不見天日窗簾布

北上做窗簾第一樣梗係諗起羅湖商業城有間大大間整窗簾o架啦~~

第一站去到，已經覺得招呼唔係幾好，所以又貢咗上五樓布城睇睇，但都係唔o岩心水，唯有落番地下o個間大舖再揀啦......


揀咗好耐，先揀齊

1. 廳：1布,1紗,1簾頭
2. 房：1布,1遮光布,1紗

由於我哋啲窗真係大窗，Size係2米幾闊 x 2米高，所以預咗價錢唔會好平，但我見人哋做晒全屋5隻窗連路軌都係一千蚊，咁我唔駛做路軌啊，應該平喇o掛？

點知我望住佢篤篤篤計數機，佢未篤完我已經見到係$3xxx，我即刻話唔係o掛？三千幾？貴到咁？咁香港都做到啦，我唔駛上o黎啦~~(佢真係獅子開大口呀!!!)

獅子同胞：呢啲料唔同呀，你揀啲料貴囉......

我話：咁我揀番平啲喇......

獅子同胞：你做簾頭又紗又窗簾，三層布係貴o架

我：咁唔做簾頭喇，平幾多

獅子同胞：平九百啦......(簾頭先用o個少少布都可以減番$900?!!!!)

我：咁都貴啦......

獅子同胞：咁你想幾多吖？

我：千二蚊

再講我先知原來我哋揀啲布封係得1.4米，咁佢話要Double再Double先做到，我其實都唔知佢想點，只係一聽價錢就無興趣去了解喇......

我都費鬼事睬佢，同查理斯預備走人喇~~~

獅子同胞再還價：二千七啦包簾頭喇......

我哋頭也不回咁邊爆粗邊離開lu~~

大家睇o下以下呢兩塊紗就係o係o個度揀o架喇，要$88一米，真係貴到呢.....

不過多獅子同胞開大口，我哋之先可以o係東門搵到平靚正嘢~~



離開咗獅子個口，我哋就好苦惱喇，因為天氣好熱，我唔想行冤枉路，而且我哋時間唔多要趕番落香港參加百日宴，所以都係跟從網上有位blogger的資料打的去咗東門華佳布料廣場，搵到以下呢間公司~~

呢個商場全楝都係賣窗簾的，冷氣都充足，最緊要係無咩人唔駛迫可以慢慢睇慢慢揀~~

首先我哋問佢啲價錢大約係幾錢一米，我哋要簡簡單單+經濟實惠的窗簾就可以喇，佢介紹的都只係$2x-$3x一米都好好睇喇，最後我哋揀咗以下呢款做廳的窗簾同紗~~清清哋，好舒服好襟睇~~



至於睡房我想浪漫番少少，一見到呢款繡球圖案紗我已經無再諗其他喇，再加埋隻直紋灰白底布，yeah~~大功告成~~



呢度全部嘢夾埋講埋價只係需要RMB$860，本來可以即日攞(大約3-4小時)，但我哋要去3V攞成品，又唔想再折返，加咗$80運落香港，我哋只係比咗一半訂金，尾數收貸先比，咁到時睇過先收貨就安全啲啦~~

我極力推介呢間窗簾，老闆係女人，感覺好老實唔會亂開價，介紹啲款同埋價錢都中肯，好好服務~~

以上呢個價錢已經包埋假窗廉頭同埋啲掛勾，但獅子店係要加$60先有掛勾o架~~另外，同一款銀色遮光底布，呢度只要$5一米，獅子店要$15，價錢係3倍哦~~

所以如果大家唔係需要好多花款，走簡約舒服路線，我覺得還是坐一程車去呢度搵佢啦

(如果擔心質素唔好，可以等我星期六收咗貨同大家分享咗先去啦~~)

舖名：鴻潤窗簾布藝

店主：陳冬梅

地址：深圳市東門湖貝路東門華佳窗簾布藝廣場3樓332號

電話：0755-61623219   / 13714447830

有樣嘢一定要記住，內地買布係計米的，所以量度時最好自己轉鲤厘米，同埋如果隻窗大要問一問佢個布封Size，揀啲布封闊的會慳多啲錢o架~~
仲有記住要講價呀，講唔到都要叫佢送多幾個勾呀~~