我在學校遇到的騎呢群(上篇)

o係學校打滾咗7年，每一年end contract o既時候都同自己講，搵番私人公司啦，結果，每一次都敵唔過金錢利誘，回到學校去。

有很多很多想講。

最好不要編我上8點或更早的班，那段時間是接電話高峰期，而我個腦處於仍然睡眠狀態，唔係咁適宜做呢啲咁要耐性的工作~~

學生老師職員請病假都o係o個段時間，所以唔好質問我點解打咗好幾次電話都唔通，學校唔係東華捐款熱線，無一百幾廿條線等你打o黎，如果你想方便啲最好係：唔 好 請 假！

我接咗電話後你最好能夠o係10秒內報上名來，唔好依依哦哦一大輪都講唔到你想點，你咁o既舉動會直接將我從沉睡中喚醒並 令 我 著 火!!!

其實唔駛話我知你係傷風感冒發燒肚痛經痛胃痛頭痛定出水痘，我可以私底下為你作個好好睇睇o既理由(例如.....性病.....大抵你呢世都唔會想坐你隔離o個個有呢啲病o掛？所以無人會掛住你幾時番學/番工，你可以安心休養)

如果學校教職員都有制服可穿，大抵都不是壞事。

至少我不用每天清一色的連身裙 + legging，活像一個大肚婆 (雖而我肚腩真的很大)

更不用看到那些後生/ 自以為後生 / 扮後生的老師那條僅僅蓋住patpat的所謂連身裙/長tee + "勒"住patpat的超緊身褲~~

你覺得很離譜嗎？

我見過更礙眼的吊帶背心(唔加外套) 、 熱褲 / 迷你裙 + 3個骨襪、透bra帶喱士裝、陽光底下好似著透視裝咁o既see through連身裙!!!

男生要對miss有性幻想嗎？不用回家看日本AV了，上課時扮專心盯著老師就可以了。(現今呢個世代，有些男生盯著的可會是阿Sir？)

做背囊生意的不用怕經濟低迷啊~~

男教師都喜歡揹背囊，牛龜咁大個人著住恤衫西褲都揹背囊......大抵佢哋都好懷緬做學生的日子。

老師都能言善辯。(但卻不喜歡帶辯論隊)

你問佢做咩過晒deadline都唔交文件？佢會話佢唔知要交。

不如你話我知你唔識字啦，你係o黎教手語o既，所以你睇唔到/ 睇唔明貼咗o係你電腦o個十幾張催你交嘢的memo~~

你問佢做咩著住對人字拖o係大堂巡更？

佢話比隻腳透o下氣，入課室會著番。

既然你知道對住學生要端裝整齊，點解你覺得o係人來人往的大堂你可以著人字拖？!!!!

同埋，當你除埋襪著人字拖o個一刻，我如果坐你隔離，我會即刻填早退紙，理由係：毒氣侵襲。

我聽得最多老師都會講o既一句說話係：你就好啦！

唔好羨慕我有7日大假。

你大概有70天假期。

唔好酸溜溜咁話你哋OT無得補假，

好，補比你！

上課天唔放得，請問你揀幾時放呢？

聖誕新年復活暑假你 都 本 身 在 放 假 了 !!!!

有個無賴同個TA講你就好啦帶完隊有假補，我都無得補

TA話我人工低你好多喎

無賴話咁又唔係咁計o既

咁呀皇上，請問係點計呢？

如果比老師發現你工作效率高

恭喜你

你大抵一日9小時都會很充實

佢會同你講你做得咁快不如你幫我做呢啲呢啲同o個啲

我試過連佢哋份master功課都係我打o既(初時以為係學生筆記，可想而知佢份功課的質素......)

誰說老師的生活很沉悶？

空堂的時候到教員室走一轉

老師都在看股票 / 傾電話 / Facebook / 瞓覺 / 睇youtube !!!

我見過有老師坐o係自己個位一邊責罰學生一邊玩接龍!!!

每當看到電視有教師遊行聲討工作量過大爭取呢樣o個樣

我個樣應該都變得好鬼衰

如果減去你當班主任及其他一切行政工作

你敢用人頭擔保多出來的時間你都在備課進修關心學生與家長多溝通為學校謀福利嗎？

老師都很團結的。

就算中文科老師平時都分裂成五代十國

遇有活動要科組負責時他們都會槍頭向外

看到很多師生戀的新聞很出奇嗎

聽聞我上任校長個老婆係佢個學生

有很多阿sir miss不避嫌搭男生女生膊頭交換msn facebook深宵傾電話假日sms

這些是他們親民的舉動關心學生的表現

呀皇上我明白你唔需要每事都同我呢啲奴婢講聲

但如果你係約見咗某某家長/書商/收咗學生部手提電話/叫咗外賣

麻煩你都講低你去咗邊吖

我唔想搵勻成間學校都唔見你而你又係空堂打你手提又唔聽又唔開得中央咪呼喚你一陣校長問你去咗邊我都唔知點答唔通話你應該去咗食brunch或者high-tea

然後家長等到發老脾你先施施然咁撩住牙出現話 你 一 直 都 o係 學 校 (好好好，做奻婢的我還欠沒有每格厠所/每個垃圾埇查看是我不對，大抵我搵你時你只可能藏身這些地方了)

如果你貴人事忙唔記得自己幾點上堂落堂麻煩你約家長時等奻婢幫你代勞

唔好約咗人哋朝早人哋請晒假o黎到學校拜見你時你先話你成朝都無空堂

人家可能係冒住比老細炒魷的危機來見你一面啊

 

做老師的看到我寫的都很激氣吧？

當然亦有很多其他專業 / 非專業人士都會有以上的情況

不過

至少

我認為

老師要言行身教

外貎言行行為舉止連行步路都應該可以完美一點吧

 (至少在我幻想中可以再做好一點)