一次冒險的聚會

2個星期前獲邀請出席B2B的聚會，嘻嘻，係我o既第一次啊~~

(唉.....其實一直好羨慕人哋可以一班B2B一齊去睇衫講價攞料，但係查理斯中晒警訊毒呀，成日都嚇我：

「一陣你比人劏肚呀」(我得脂肪o乍喎，如果佢哋咁幫手我真係多謝都o黎唔切呀~~)

「或者落藥整暈你」(佢整暈我又好難抬走我喎.....)

「呃晒你啲錢」(我唔係阿婆呀!!!!!同埋我 無 錢!!!!)

...........

好好好，各位，我係冒住生命危險去赴會的──

未怕挨緊頸邊穿過橫飛的子彈跟你去.....dinner，ok？)

約咗今次聚會入面唯一一個同我一樣係20111120的changwong一同赴會~~

等緊佢o既時候我有啲緊張呢，因為我係一個近視又唔戴眼鏡o既死 人 頭！

基本上10米以外o既世界都係好美好o既(因為根本睇咩都好似加咗soft鏡咁~~)

又由於我只係記得chanwong係高高瘦瘦好鬼fit的，但係放眼望去，高高瘦瘦佔咗8成喎，究竟佢認唔認得我呢？我哋又無講話著咩色衫同埋用咩物件做記認喎.....

由於未到約定時間，我咪行o下H&M先囉~~一路行一路都好緊張，究竟佢會唔會就係我左手邊呢個呢？定係右手邊o個個呢？如果其他出席聚會的jm都係行緊呢度，佢哋會唔會已經認得我呢？唔....咁我都係唔好隨便攞起啲誇頭飾放上頭度併喇，我通常都係睇完玩完又唔買，一陣留咗個唔好o既第一印象就唔好啦....

等咗一陣，見到迎面而o黎有個好清秀的女仔望住我笑喎(我梗係要扮淡定只係咁微笑，免得一陣搞錯咗人哋都唔會以為我神經病~~) 好彩，佢係chanwong呀~~(嘻嘻,佢有啲似陳慧琳o架~~好 羨 慕 啊~~)

去咗砵蘭街食天機棧，多謝統籌jm Silvia訂位，餐廳氣氛好好呢~~

到揀咩食o既時候，我話食過炭燒豬扒好好味~~結果....個個都話咁豬扒啦....(我個心勁驚，一陣我覺得好味人哋覺0得唔好味咁點算呢.....好彩，chanwong都話好好味，食完都仲好回味~~)

初時我都好驚究竟會唔會無嘢講呢？哈....後來我發覺係唔夠時間講呀~~

有B2B分享邊度買平嘢、又講o下籌備過程的激氣事~~好快就過咗一晚lu~~

唔知點解，我好快就比人認出咗喇，佢哋話我同Profile個公仔好似......佢哋都話我講嘢好好笑.....(其實好笑o既係我o既遭遇，唔係我，ok~~男人同我gel甲我都唔想o架喎，至於WC呢個idea更加唔係我提議的~~)

我仲遇到一個頂好新娘子~~(頂好牌可以搵佢做代言人~~) 佢對伴娘姊妹的好及包容自問我點都做唔到~~(我一邊聽一邊話要搵麻包袋笠住佢哋毒打~~)

詳細係點又唔係好方便講，我諗咗好耐，嘗試用以下呢個故事去交代啦~~

未來(我唔想用從前呀.....)，太空o既"乜都say yes星"有個公主，佢要去地球開技散葉，並且揀咗幾個朋友同行，因為呢班朋友分別住o係

"麻差煩星"、"獅子開大口星" 同埋 "想星佢兩星"

離公主屋企好遠，公主好為佢哋著想，問佢哋如果出發前一晩，o係自己居住的星球附近book一間太空艙比佢哋好嗎？佢哋商量過後話：我哋要一人一間！

結果，公主唯有包起三架太空船o個朝載佢哋出發.....

呢班星民又話地球很危險，要求一切裝備，結果公主為佢哋度身訂造"戰衣"， 星民又話件戰衣無袋放照妖鏡，地球好似好凍o架喎，最後，佢哋有o既裝備，公主自己都無!!!!

 (不過我堅信好心有好報，心地善良o既人o個種靚係由心而發的~~公主，民女願意為你籌謀，請吩咐啦~~)

睇唔明，唔緊要.....

呢個故事o既重點係：

你 班 姊 妹 住 o係 咩 星 球？

o我個班姊妹全部都住o係"你話事啦星"~~個個都肯任我舞呢~~

係時候為著你有班肯為咗你靚而搞到蓬頭垢面、做你一日妹仔o既姊妹而感恩喇~~