包羅唔萬有帖

呢篇已經係我第二百篇網誌喇~~

今日要同大家講o下印帖o既問題 (查理斯o係我零催促底下自動波完成咗一系列DIY，假期都晨早起身對住電腦畫畫畫，所以話咁快跳到去印帖呢part喇~~)

(大家係咁二比啲掌聲鼓勵o下佢好唔好呢？)


一早o係婚展落咗三百蚊訂join咗好日印帖，之後印帖會有8折 + 送利是封同貼紙~~

佢每張帖sample上面都會有幾個印唔同數量o既價錢，當時我問個職員，我而家o係sample帖見到有o既嘢係咪都係帖面個價錢包晒o架喇，問咗佢幾次佢都話係，除非我哋要做o既Logo/圖案太大先要加錢，否則而家見到張帖有咩都係包咗o架喇~~

咁好ok喎~~因為我哋圍數少，有啲做到天花龍鳳咁靚o既都唔算好貴，所以就攞走咗幾張sample番去比查理斯設計喇~~

大家睇到以上啲咭係咪都心郁郁呢？

哼！

咁咪好似我哋咁出晒事囉......

話說當我呢排攤番開啲帖o係度睇o既時候，先發現佢上面寫住

"單色加$300"、"UV加$650"、"內頁加紙$1.5一張"、"多一個文字版加$120"......

最後我哋發現簡單啲o黎講，佢寫住$8一張的帖，其實只係包咗

1. 空白咭紙 (唔係隻隻紙都包，有啲sharp colour 要加$400)

2. 內頁燙金文字版一個 (直接印落張帖度唔加紙)

3. 封面燙金新人名字  (太大個名又話要加$80 / $150)

4. 唔同摺法 / 長方形或者正方形的價錢可以差一倍

好喇，係我哋唔o岩，唔睇清楚就落訂.....

所以我哋攞住張sample去問如果我哋要改成點樣係幾錢一張？

前前後後去咗三次，最令人憤怒o既係星期六晚A同B職員報價有唔同價錢，到星期日朝早去落單C職員再報第三個價錢，真係好激氣!!!!



講講我哋個要求啦：

1. 米白色咭紙

(職員ABC都話同其他珍珠紙一樣價錢，但都無提到唔同顏色有唔同價錢，原先想選桃紅色，後來o係其他blog睇到呢隻色要加$400，佢哋完全唔提)



2. 封面燙啞金我哋個名

(A：燙名呢個可以包埋(當時我攞住張sample新人名字長度大約係15cm)，但字體要o係我哋現有字款度揀，如果要燙埋Logo要加$300電版費；

C：新人名字可以包燙金，但長度大約係6cm，超過要加$80，字體可以我哋自己design比佢，如果加燙Logo及名字要加$150)



3. 封面四邊壓長形花邊(呢啲花邊係o係佢現有電版中選擇)

(A：每張加$2；

B：攞咗另一款封面有壓邊o既帖話照o個個價錢即係$8.6；

C：B揀o個款咭可以直接壓落呢度，唔駛加錢)



4. 內文直接燙啞金落咭紙度，但因為有兩類賓客，一係觀禮+飲宴，二就淨係觀禮

(A&B都話加多一文字版係加$120，

C話除咗$120仲要比多$150轉版費，即係拆個電版落o黎再裝另一個電版上去呢個動作要收$150)



結果係加多一個文字版要加$270，封面燙名字+Logo又加$150，而家除番開每張帖要$7.8......

雖然唔係比我哋預計o既貴好多，但係胡亂報價真係令我哋忟憎!!!

佢哋根本係隨口up當秘笈!!!!



要留意：

1. 包信封，可以揀顏色同紙質，信封面可加燙佢本身有o既圖案/文字，如果自訂又要加錢做電版....

2. 加送的貼紙同利是封要o係佢現有款式中選擇，數量同你印帖數目一樣

3. 計算清楚帖的數量，因為每次加印一定要100張起，如果到頭來你只係欠2x張而要印多100張就好蝕o架喇~~

4. 而家封面個名+Logo係我哋比咗$150整電版o架，落單時同佢講話要番個電版，咁攞帖時佢會比番你，如果無提佢就唔比o架喇~~

5. 落實款式後一個星期可以睇黑白稿，之後再一個月取成品，記住金晴火眼睇清楚呀，錯咗佢唔包改o架喇~~

預告：由於張帖實在太簡單喇，我哋收到製成品會再加工o架~~至於加啲咩，嘻嘻，到時如果你哋有份收到帖咪知囉~~