2011年5月20日 星期五

半年倒數之外星人妻

諗咗好耐唔知寫咩好.....半年倒數日，感覺好複雜啊~~

由開初籌備時兩年多啲啲，到而家得番半年，睇住啲錢去如黃鶴，真係 好 徬 徨......


雖然戶口啲錢一日比一日少，可幸同查理斯o既愛情有加無減，在我們相愛八年半的這個日子，我好佩服自己獨具慧眼，八年半前發現咗你呢個外星人無去太空總署告發你(實情係我唔知點樣可以聯絡太空總署同埋我唔識英文.....)，亦沒有放走你(而家更加肯定我 唔 會 放 過 你~~)

前兩日o係屋企執嘢，根據金絲雀o既"亂中有序置物法"，我成功搵番我哋n年前影o既貼紙相，我覺得而家o既你......靚仔好多~~(嗱嗱嗱，靚唔靚呢啲嘢唔計體重o架o麻~~你哋夠膽話肥肥肉酸過馬蹢露咩?!)

(事實係因為越來越多人話我同你好似樣，咁你似我多咗咯，一定係靚咗o架啦~~)

嘻嘻，其實係因為越近大日子，越多嘢要落實要同屋企人傾，我好多時都憤怒雀上身，又忟憎又哭鬧話後悔結婚，面對住我屋企大大小小o既煩人煩事，你唔單止無口出怨言我更睇得出你係一刻都無諗過要詛咒佢哋......(神啊~~原諒我，雖然o個啲係我屋企人，但煩到埋身o既時候，我個心真係會媽媽叉叉.....)
而你總係話有你o係我身邊陪住我面對同解難，當所有問題唔係問題咁，o個種樂觀同埋豁達連雀都自嘆不如呀......
好多B2B都獨力完成DIY，甚或比老公歧視呢啲耗大量時間金錢o既小玩意，但而家o既你卻好似一早比人set咗時間制咁，自動波完成一樣又一樣o既DIY，睇住你對婚禮籌備o個種熱誠同傻勁，我真係雀懷安慰咯~~
多謝你每次o係我抱怨o既時候你總係當我發up瘋唔會記o係心，我唔係一隻才學兼備o既雀，所以從來無變身職業女強雀o既諗法，嫁咗你我真係想安心o係屋企相夫教笨啦啦同菜菜子~~(幾動聽o既懶打工藉口~~)
雖然你距離大富大貴o既日子仲有五十億光年，但睇到你努力實踐將我變成真正金絲雀，我 好 感 動!!(亦 好 期 待每日去cova偶遇拉姑同柏芝一齊嘆高茶o既終極敗家生活~~)
上星期你問我有無期待半年後o既大日子，我好衰咁話無，其實我更期待o既係我哋過咗大日子之後o既新生活，望咗8年、恨咗8年終於都可以o係我倆o既小天地入面"無王管"喇!!!(你哋唔知o架喇.....雀母有時真係好....管家婆.....)
對於將來o既日子我依然抱著希望與興奮，但願到我一把年紀就快兩腳一伸o個刻再回顧呢一生，我可以大大聲聲同人講：因為你，我成了幸福o既金絲雀！

張貼者： 於

25 則留言:

  1. Michelle2011/5/20 下午1:47

    好快好快，仲有半年o乍，唔好咁鬼心急啦，hehe~~
    [版主回覆05/20/2011 13:54:00]好久不見喇~~你係咪因為日日去高茶所以唔UPDATE先？最近好嗎？

    回覆刪除
  2. 芝士2011/5/20 下午1:58

    時間真係過得好快呀!!!! 你好快就大個女!! 呵呵呵
    [版主回覆05/20/2011 14:01:00]嘻嘻,你早我啲啲大個女喎~~呵呵呵~~ 尋日有朋友話未結婚比人叫老女,我話咁我結咗婚咪比人叫老婦?哈哈

    回覆刪除
  3. SkyBlue2011/5/20 下午2:03

    時間真係好快, 你好快就出嫁 ! 你由 DAY 1 遇到佢, 已經係好幸福既金絲 雀

    回覆刪除
  4. Capri2011/5/20 下午2:22

    祝你幸福快樂呀....我都等緊我既大日子...HAHA

    回覆刪除
  5. Shelley2011/5/20 下午2:24

    點睇你幾時都係一隻開心樂觀雀啦，想像唔到憤怒雀點喎，哈享受多陣單身日子啦。

    回覆刪除
  6. Ms Bee2011/5/20 下午3:39

    係啦, 忽然間就由兩年前開始book場, 到依家得番半年...真係 悲 (好多野都冇整) 喜 (終於就快到bid day) 交雜!

    回覆刪除
  7. 迷糊王妃2011/5/20 下午4:16

    好sweet呀~~

    回覆刪除
  8. 大王與女王2011/5/20 下午5:12

    好感動~~~又sweet~~

    回覆刪除
  9. SimpsonSimple2011/5/20 下午5:45

    haha，好幸福呀~~~~~每次睇你個blog都有一樣放鬆心情o既感覺。你同查理c都係天造地設o既一對，佢令你幸福之餘你亦令佢人生更有方向及目標~~~~~~彼此一齊加油呀 ^^
    by醒目主人simpson

    回覆刪除
  10. annieannie2011/5/20 晚上11:48

    好感人嘅表白~! 你同你老公都好幸福

    回覆刪除
  11. 莎拉蛋糕Sarah Cake2011/5/21 凌晨12:28

    你真係一隻幸福o既金絲雀, 見到你呢篇blog覺得好感動, 最緊要係大家互相都咁愛對方, 查理斯有你就夠啦!!!

    回覆刪除
  12. ::chanwong::2011/5/21 凌晨12:49

    時間過得真快！好期待大家的big day ar~~

    回覆刪除
  13. Glad2011/5/21 凌晨12:52

    好sweet呀!! 過咗大日子之後o既新生活 <- 我都係好期待 加油呀!

    回覆刪除
  14. Chunchun2011/5/21 上午11:43

    真係好sweet~~^^甜到漏~~

    回覆刪除
  15. 小beebee2011/5/21 晚上10:48

    好sweet,甜到漏 .......祝你幸福快樂呀!!

    回覆刪除
  16. 加利2011/5/22 凌晨12:10

    時間過得好快ar!貶下眼就到大日子lu!! 睇到你篇野好感動ar~~你地好鬼sweet 好恩愛! 我都我男友都拍左8年la! 呢篇野令我想起好多野tim!!!搞結婚搞到自己勁燥~~ 成日發左佢好多脾4~~身邊個位真係要頂得住ga和識得同你分擔先得ga!! 能夠找到一位咁合適的人真係好幸運!! 半年後一齊做位幸福小女人 la~~~~~~~~

    回覆刪除
  17. Daisy_Matt 2Become12011/5/23 中午12:53

    戶口啲錢一日比一日少..
    深有同感！ ....

    回覆刪除
  18. 魚魚 Fish2011/5/23 晚上10:00

    好sweeet 呀~~~~~~

    回覆刪除
  19. 祺高。小朱太2011/5/23 晚上10:23

    好sweet sweet~~~~

    回覆刪除
  20. 吉仔吉女2011/5/23 晚上10:34

    heehee，查理斯見到呢篇實好冧姐~~ 幸福0既雀~~
     
    我今日都同吉仔講，不如你賺多d 錢等我相夫教子啦

    回覆刪除
  21. 廁紙2011/5/24 上午10:43

    --> 神啊~~原諒我，雖然o個啲係我屋企人，但煩到埋身o既時候，我個心真係會媽媽叉叉.....
    聽到你咁講, 有d 安慰, 我成日以為得我一個會咁諗自己嘅屋企人
     
    --> 你哋唔知o架喇.....雀母有時真係好....管家婆.....
    我阿媽同你阿媽應該係同一類人, 關佢事又要理, 唔關佢事都要理, 做咩都要得佢批准, 得佢同意, 係差左唔洗一個月前入紙申請喳
     

    回覆刪除
  22. HIU FUNG2011/5/24 下午1:28

    好sweet, 但亦好真實.......唉........(極度煩惱中~~~)

    回覆刪除
  23. 艾利絲2011/5/24 下午4:55

    So sweet... 仲有半年ja, 加油！

    回覆刪除
  24. YY2011/5/28 凌晨12:33

    真係好快~丫~一起努力喔~ 我係20.11 2011

    回覆刪除
  25. why me2011/5/28 晚上8:30

    好好享受這半年啦, 我覺得待嫁係一個好好嘅回憶~~

    回覆刪除

訂閱： 張貼留言 (Atom)