放血週記(上)

呢個禮拜糟糕、耕田同埋先知都大減價，搞到我哋一次又一次咁放血，睇o下我哋有幾多抽獎券同埋cash coupon就知我哋血流成河啦.....

放血之前係要有個攻略o架~~
我星期五晚放工獨闖耕田，第一時間攞份大表睇睇有咩好買先，然後"目標為本程式"啟動，拿拿林逼入去家品部~~

第一樣敗o既又係casablanca，今次買咗張德國70%抗菌羽絨被，King size原價$3499，特價$1399，再有9折係$1259，不過後來我發現糟糕仲抵，$1349有9折，另外如果用糟糕咭有5%回贈再加埋打去熱線抽保證最少5%回贈，即係$1095，我呢個精明眼失咗手......

而Clinique有set嘢要28/5(Sat)先開售，我博大霧去問問個sales，佢話叫我第二朝一開門好湧入去買喇，限售二百套o乍~~但第二日我要番工啊....

夜晚講電話同查理斯提過o下，呢個傻佬第二朝晨早起身番公司做咗少少嘢就過海去耕田等開門呀!!!

據報查理斯去到時係10:40am，但已經係超多人，粗略估計有五百幾人o係佢前面，當一開門啲人湧去家品部，佢就 逆 流 而 上 去化粧品部，佢話個sales見到開第一張單o既係個男人，都有啲詫異~~

其實呢我哋一早話咗放咗工都會去睇床耨，不過佢驚200套"fu"一聲賣晒，所以朝早去買咗比我先喎~~結果.....我哋7pm抵達耕田都見到仲 有 得 賣!!!!!

Anyway，查理斯今次勁抵讚啊~~

$350 set裝包括一瓶50ml moisture surge、兩片眼膜同一片面膜

原本仲想叫查理斯去買埋Casablanca $199 限售100張的印花雙人冷氣被，但佢去到個counter只係開咗門3分鐘，都話售罄喇!!!! (究竟啲人係幾時攞籌同o係邊度攞籌o既呢....搶貨呢家嘢我哋真係唔夠啲師奶鬥o架....)

下午，我哋約埋笨豬小慧一齊再o黎個血拼~~

第一樣又係睇床品，因為我係一個好揀枕頭瞓o既人，所以見大減價買咗婷姐枕，$190有兩大個呀~~

然後呢就去咗睇床耨喇，好多bloggers都話愛皇健好瞓而耕田大減價係超抵o架，Queen size(5呎) Spinal Guard Luxury 由$15000減到$4179，我哋都好心動，但真係太多人喇，所以都係打算番屋企search一下comments先~~

途中又見到寶富麗三座位真皮電較梳化只係$5999，查理斯勁鍾意呀!!!但因為我唔識呢個牌子，都係番屋企做o下資料搜集先啦~~

上咗一層買呢套$168五件裝煮食用具(5件係包埋兩個煲蓋計)，無晒貨喇，不過接受先比錢貨到再取，呢幾樣嘢都好輕身(i like 輕身~~) 由於我同查理斯屋企都仲用緊幾廿年前要開鑊o個啲生鐵鑊(有晒鑊燶咯)，我哋都依然肥獅大隻，所以我哋唔係好講究o個啲塗層會係點，加上意美廚都係大牌子，咁平我真係諗都唔諗就豪比佢喇~~Yeah~~我而家欠一隻炒嘢o既鑊o乍~~

放血完畢歸家途中去咗旺角新世紀先施，又買咗一張被(咩事呢我？呢張已經係我7日入面買o既第3張被喇....)，因為我哋而家有一張冷氣被、一張羽絨被，欠咗一張介乎兩者之間o既被，查理斯超勁，睇到呢張價值$269 o既唔知咩被(sales話比冷氣被厚啲o架喎~~)，我又多口問o下佢如果有VIP有無得平啲(重點係"如果"，我係無VIP o架)，佢話再多9折，佢又無check我係咪VIP喎，就係咁，呢張被又跟咗我哋走喇~~(同埋好彩朝早糟糕張印花冷氣被無貨o乍，佢唔預你入被袋所以無棉繩索扣番住個被袋o架~~)

話明係放血記，又點會買得咁少嘢吖，大家等睇下集放血o既戲肉啦