民女變金絲雀有感

差唔多倒數一年，亦籌備咗一年，好多o既感受，就趁今日得閒(有邊日我係唔得閒o既呢？)快啲記低咗先~~

由舊年11月訂咗場地，陸陸續續同朋友同事提起出年會結婚(有時唔係自己存心講，但人哋問起又點唔講呢？同埋講得話幾時結婚，啲人就自然會問o係邊度擺酒)，通常都係聽到o個幾句：

「嘩，半島呀！咁咪好貴囉？要幾錢呀？」(貴o既定義係咩呢？以往三千幾蚊一襾金你話貴，今日已經係$13400喇，你仲覺得舊時貴唔貴？唔知係咪想資助我哋呢？)

「嘩，半島呀！你真係有錢呀！」(nonono~~你睇我一身打扮就知我係咪有錢女啦，你個箍臍銀包等於我全身的價錢了~~)

「嘩，仲有咁耐，駛唔駛咁早book呀？」(駛~~如果你揀o既係閒日/農曆7月/名不經傳的酒樓，你可以試o下大婚一個月前先問有無位)

「嘩，半島呀！我到時著咩去呀？」(嗯....係咪真係比我話事先？女o既太空裝，男o既蘇格蘭裙啦咁~~因為我未同過著呢啲衫o既人影相呀~~)

嘩!嘩!!嘩!!!嘩!!!!嘩!!!!!

當然啦，亦都有過半的朋友同事聽到呢個消息係真心鄧我開心的：

長輩通常話：「嗯，都係時候啦，結完快啲生個B，好快就幾廿年o架喇~~」(嘩，你咁講我好驚o架喎，好似婚禮之後我就要趕住book長眠之地咁)

朋友通常話：「真o架？好嘢~~有咩幫手記住出聲呀~~」(然後我見到每個人都眼濕濕)

從小到大，半島對我o黎講咪就係：「民女與狗，非請勿進」，亦由於我一直都係o係普通家庭長大、平民學校讀書、邊緣社區就業，所以我的家人、朋友同事都會有我呢種感覺，我哋幾個中學同學甚至覺得去半島high-tea真係要大個咗出咗雙糧先會鼓起勇氣捨得做o既事~~

講到呢度，大家都唔會再質疑我係民女的身份喇~~

咁係咪以為我飛上枝頭變金絲雀呢？(鳳凰太普通了，jm都叫我金絲雀的~~)

好多人都問我查理斯係咪好有錢o架？無錯，佢係好好好好有錢o架！── 假如大富翁o個啲錢真係可以用的話~~ 佢仲擁有幾個火車站tim~~ (不過而家的大富翁已經有世界版，話唔定第日我有幾個油田呀~~哼！第日我會寫「民女變油王有感」~~)

其實我哋都係最普通的平民百姓，香港已經唔知有幾多個 % o既人係百萬富翁，但係我哋，連條邊都掂唔到，我哋只係剛由赤貧線上番去正常線的一群，所以唔好諗住

1. 執平嘢唔話我知 (如果比我知道咗我會強搶番你買咗o既平嘢~~知驚哩~~)

2. 同我出街要有Candle先算係Dinner (印象中Candle night dinner食過一兩次o乍)

3. 綁架我哋 (哈哈，如果你咁諗，你真係要練大隻啲呀，咪一陣連拖我哋上車都有困難呀~~)

揀半島只係因為 1. 係酒店 2. 圍數少 3. 負擔得到的min.charge

貴咗酒席我哋又o係第二啲items o個度慳番，例如

1. 大日子攝錄，我哋無揀o個啲好出名要幾萬蚊o既攝影大師 (阿Jan，我唔係話你唔出名，不過我book你o既時候你仲係半紅不黑，如今，你紅到發紫了，好嘢自然多人欣賞啦，我亦好慶幸我慧眼識英雄，否則，今日你的價錢我都book唔起了)

2. MUA，我心中星級化粧師係Man CHAN，但知道價錢之後何止打退堂鼓呀，直程連佢啲ref. photo都唔敢再睇怕中毒太深呀~~

3. 佈置，鮮花佈置我哋都諗住DIY，如果真係用Solomons o既鮮花，價錢大概夠我起一個小型花園了~~

近來同個唔算好熟o既朋友傾開結婚事宜，佢總係半帶酸溜溜的話：你就好啦，可以擺半島！你哋好鬼有錢呀~~你好似都識好多人擺半島喎，介紹我識吖？

我話：我識o個啲都係待嫁新娘，介紹比你識做咩呀？

佢答：咁識識o下可能我識到個有錢人，第日可以嫁個有錢人呢~~

我話：嫁個有錢人有咩好呀？最緊要嫁個佢愛你你又愛佢o既人o者~~

假如你經歷家道中落、屋企一家大細等住你養、要破柴擔水咁辛苦，咁你抱住嫁個有錢人之後唔駛做的心態我完全明白！

但係......莫講話呢位朋友已經成四張嘢，有個拖拉咗十幾年o既男朋友，你啲咁o既心態唔付出無真愛無真心，就算比你靚到天仙咁，你估啲有錢佬食塞米o既咩？得手之後你咪又係花樽一個~~

我真係唔係坐o係度就有個王子騎馬o黎話娶我o架，我真係付出過好多愛同眼淚先o黎到今日同佢開花結果 (如果大家唔怕悶，可以睇o下網誌分類──「往事不需回味」)

如果你咁o既心態都有個有錢佬肯娶你肯愛你，咁恭喜晒，希望o個個人唔係o係聊齊o個度走出o黎o架啦~~

呢一年以來，我同查理斯都好開心咁一齊籌備每一個細節，我相信你會係一個好好o既老公，因為好少人會好似你咁每事管 (成日都講住話唔可以揀心型胸的gown)，小事如製作手花同埋玩熱風槍你都同我一齊整~~呢個感覺好warm好感恩~~

而好多過來人講o既為婚禮拗到面紅耳熱的情況尚幸沒有發生在我倆身上，多謝你每次聽到我話「好靚喎」、「我鍾意呀」呢啲咁敗家o既開場白你都唔會借耳聾同埋黑面，反而都係保持住一貫作風「傻囡，你鍾意咪得囉」、「傻囡，你開心就好啦~~」

餘下差不多一年時間，我明白好多問題怪獸都會陸續出o黎對抗我哋，希望我哋係例外的一對，唔需要為婚事傷和氣，我唔係要一個完美兼人人羨慕的婚禮，我想要的，從開始直到將來，都只係你的一聲「我願意」啊~~