望住個窗啦~~

5. 認識咗一班好好好好o既B2B，尤其係同我一樣o係半島擺酒o既新娘子，好多人都覺得能夠o係神級酒店擺酒的都是超級有錢人(坦白講句，有啲jm真係....唔係窮鬼~~)，而有錢人唔會咁得閒去煲blog同埋答人哋問題，甚至會覺得你擺得o係度就唔好慳o個一萬幾千啦~~ 但係你哋唔嫌棄我成日東問西問都係為咗慳錢同埋R多啲著數，你哋無私o既分享真係令我好感動!!! 好多謝好多謝你哋呀~~ 

仲有一班同我同一日大日子o既靚女s，雖然只係見過一次面，但係你哋已經o係我心入面佔咗一角喇，我成日都會諗，大家好揀唔揀，都揀埋同一日結婚，為我哋o既相識埋下伏線，期待在這不足一年的日子裏，我哋可以並肩作戰~~第日再一齊分享Mother-to-be o既喜悅啦~~

6. 陸續收到B2B的邀請出席觀禮，其實好多我都未見過面，但民女有幸被你哋邀請成為你人生最重要一刻的見証者，我真係好開心~~ 可能係因為自己都就快會朗讀o個段誓詞，所以現在每次聽起來都眼濕濕.....

又開始收到各位靚太變身M2B的好消息，每次看到這些分享都好興奮~~就好似為自己將來上定一課先咁~~

7. 濕疹狀況持續好轉中，都唔知點解突然好番咁多，而家啲手手腳腳都唔似有過濕疹喇，只望啲印快啲退埋佢兼唔好番發，等我大日子時可以少樣嘢煩~~

8. 金價狂升，到今日已經係$14250!!!! 年頭都仲係$10900 o乍~~好彩未來6299同媽咪已經買咗，但萬二o既時候我叫爸爸睇定啲先，對於我呢個陷佢於不義的超級不孝行為深感內疚，唯有希望盡量說服到佢買輕手啲啦~~

9. 籌備婚禮過程陸續得獎同抽到獎，屢次開口中令我勁後悔點解唔講話：酒席免費!! 影咗輯免費的婚紗相，沒有別人講o既甜蜜難忘，由開初o既打算收埋o係床下底到而家敢擺上枱面顯醜，我覺得自己好勇!! 排版同韓式掛畫都收到了，因為唔駛錢所以我哋係勁滿意，甚至令我一度想出售未影o既3v package呢~~

10. 由開初決定結婚到而家剩番唔夠一年時間，由最初想時間快啲過到而家希望慢慢來，年頭好梳爽咁BOOK呢樣o個樣，到而家其實所有要book o既都book咗喇，但開始要諗細節真係一諗起都覺得又難又煩，搞到個人好易忟憎豬~~ DIY項目有好多，但實際完成o既得....手花一朵!!(效率真高)~~

已經開始睇住時間做人，緊張焦慮隨之而來，而家開始煲緊另一個大project──裝修，可恨呢樣唔可以DIY，慳極都係要付出，真係諗起都頭痛~~ 這一年瘦了少少又胖回去(如果你話啲錢好似磅數咁幾好呀，洗咗少少又升番多多)，真係要斬手指節食先得喇!!!!

11. 呢樣係未發生o架，但講明係2010大事回顧o麻，呢個必然要記低!!!! 2010年12月24日平安夜，我可以去睇劉華演唱會啊~~~呵呵呵呵呵~~~$480飛啦~~~真係忍唔住想對劉華唱番句：台下我說吃粥吃飯還是嫁了做闊太，仍是愛你一世未轉軚~~

回望2010，好似"her"一聲咁就過咗，覺得o係呢一年自己成熟咗好多(唔係外表呀!!!!係諗法、諗法~~)，但另一方面又多咗好多古靈精怪o既諗法，好似分裂咁呀!!!! 不過仍然為這一年感恩，不同的經歷讓我更覺得我擁有的很多，我有愛我o既查理斯同埋屋企人，就連未來6299都好錫我，呢啲係我o既福氣~~我會好好珍惜~~

2011年應該會係我人生中最值得記取o既一年，我會常常幻想march-in撟住爸爸隻手o既一刻、宣讀誓詞o既情景，每回想起都好感動自己~~但在這之前我要反回現實好好預備，好o既壞o既都係我哋一齊o既經歷，只係好希望下年回顧o既時候仍然覺得2011年會係我人生最想重複過o既一年，今日起我立志要做隻快快樂樂充滿正能量出嫁o既金絲雀啦~~God Bless Me~~