屈到病(updated)

好嬲好嬲好嬲呀!!!!!

事源星期一查理斯放假，我哋好耐都無試過閒日一齊出街喇，但係夜晚又同唔到佢食飯喎，我平時係放5點o架，所以打算攞2個鐘頭大假即係放3點啦，咁我約咗4點o係尖沙咀Monarch就剛剛好喇~~

但係，我而家對於自己呢個行為深 感 後 悔！

我直程覺得自己活咗咁多年，第一次做咗一個咁愚蠢無知白痴仲衰過特首個八萬八o既決定！

話說呢度唔同人有唔同o既假期日數(同人唔同命、同工唔同酬大致上都係咁解)，

有啲IT同事所有學生假期都唔駛番工放老師假，

有啲Office o既同事就放三分二o既學生假或者三分一，

最慘o既莫過於我呢啲新o黎新豬肉(直程當我係水魚呀!!!!)，一年先得7日大假。

(直程想即刻起程去特首辦門外扣三個響頭多謝香港政府立咗法例，如果唔係莫講話7日，我估連紅日都要番工)

咁我做過幾間學校，通常呢7日都任得你幾時放，但當然校長唔會想你o係學生上課日狂攞晒呢7日啦(亦都無人無事做又會咁痴線)，遇上紅白二事，基本上佢都唔會留難你o既~~

因為我唔想比呢度啲三姑六婆知道我出年結婚(費事有時攞病假都比人話我詐病去咗搞結婚嘢 兼 引起一眾適齡/超齡又未婚o既同事議論紛紛)，所以我今次入紙申請呢2個鐘頭大假o既理由係：親友結婚行禮

攞住張假紙去校長房打算申請又見佢閂咗門，我就得意洋洋咁拜託同事幫我o係佢打開門時放入去啦~~點知，同事一睇到張假紙就話：o下，呢啲佢通常都唔批o架喎！

寫到呢度，條氣都chok住chok住，唔寫住喇！

************************************************************************************

首先真係好感激咁多位o既留言安慰呀!!!!!每人醒你哋一啖先 多得你哋，我而家無chok住喇，可以寫喇~~ (懶你就懶啦，寫到一半走咗去.......)

簡單啲講啦，呢張假紙去到校長手後佢好快就召見咗我，見到佢皺眉皺到夾死烏繩咁我都知今次踩屎！

佢講咗一大輪主要都係話o個日係上課日所以通常都唔批，咁佢問我貴親結婚我咪老作話係表姐囉~~

佢居然話紅白二事都係直系親屬先批o架，咁如果你有好多個表姐咁點呀 (雖然我即刻答佢話我得一個表姐但事實係我....無 表 姐！同埋如果係白事的話我呢一世都唔希望你會有機會批比我)

我都唔係省油o既燈，所以都夾住烏繩咁問番佢：唔可以扣大假o架咩？佢又話唔得喎，然後講到皇恩浩蕩咁今次額外比我去啦......

我差啲真係要跪地謝主隆恩呀！

然後戲肉o黎喇，佢遞番張紙比我話要寫番係邊個結婚，我咪括住寫(表姐)囉！

佢一睇又皺眉比番我話唔係咁寫呀，我都忟忟哋喇，咁寫乜(Q)呀？

佢話要寫即係邊個個女喎!!!!!

頂你頂你頂你頂你，我個心大約頂咗佢10次之後隨口up話"大姨媽呀"

佢居然話要寫埋落去喎，我咪再o係(表姐)旁邊寫 "= 姨媽個女"

跟住佢想伸手攞，我又醒起

「呀，寫得好口語tim，應該係"姨媽的女兒"」

講完呢句佢塊面真係黑過鑊底呀!!!!! wakakakaaa~~~~我正一衰女包，專玩嘢o架，鬼叫你留難我呀!!!!!

初時我都估佢係額外批比我，唔會扣我大假先咁煩，但原來結果佢都係o係假紙上面寫咗扣假，咁都好吖，即係大家都無著數到，我無欠佢嘢~~

但係，令我最後悔同煩躁o既梗係唔係校長呢啲小兒科嘢啦~~

話說佢批咗呢張寫住咗"扣假"o既假紙之後，跟住o個幾日A+B+C同事大約再問咗我70個7次幾時番多2個鐘補番比學校，我澄清話係扣大假喎，o個個師奶又話"o下？你啲大假要暑假先放得，咁咪要同你記住記到暑假囉"

我心諗：邊叉個叫你記住呀？有假紙有文件唔駛用腦記o架喎....但唔好修養o既我居然無 出 聲。

佢可能都意識到自己講錯嘢啦，又話"有文件都煩啦，不如你補番2個鐘比學校仲好啦"

不如你唔好做番屋企瞓覺仲好啦!!!!

忽發奇想：

要直系親屬有事先可以請假，

咁如果無兄弟姊妹o既同事o既父母同祖父母大概都會結幾十次婚

因為佢哋都屬於直系親屬~~

但我又好想問同樣身為女人o既校長

假設你男朋友個哥哥結婚

你覺得你可以因為未來老公個哥哥未係你直系親屬而同你未來奶奶講話o黎唔到嗎？

你覺得你奶奶會唔會黑面黑你一世呢？

又既然攞大假係咁麻乜煩煩o既事，

咁之後所有影pre-wedding同埋去揀衫我唯有

屈 自 己 病 啦~~