好多人都會好期待自己第一次試婚紗o既日子，但係對於我呢隻肥c大隻o既金絲雀o黎講，莫講話期待都無，反而係好擔心就真~~
舊年3月抱住去見識一下o既心情，去咗元朗婚紗設計師Janny Wong o既流星花園睇Presentation，原本已經join咗歐陸造租1婚紗2晚裝但都係忍唔住再join咗Package A：1褂、1婚紗、1晚裝，過咗一年，星期五終於去咗試衫喇~~
去之前真係幾緊張o架，一來我真係唔記得晒啲衫款喇，抄底咗個名又點都記唔番起件衫個款，二來我估o個度真係無咩衫o岩我著，咁雖然可以pin布，但始終件衫係唔o岩，咁點租呢？
雖然我哋join之前都問過Janny有無大size o既衫，而佢當時亦好快叫助手Iris搵咗幾件show比我睇，叫我放心，而當時o既我哋亦都好安樂咁諗：如果唔o岩著佢係設計師，佢會造比我o架啦，唔駛驚啦~~
但係臨去前一個禮拜，上網周圍睇人哋啲comments o既時候，又有jm話只有join最貴package Janny先會因應新娘子的要求改款重新造一件，咁我點算好呢？弊傢伙喇.....
星期五約咗查理斯同埋家姐陪我去試衫，無叫其他朋友喇，因為路途遙遠，而且都怕越多人越多意見~~
(去之前仲唔識死去咗食田中壽司，啲嘢勁勁勁大份，真係飽到癲咗呀!!!!)
去到Janny度，佢先同Iris上樓預備一下，我哋坐咗o係樓下周圍睇o下傾o下，好快，佢哋就落o黎話可以上去全新裝修咗的流星花園試衫喇~~
上到去，真係嘩嘩嘩嘩嘩不停呀!!!! 因為真係好好好Grand但又好舒服呢~~
(其他jm好似o係VIP房試？而家流星花園裝修咗少少加咗啲燈同貴妃椅，真係好靚好靚呀!!!!)
(講咗咁耐廢話，我終於上到去試衫咯~~)
首先，Janny會問o下我哋o係邊度擺酒同埋行禮，婚禮有無啲咩主題同埋顏色，佢可以盡量配合~~
然後佢問我有無記得presentation時鍾意邊件？可以主力試o個啲先~~
我就懶叻咁攞咗張A4字出o黎 (呢啲係我上網根據人哋文字描述o個件衫而估計自己鍾唔鍾意而得出來o既結果)，講咗幾個系列名，例如Draeming第4版、希臘女神、英國公主同埋優雅名媛、繡球名媛，好衰唔衰，Janny話我睇o個時Dreaming應該唔止第4版o架喇，你係咪網上面搵o架？(哈哈，比人識穿咗.....)
但Janny話唔緊要啦，係咪都鍾意啲Grand啲o既style？
我話主要都係想睇英國公主，因為我mark得最多都係呢個系列~~佢都贊成因為呢個系列啲衫比較襯半島個場地~~
然後佢問我晚裝呢？ (真係弊弊弊，晚裝.....我更加只係記得啲名rather than個款.......)
於是我就話比較有印象的是Green tea、Peach tea、粉紅底黑lace，花仙子等等(除咗粉紅黑lace，我真係連個顏色係點我都零印象.......)
但係，好Pro o既Janny居然話佢明o架喇，佢同Iris再安排一下比我試咗婚紗先，唔駛咁緊張~~
然後佢又同Iris商量咗一陣，我就可以入去試喇~~
嘻嘻，Iris的細心又係無得彈o架，佢叫我整好咗Girdle先，再叫佢幫我扣，咁樣無咁尷尬，然後佢就套好咗第一套婚紗o係地下，等我企咗入去再拉上o黎幫我pin布，佢pin布一啲都唔求其馬虎o架，pin好之後仲會睇一次有無走光，再叫我企好o係塊布簾前面教我點"執"住條裙，佢幫我鋪好個拖尾先會拉開塊簾，等我好似主角出場咁o架~~
第一件係英國公主Crossover：純白色的絹布設計，無用鋼紗但係有少少拱起咁，心型胸，腰間有少少打摺的效果，心口位釘咗少少一粒粒好閃的水晶，款式簡單啲但著住佢行禮都唔會失禮o架~~
企o係o個塊大大塊o既全身鏡面前，第一次覺得自己著起婚紗都還可以吖，因為第一次試婚紗時係毫無準備下咁o係尖沙咀試過，當時真係有"叮"一聲──覺得點解可以咁核突o架？件婚紗原本係要著鋼o既，佢又話試o下唔駛著鋼啦(但問題係我比咗$100試衫費o架都試得咁求其)，老實講，真係.....好鬼樣衰......亦令到我以後對婚紗都無咗fantasy.....
(各位，可憐我打咗成朝都未打晒呀，睇住先啦?)
(好好好，我番o黎喇~~)
令我最舒服o既仲有Janny o既態度，佢會不停咁話唔緊要o架，你試咗睇o下鍾意啲咩先，如果試咗套套都ok，我哋再睇o下點樣將你鍾意o既元素再放落去晚裝都得o架~~
第二套試o既都係英國公主(唔知係第幾版呀)：呢條係A-Line的(但我著咗上去有啲變咗魚尾咁)，卻又出奇地都唔差喎，領口位垂直打摺，又係釘咗一粒粒閃閃水晶，裙腳有6吋French Lace，後面都係拖尾o既，望住後面塊靚到爆燈o既lace，我忍唔住話：究竟有無B2B係唔會為lace心動o架?!!!!
總括o黎講，呢條個款modern啲，不過就無咁隆重，較適合Felix註冊用~~
第三條係全場最貴重的英國公主：全條裙釘滿好多粒閃閃水晶 + 銀線刺繡，但成條裙一啲都唔重，唔會有往下墜的感覺，因為裙係銀白底的泰絲造的，所以好輕身，但又唔會好貼肉，呢條裙係要加鋼紗的，亦係我第一次著鋼紗，著起呢條裙真係令到我自己都嘩咗出o黎，因為真係會令人有錯覺自己做咗公主呢~~
一出場，查理斯同家姐都話呢條裙好靚好靚，而且我膚色比較黑(定係黃呢?咁我情願係黑喇)，著純白色的好像有啲污污糟糟咁o既感覺，呢條白底有啲銀線混集的婚紗反而比較好呢~~
我已經忍唔住話但係條裙咁靚，我會忍唔住不斷望住條裙又不斷咁搞啲水晶o架喎~~哈哈~~我哋大家都以為呢條應該都中選o架喇，Janny就話仲有一條呀，試埋先啦~~
第四條都係英國公主系列叫"易花" (查實呢條裙係為咗一個有個法國名字的新娘而新造的，所以用咗佢個名o黎命名，但由於我唔識法文，所以無法子清楚話比大家知佢叫咩喇)：Iris不斷重複咁話呢條裙比起之前o個啲會重少少，因為佢o既水晶都好多，同埋布料唔同係比較厚同挺身的。裙係象牙色的(即係偏黃啲，唔係白)，Iris一路幫我pin布我一路望塊鏡嘩嘩嘩嘩嘩，因為真係好好好好好靚呀!!!!!
少少心型胸，裙擺前幅做咗兩層波浪紋咁，沿住波浪紋係每邊都用一粒粒米白色的珍珠釘成一行行，裙後面有大蝴蝶結，裙腳有6吋french lace，兩層大拖尾都釘咗水晶，呢條裙比起頭先o個條仲多咗一份純潔同埋活潑啲o既感覺呀!!!!
象牙色比起之前的都比較襯我的膚色，好像還多了一份恬靜o既感覺呢~~
其實一穿起呢條裙我都知道佢係查理斯o既不二之選，因為呢條裙真係好公主(我再重申我係無公主病o架~~有o既係查理斯)，加埋啲水晶同珍珠，正正就係佢平時好喜歡的英國式的Elegant的設計，連家姐都話第日如果做新娘都一定幫襯Janny呀~~
o係我哋嘈喧巴閉的時候，Janny反而係微微笑咁坐埋一邊無乜出聲，然後我突然間叮一聲，我話Janny係特登咁樣安排呢4條裙o既次序o架，由比較平凡的開始，一條比一條grand同埋接近我哋o既喜好，呢個設計師真係好勁呀~~
因為其實件件我都唔o岩著，Janny眉都唔皺一下就話既然我鍾意呢條，咁佢會重新造一條新o既比我，如果頭先o係第二條裙度有啲咩係鍾意o既，可以留番放落晚裝度~~
(BTW，Janny啲cutting又係好厲害，我著幾件婚紗，underarm側邊舊肉都無咇到出o黎o架，連Iris都話呢啲就係Janny用心o既地方，佢話而家條裙仲未o岩身，如果o岩身o既時候仲好睇呀~~)
然後就開始試晚裝喇~~
第一條係我自己講o既peach tea：上身係粉橙紅色，但唔係鮮色的，繡咗好多金線，下擺係一層層peach tea咁o既顏色的輕紗，Iris先係幫我著咗鋼紗，但後來比Janny睇過都係唔著好啲，不過因為我膚色太深，同啲tea混埋咗咁 + 心型胸再開咗個小v領，查理斯一見到就話唔得喇，所以好快就out咗呢件喇~~
(好明顯係我自己衰多口亂講個名又唔記得個款先會試咗呢件，因為之後o個啲一拼就知Janny係完全知道我要著啲咩o架~~)
Janny攞咗件粉紅黑lace比我併一併(哈哈，因為呢件真係太窄喇，所以完全無法子試只可以併)，一併落去，大家都即刻話呢隻色好好多，連Janny都話呢隻色我著會影得白啲光啲，可以考慮o架~~
然後佢就問我，有無興趣揀紅色o既晚裝？其實我一直都好喜歡紅色的，而且敬酒又可以著，所以我話好呀~~
Janny好快就o係個架度攞咗件中東貴族出o黎比我併，一放上個身度，真係無法子唔喜歡喎，隻紅色係好sharp o既紅，坊間有好多紅色晚裝都係棗紅、瘀紅，但呢隻紅一併埋o黎令個人好醒神又後生咗咁呀，心型胸，圍住心口用銀色珠片釘咗有啲似而家好多新人整o既logo o個啲grand grand哋o既圖案咁，裙擺都好多銀色珠片釘成的圖案，好閃好閃但唔俗氣，係A-Line + 裙擺有兩層，塊布除咗紅之外原來仲有暗閃o架，總之就好靚好靚啦~~
查理斯問仲有無其他紅色的晚裝可以睇o下，Janny話其實紅色仲有好多，不過有啲可能成熟得滯唔o岩我，但都攞咗件更閃o既出o黎比我併，呢件都係好sharp的紅，但因為好多金銀珠片，太閃喇，我哋一併，Janny已經話：可以攞走喇呵？wakakaka~~果然係設計師~~
然後查理斯話想我揀粉色啲o既，咁Janny就提議咗我試黃色的雪莎黃喇~~(呢件可以著喇，唔駛併喇)
呢件都係要著鋼紗的晚裝，左邊膊頭有一朵類似pompom的花o係吊帶度，心口有水晶，裙擺有刺繡，腰有啲布造玫瑰同埋一條條的鬱金香咁o既花蕊，造得真係好似呀!!!! 但因為呢隻黃色唔係sharp color，所以我又覺得好"痴"我啲膚色，我自己就麻麻地，但家姐同查埋斯都猛話ok喎，我唯有再重申，我而家只係可以揀1婚紗1晚裝1褂，所以我寧願要紅色喇~~
然後Janny再望咗我一陣，就再攞咗件Green Tea比我併，其實呢件都好靚o架，魚尾款，個裙尾好閃好靚o架，隻色好似綠茶但因為塊布閃閃哋都唔太沉色o架，不過查理斯本身唔喜歡綠色，所以見佢個樣皺晒眉咁，Janny又攞咗一件粉綠色的比我併，佢話呢件叫做粉綠青蘋果喎~~(其實我都唔係好記得係咪咁叫)
佢話呢件都係新作品，佢覺得除咗紅色，粉紅黑lace同呢件我都可以著得到，仲會映得膚色白啲o架~~
呢件粉綠青蘋果有少少娃娃款咁，上身一字胸，有啲綠色+紫色o既繡花仔，裙擺係幾層紗造成，粉綠色布底有啲閃閃金色，呢件衫好fresh好young，家姐同Janny都話著o黎送客係好好o架~~
然後我就問Janny其實我都想試o下啲紫色系列，Janny話深紫太熟唔適合我，佢仲攞咗一條花仙子掛o係度o架，不過覺得色唔夠sharp，所以無比我試，但最後佢都攞咗出o黎比我睇，呢條裙真係好襯花仙子呢個名呀!!!!
係Dusty pink + purple的輕紗交叠造成，裙身好多閃紫同粉紅珠片，有啲又釘到成朵花咁，真係好好好好好靚呀!!!!
但係........隻色........我啲膚色唔夠白，著咗上去會好似好污糟咁o架，真係dusty喇.....所以唔駛諗~~
然後，我都唔知自己揀紅色好定綠色好，Janny話我哋可以適量o下先，可以加錢將褂轉造晚裝，係$1888，我就無咩點諗就問查理斯不如唔好要件褂轉造晚裝咯？呵呵呵，查理斯梗係無問題啦~~yeah~~
Janny話佢今晚無攞啲金色、銀色同埋深紫色o既衫比我試，係因為佢覺得我唔襯咁熟o既顏色，我亦好佩服佢大家只係接觸咗一陣佢就知道我o既愛惡同埋襯啲咩嘢(好彩我個樣仲呃到o下人，咪一陣佢攞啲熟晒o既衫比我試我會好傷心......)
就係咁，我而家有1婚紗2晚裝喇，3件都會係Janny重新度身為我造，所以呢，佢話度身係根據而家o既size o黎做，所以可以唔瘦，但唔可以再肥o架喇 (哈哈哈哈哈，我都唔會比自己咁放肆~~)
不過，佢一再強調，結婚最緊要開心，去佢度試衫唔好有壓力，減唔減到唔係最重要，減唔到但開心咪得囉，減到就當係bonus啦~~
佢仲將佢自己減肥的心得同餐單話咗比我知，曾經歐陸o個個老闆娘都打過電話比我話佢有張醫院比糖尿病人食o既減肥餐單可以比我時我一口拒絕咗佢(重點係佢自己都係肥c大隻 + 我無糖尿呀!!!!)，因為佢把死人聲係一聽就知佢唔係真心為我好，只不過希望我瘦咗可以唔駛造租就咁租佢o個啲現成衫，但Janny的態度係想你靚想你好有好嘢大家一齊分享o下啦~~
同佢傾偈天南地北咩都講得，我試衫期間佢唔會閒著，反而會同我家姐傾偈傾到好鬼熱鬧開心，總之就係無論你係咪主角，你都會有賓至如歸的感覺~~
今次近距離接觸到佢啲衫，手工真係好靚，o個啲水晶、刺繡亦都係佢個人一手一腳完成，除咗懷疑佢住得咁僻靜係因為有一隊外星裁縫幫佢，我對佢o既服務態度同埋審美眼光零質疑，再加埋Iris連pin布都一絲不苟，我敢講句，o係o個度租衫唔係租一套衫咁簡單，而係o個啲專業o既眼光同意見，呢啲係有錢都未必可以買到o既服務質素啊~
(就連去試衫都變咗個公主咁，真係令人好享受o架~~)
大家睇到o黎呢度，我真係好多謝你，我花咗2個幾鐘頭先完成呢篇感想，但好抱歉，1st fitting係唔比影相o架，偷影亦係唔可能o既事，所以大家耐心啲等啦，我8月尾2nd fitting，到時有咩再同大家分享啦~~
(哈哈哈哈哈，無相睇o架~~~大家係咪覺得比我呃咗呢？)
而家煩惱緊o既係我o係歐陸仲有1婚紗2晚裝的造租package，我點著得晒咁多衫呀？我亦唔想自己當晚變身一個barbie而浪費咗同賓客好好打招呼o既時間呀!!!! 點算好呢？
)
)
)
)
